ເປັນຫຍັງຈຶ່ງເອີ້ນພະເຢຊູວ່າລູກຂອງພະເຈົ້າ?
ຄຳຕອບຈາກຄຳພີໄບເບິນ
ສ່ວນຫຼາຍຄຳພີໄບເບິນຈະເອີ້ນພະເຢຊູວ່າ “ລູກຂອງພະເຈົ້າ”. (ໂຢຮັນ 1:49) ຄຳວ່າ “ລູກຂອງພະເຈົ້າ” ສະແດງໃຫ້ເຫັນວ່າພະເຈົ້າເປັນຜູ້ສ້າງຫຼືເປັນບໍ່ເກີດຂອງທຸກຊີວິດລວມເຖິງຊີວິດຂອງພະເຢຊູນຳ. (ຄຳເພງ 36:9; ພະນິມິດ 4:11) ແຕ່ຄຳພີໄບເບິນບໍ່ໄດ້ສອນວ່າພະເຈົ້າມີລູກໃນວິທີແບບດຽວກັບມະນຸດ.
ຄຳພີໄບເບິນກໍຍັງເອີ້ນທູດສະຫວັນວ່າ “ພວກລູກຂອງພະເຈົ້າ”. (ໂຢບ 1:6) ແລະບອກວ່າອາດາມ ມະນຸດຄົນທຳອິດກໍເປັນ “ລູກຂອງພະເຈົ້າ.” (ລູກາ 3:38) ແຕ່ເນື່ອງຈາກພະເຢຊູເປັນສິ່ງມີຊີວິດທຳອິດທີ່ພະເຈົ້າສ້າງໂດຍກົງ ຄຳພີໄບເບິນຈຶ່ງເອີ້ນພະເຢຊູວ່າລູກຄົນທຳອິດຂອງພະເຈົ້າ.
ພະເຢຊູຢູ່ເທິງສະຫວັນກ່ອນມາເປັນມະນຸດຢູ່ໃນໂລກບໍ?
ແມ່ນແລ້ວ ພະເຢຊູເຄີຍເປັນທູດສະຫວັນກ່ອນມາເປັນມະນຸດຢູ່ໃນໂລກ. ເພິ່ນບອກເອງວ່າ “ຂ້ອຍລົງມາຈາກສະຫວັນ”.—ໂຢຮັນ 6:38; 8:23
ພະເຈົ້າສ້າງພະເຢຊູກ່ອນສິ່ງອື່ນໆທັງໝົດ. ຄຳພີໄບເບິນບອກກ່ຽວກັບພະເຢຊູວ່າ:
“ເພິ່ນ. . .ເປັນຜູ້ທຳອິດທີ່ຖືກສ້າງກ່ອນທຸກສິ່ງ.”—ໂກໂລຊາຍ 1:15
ເພິ່ນ “ເປັນຜູ້ທຳອິດທີ່ພະເຈົ້າສ້າງ.”—ພະນິມິດ 3:14
ພະເຢຊູເຮັດໃຫ້ຄຳພະຍາກອນກ່ຽວກັບຜູ້ໜຶ່ງທີ່ “ມີຊີວິດຢູ່ຕັ້ງແຕ່ດົນນານມາແລ້ວ” ເກີດຂຶ້ນແທ້.—ມີເກ 5:2, ລ.ມ.; ມັດທາຍ 2:4-6
ພະເຢຊູໄດ້ເຮັດຫຍັງກ່ອນມາໃນໂລກ?
