Bo Bryn, babapila mwa North Carolina, kwa America, ba mwa Katengo Kakaswalisanisa Lipaki ni ba Sipatela, ili kakasebelisana hamoho ni lipatela kubabalela Lipaki za Jehova babakula.

 Bakeñisa butuku bobuyambukela bwa COVID-19, lipatela zeñata nelisa lumelezi batu bane bato lekula bakuli kukena mwahali. Kabakaleo, bo Bryn balizeza yomuhulu wa sikwata sene sitalima za kutusa bakuli ka za mone bakona kutuseza Lipaki za Jehova bane bakula mwa sipatela.

 Bo Bryn nebaambozi ni mutusi wahae. Bakeñisa kuli mwa sipatela seo batu nebasa lumelezwi kukena kuli bayo lekula bakuli, bo Bryn bakupa kuli nombolo yabona ya luwaile ifiwe kwa Lipaki za Jehova bane bakula ilikuli baambole ni bona. Alumela kueza cwalo.

 Hasamulaho, bo Bryn banahana za mone bakona kutuseza babeleki ba sipatela seo. Bataluseza mutusi yo kuli nebaitebuha hahulu musebezi one baeza babeleki ba sipatela seo mi neba balakaleza buikangulo bobunde. Baekeza kubulela kuli nebalemuhile kuli batu mwa lifasi kaufela, sihulu batu babasebeleza mwa lipatela, nebaimelizwe hahulu kabakala butuku bobuyambukela bo.

 Mutusi yo alumela taba yeo ya kuli butuku bwa COVID-19 nebutahisize kuli babeleki ba sipatela baikutwe hahulu kuimezwa.

 Bo Bryn cwale seba mubulelela kuli: “Fa webusaiti yaluna kunani litaba zekona kutusa batu babaikutwa kuimezwa. Hamuka kena fa webusaiti ya jw.org, mubate linzwi la ‘kuimezwa’ mwa kalulo yebonisizwe kuli Mubate, mi mukafumana litaba zeñata zekasusueza batu bomusebeza ni bona.”

 Hane banze baambola cwalo, mutusi yo aya fa webusaiti yaluna, abata linzwi la ‘kuimezwa’ mwa kalulo yebonisizwe kuli Mubate, mi abona litaba zebeilwe fateñi. Akomoka hahulu. Abulela kuli: “Nikabonisa litaba ze ku yomuhulu wa sikwata saluna. Litaba ze likatusa babeleki ba sipatela se ni babañwi. Nika lihatisa ni kufa babañwi.”

 Hamulaho wa lisunda lisikai, bo Bryn baambola ni yomuhulu wa sikwata sesitalima za kutusa bakuli, yanaa batalusize kuli yena ni babañwi nebakeni fa webusaiti yaluna mi nebahatisize litaba zenebulela za kuikutwa kuimezwa ni litaba zeñwi zeswalisana ni taba yeo. Neba lifile manasi ni babeleki babañwi ba sipatela.

 Bo Bryn batalusa kuli: “Yomuhulu wa sikwata seo naaitumezi hahulu ku na kabakala musebezi waluna ni litaba zeñozwi hande. Naabulezi kuli litaba zeo neli batusize hahulu luli.”