Kulikana ni zebaitutile mwa Bibele, Lipaki za Jehova balumela kuli habaswaneli kuikenya mwa litaba za lipolitiki. Halukukuezangi muuso kuli ucince milao yeutomile, haluvotelangi likopano za lipolitiki kamba mutu ufi kamba ufi, halubatangi kuli lufiwe litulo mwa muuso, kamba kuswalisana ni batu bababata kucinca mibuso. Lulumela kuli kunani libaka lelinde Bibele haibulela kuli lusike lwaikenya mwa litaba zecwalo.

•   Lulikanyisa mutala wa Jesu yanaasika ikenya mwa litaba za lipolitiki ka kuhana situlo sa bulena. (Joani 6:​15) Naalutile balutiwa bahae kuli nebasa swaneli kuba “ba lifasi” mi naabulezi ka kuutwahala kuli nebasa swaneli kuikenya mwa litaba za lipolitiki.​—Joani 17:14, 16; 18:36; Mareka 12:13-17.

•   Lusepahala kwa Mubuso wa Mulimu wanaatalusa Jesu hanaaize: “Taba yende ye ya Mubuso ikakutazwa mwa lifasi kaufela.” (Mateu 24:14) Ka kuba bayemeli ba Mubuso wa Mulimu, ili babafilwe musebezi wa kukutaza za kutaha kwaona, haluikenyangi mwa litaba za lipolitiki za mwa naha ifi kamba ifi, kukopanyeleza cwalo mane ni naha yelupila ku yona.​—2 Makorinte 5:20; Maefese 6:20.

•   Bakeñisa kuli haluikenyangi mwa litaba za lipolitiki, kulubelanga bunolo kukutaza taba yende ya Mubuso wa Mulimu kwa batu ba likopano kaufela za lipolitiki. Ka manzwi ni ka likezo, lubonisa kuli lusepile kuli Mubuso wa Mulimu ki ona feela okafelisa miinelo yetaata yebakopana ni yona batu mwa lifasi.​—Samu 56:11.

•   Kusaikenya kwaluna mwa litaba za lipolitiki kutahisa kuli luswalisane ni mizwale ni likaizeli babañwi mwa lifasi kaufela. (Makolose 3:14; 1 Pitrosi 2:17) Niteñi, bulapeli bobuikenya mwa litaba za lipolitiki bona butahisa kuli batu babaswalisana ni bulapeli bo bakauhane.​—1 Makorinte 1:10.

 Lwakuteka mibuso. Nihaike kuli haluikenyangi mwa litaba za lipolitiki, lwakuteka muuso wa naha yelupila ku yona. Taba yeo ilumelelana ni taelo ya mwa Bibele yeli: “Mutu kaufela aipeye kwatasaa milonga.” (Maroma 13:1) Lwamamela milao ya muuso, lwalifanga mitelo, mi hape lwalatelelanga ketelelo yebafa ba muuso kuli batuse batu babapila mwa naha. Haluswalisanangi ni batu babalwanisa muuso, kono lulatelela kelezo ya mwa Bibele ya kuli lulapelelange “malena ni babafilwe maata a kuzamaisa,” sihulu habaeza likatulo zekona kutahisa kuli lusike lwaba ni tukuluho ya kulapela.​—1 Timotea 2:1, 2, litaluso ze kwatasi.

 Hape lukuteka litukelo za babañwi za kuikezeza likatulo mwa litaba zeama lipolitiki. Ka mutala, halukaulezangi liketisa kamba kuhanisa batu bababata kuvota.

 Kana ki luna bapili kuhana kuikenya mwa litaba za lipolitiki? Batili. Baapositola ni Bakreste babañwi ba kwa makalelo ni bona nebasa ikenyangi mwa litaba za lipolitiki. Buka ya Beyond Good Intentions ibulela kuli: “Nihaike kuli Bakreste ba kwa makalelo nebaziba kuli nebaswanela kukuteka muuso, nebasa ikenyangi mwa litaba za lipolitiki.” Buka ya On the Road to Civilization ni yona ibulela kuli Bakreste ba kwa makalelo “nebahanile kufiwa litulo mwa muuso.”

 Kana kusaikenya kwaluna mwa litaba za lipolitiki kutahisa kuli kube ni mifilifili mwa naha? Batili. Lu batu babalata kozo, mi muuso hautokwi kuikalelwa luna. Ka mutala, munyakisise piho ya silimo sa 2001 yeneñozwi ki kopano ya National Academy of Sciences of Ukraine. Kopano yeo neifile piho ye ka za kusaikenya kwaluna mwa litaba za lipolitiki: “Batu babañwi kacenu bakona kunyaza Lipaki za Jehova kabakala kuli habaikenyangi mwa litaba za lipolitiki; ki lona libaka mwa lilimo za kwamulaho, ba Nazi ni ba Komyunizimu neba batamelelize litaba.” Mane niha nebanyandiswa ki mubuso wa Soviet, Lipaki za Jehova “nebazwezipili kumamela milao ya naha. Nebasebezanga ka taata ni ka busepahali mwa masimu ni mwa miyaho mone kuezwa misebezi yeshutana-shutana, mi ba Komyunizimu nebasika fumana butata ku bona.” Piho yeo neifelize ka kubulela kuli litumelo ni likezo za Lipaki za Jehova “halitahisi kuli kube ni mifilifili mwa naha kamba kutahisa kuli batu basike bautwa muuso mwa naha ifi kamba ifi.” Mi ki nto yeswana ni kacenu.