ເພິ່ນມີຕຳແໜ່ງສູງເທິງສະຫວັນ. ພະເຢຊູເຄີຍເວົ້າເລື່ອງນີ້ໃນຄຳອະທິດຖານຂອງເພິ່ນວ່າ: “ພໍ່ເອີຍ ຂໍໃຫ້ລູກໄດ້ຮັບກຽດເຊິ່ງແມ່ນກຽດທີ່ລູກເຄີຍມີຕອນທີ່ຢູ່ຄຽງຂ້າງພະອົງກ່ອນຈະມີໂລກນີ້.”—ໂຢຮັນ 17:5
ເພິ່ນຊ່ວຍພໍ່ຂອງເພິ່ນສ້າງສິ່ງອື່ນໆທັງໝົດ. ພະເຢຊູເຮັດວຽກກັບພະເຈົ້າໃນຖານະ “ນາຍຊ່າງ”. (ສຸພາສິດ 8:30, ລ.ມ.) ຄຳພີໄບເບິນເວົ້າເຖິງພະເຢຊູວ່າ: “ພະເຈົ້າໃຊ້ເພິ່ນສ້າງສິ່ງອື່ນໆທັງໝົດໃນສະຫວັນແລະໃນໂລກນີ້.”—ໂກໂລຊາຍ 1:16
ພະເຈົ້າໃຊ້ພະເຢຊູສ້າງທຸກສິ່ງ ລວມທັງທູດສະຫວັນອົງອື່ນໆທັງໝົດແລະເອກະພົບ. (ພະນິມິດ 5:11) ໃນແງ່ໜຶ່ງ ການເຮັດວຽກຂອງພະເຈົ້າກັບພະເຢຊູຄືກັບການເຮັດວຽກຂອງນັກສະຖາປານິກກັບຊ່າງກໍ່ສ້າງ. ສະຖາປານິກເປັນຄົນອອກແບບ ສ່ວນຊ່າງກໍ່ສ້າງກໍເຮັດໃຫ້ແບບແຜນນັ້ນກາຍເປັນຮູບເປັນຮ່າງຂຶ້ນມາ.
ເພິ່ນເປັນໂຄສົກຂອງພະເຈົ້າ. ຄຳພີໄບເບິນບອກວ່າກ່ອນພະເຢຊູມາເປັນມະນຸດ ເພິ່ນເປັນ “ໂຄສົກ” ຂອງພະເຈົ້າ. (ໂຢຮັນ 1:1) ນີ້ເປັນຫຼັກຖານຢ່າງຈະແຈ້ງທີ່ສະແດງວ່າພະເຈົ້າໃຊ້ພະເຢຊູ ລູກຂອງເພິ່ນໃຫ້ບອກຂໍ້ມູນແລະຄຳສັ່ງຕ່າງໆກັບທູດສະຫວັນອົງອື່ນໆ.
ເບິ່ງຄືວ່າພະເຢຊູຍັງເປັນໂຄສົກຂອງພະເຈົ້ານຳເມື່ອຕິດຕໍ່ກັບມະນຸດໃນໂລກ ເປັນໄປໄດ້ວ່າພະເຈົ້າເວົ້າຜ່ານພະເຢຊູຕອນທີ່ເພິ່ນໃຫ້ຄຳສັ່ງກັບອາດາມແລະເອວາໃນສວນອຸທິຍານ. (ຕົ້ນເດີມ 2:16,17) ພະເຢຊູອາດເປັນທູດສະຫວັນທີ່ນຳໜ້າຄົນອິດສະຣາເອນບູຮານໃນບ່ອນກັນດານ. ເຂົາເຈົ້າຕ້ອງເຊື່ອຟັງແລະເຮັດຕາມຄຳສັ່ງຂອງເພິ່ນ.—ອົບພະຍົບ 23:20-23 a
a ພະເຈົ້າບໍ່ໄດ້ໃຊ້ແຕ່ພະເຢຊູເພື່ອໃຫ້ເວົ້າຖ້ອຍຄຳຂອງເພິ່ນ ຕົວຢ່າງເຊັ່ນ: ເພິ່ນເຄີຍໃຊ້ທູດສະຫວັນອົງອື່ນໆທີ່ບໍ່ແມ່ນພະເຢຊູຄລິດ ເພື່ອບອກກົດໝາຍຂອງເພິ່ນໃຫ້ກັບຄົນອິດສະຣາເອນໃນສະໄໝບູຮານ.—ກິດຈະການ 7:53; ຄາລາເຕຍ 3:19; ເຮັບເຣີ 2:2, 3
ເລື່ອງທີ່ເຈົ້າອາດຈະມັກ
ຄຳສອນທີ່ສຳຄັນໃນຄຳພີໄບເບິນ
ພະເຢຊູເປັນພະເຈົ້າບໍ?
ພະເຢຊູກັບພະເຈົ້າຜູ້ມີພະລັງອຳນາດສູງສຸດເປັນຄົນດຽວກັນບໍ? ຫຼືເປັນສອງບຸກຄົນທີ່ແຍກຈາກກັນຢ່າງຈະແຈ້ງ?
