Ka kuya ka patisiso yeñwi yeneezizwe, 80 pesenti ya babanca mwa America balapelanga, kono ki hafu feela ya batu bao babalapelanga zazi ni zazi. Kusina kukakanya, babañwi baipuzanga kuli: ‘Kana kulapela kutusanga feela mutu kuikutwa hande kamba kunani lituso zeñwi hape?’

•  Tapelo ki nto mañi?

•  Kana Mulimu wateelezanga halulapela ku yena?

•  Nikona kulapela ka zañi?

•  Zebabulela batu bomulikana ni bona

 Tapelo ki kuambola ni Mubupi wa lika kaufela. Munahane feela zeitalusa taba yeo! Jehova ki yomutuna hahulu kufita batu kaufela, kono “haayo kwahule ni mañi ni mañi waluna.” (Likezo 17:27) Mwa Bibele mane kunani memo ye: “Musutelele ku Mulimu, mi ukasutelela ku mina.”​—Jakobo 4:8.

 Mukona kusutelela cwañi ku Mulimu?

•   Nzila yeñwi ki ka kulapelanga​—hamulapela muambola ni Mulimu.

•   Nzila yeñwi ki ka kuituta Bibele​—hamueza cwalo kuswana feela inge kuli Mulimu uambola ni mina.

 Haiba muambola ni Mulimu ka kulapelanga ku yena ni kumuutwa haambola ni mina hamubala Bibele, silikani samina ni yena sikatiya hahulu.

 “Kuambola ni Jehova yena Yapahami ka Kufitisisa ki tohonolo yetuna luli.”​—Jeremy.

 “Kutalusezanga Jehova moniikutwela luli mwa tapelo kunisuteleza hahulu bukaufi ni yena.”​—Miranda.

 Nihaikaba kuli mwalumela kuli Mulimu uteñi mi mwalapelanga ku yena, mwendi kukona kumibela taata kulumela kuli Mulimu wateelezanga kwa litapelo zamina. Nihakulicwalo, Bibele ibulela kuli Jehova ki Mulimu “Yautwa litapelo.” (Samu 65:2) Mane Bibele imimema kuli ‘munepele lipilaelo zamina kaufela ku yena.’ Libaka? “Kakuli wamiisa pilu.”​—1 Pitrosi 5:7.

 Za kunahanisisa: Kana mwafumananga nako ya kuambola ni balikani bamina babatuna? Mwakona kueza nto yeswana ni ku Mulimu. Mulapelange ku yena nako ni nako mi mupundange libizo lahae la Jehova hamulapela ku yena. (Samu 86:​5-7; 88:9) Bibele imisusueza kuli “mulapele ka nako kaufela.”​—1 Matesalonika 5:​17.

 “Tapelo ki puisano yemwahalaa ka ni Ndate wa kwa lihalimu, ili mo nimutalusezanga maikuto aka kaufela.”​—Moises.

 “Nitalusezanga Jehova maikuto aka amatuna, sina feela monikona kuezeza haniambola ni bo ma kamba mulikanaaka yomutuna.”​—Karen.

 Bibele ibulela kuli: “Mwa lika kaufela muzibise Mulimu zemukupa ka tapelo ni ka kupo hamoho ni buitumelo.”​—Mafilipi 4:6.

 Kana taba yeo ibonisa kuli mwaswanela kubulelela Mulimu ka za mataata emukopana ni ona? Eni! Mane Bibele ibulela kuli: “Unepele mushimbo wahao ku Jehova, mi uka kutiisa.”​—Samu 55:22.

 Nihakulicwalo, hamulapela ku Mulimu muswanela kubulela ni zeñwi kwandaa matata feela amina. Musizana yabizwa Chantelle ubulela kuli: “Silikani saka ni Jehova hasikoni kuba sesinde haiba kuli nako ni nako nikupanga feela kuli anituse. Niikutwa kuli nto yapili yeniswanela kukupa hanilapela ki kuitumela ku Mulimu mi zeniitumela zeo liswanela kuba zeñata.”

 Za kunahanisisa: Ki lika mañi zemuitumela ku Mulimu mwa bupilo bwamina? Kana mwakona kunahana lika zetaalu zemukona kuitumela ku Jehova kacenu?

 “Nihaiba lika zebonahala kuba zenyinyani, zecwale ka palisa yende, zakona kulususueza kulapela ku Jehova ni kuitumela ku yena.”​—Anita.

 “Munahanisise nto yeñwi yabupile Mulimu kamba timana yeñwi ya mwa Bibele yemulata hahulu mi kihona mukaitumela ku Jehova kabakala nto yeo.”​—Brian.