Ki Kabakalañi Jesu Habizwa Kuli ki Mwanaa Mulimu?
Kalabo ya Bibele
Hañata, Bibele italusa Jesu kuli ‘ki Mwanaa Mulimu.’ (Joani 1:49) Pulelo yeli “Mwanaa Mulimu” ibonisa kuli Mulimu ki yena Mubupi, kamba Simbule sa bupilo kaufela, kukopanyeleza cwalo ni bupilo bwa Jesu. (Samu 36:9; Sinulo 4:11) Bibele hailuti kuli Mulimu naabile ni mwana ka nzila yeswana ni mobabelanga ni bana batu fa lifasi.
Bibele hape ibiza mangeloi kuli ki “bana ba Mulimu wa niti.” (Jobo 1:6) Mi Bibele hape ibulela kuli mutu wapili, yena Adama, naali “mwanaa Mulimu.” (Luka 3:38) Nihakulicwalo, Jesu ki yena Mwanaa Mulimu wa butokwa hahulu bakeñisa kuli Mulimu naamubupile pili asika bupa kale nto ifi kamba ifi mi ki yena anosi yabupilwe ki Mulimu kasibili.
Kana Jesu naapilile kwa lihalimu pili asika pepwa kale fa lifasi?
Eni. Jesu neli sibupiwa sa moya kwa lihalimu pili asika pepwa kale fa lifasi sina mutu. Jesu yena kasibili naabulezi kuli: “Nizwile kwa lihalimu.”—Joani 6:38; 8:23.
Mulimu naabupile Jesu pili asika bupa kale lika zeñwi kaufela. Bibele ibulela ka za Jesu kuli:
“Ki yena . . . mweli wa pupo kaufela.”—Makolose 1:15.
Ki yena “makalelo a pupo yeezizwe ki Mulimu.”—Sinulo 3:14.
Jesu naatalelelize bupolofita bobubulela za mutu ili yo “simuluho yahae izwa mwa mazazi a kwa makalelo.”—Mika 5:2; Mateu 2:4-6.
Ki misebezi mañi yanaaezize Jesu pili asika taha kale fa lifasi?
Naanani situlo sesituna kwa lihalimu. Jesu naabulezi za situlo se hanaalapezi kuli: “Ndate, unikanyise . . . ka kanya yene ninani yona hane nili bukaufi ni wena pili lifasi lisika ba kale teñi.”—Joani 17:5.
Naatusize Ndatahe kubupa lika zeñwi kaufela. Jesu naabelekile hamoho ni Mulimu “sina mubeleki wa sikwala.” (Liproverbia 8:30) Bibele ibulela ka za Jesu kuli: “Ki ka yena lika kaufela halibupilwe mwa mahalimu ni mwa lifasi.”—Makolose 1:16.
Mulimu naaitusisize Jesu kubupa lika zeñwi kaufela. Lika zenebupilwe ze likopanyeleza cwalo ni libupiwa zeñwi za moya, hamohocwalo ni pupo yebonahala. (Sinulo 5:11) Swalisano yene liteñi mwahalaa Mulimu ni Jesu ikona kubapanywa kwa swalisano ye mwahalaa muzamaisi ni mubakweli wahae. Muzamaisi utaluseza mubakweli wahae za kueza mi ueza cwalo.
Naasebeza sina Linzwi. Bibele haibulela za bupilo bwa Jesu pili asika pepwa kale sina mutu, ili Jesu neli “Linzwi.” (Joani 1:1) Kaniti, taba ye italusa kuli Mulimu naaitusisize Mwanaa hae kufa litaba ni litaelo kwa libupiwa zeñwi za moya.
Hape kubonahala kuli Jesu naasebeza sina Mubuleli wa Mulimu kwa batu fa lifasi. Kubonahala kuli Mulimu naaitusisize Jesu sina Linzwi kufa litaelo ku Adama ni Eva mwa simu ya Edeni. (Genese 2:16, 17) Jesu hape ulukela kuba lingeloi lene lietelezi Maisilaele ba kwaikale mwa lihalaupa mi iswanela kuba linzwi lahae lene banani kumamela ka tokomelo.—Exoda 23:20-23. a
a Linzwi haki lona feela lingeloi lanaaitusisanga Mulimu kufa litaba ni litaelo. Ka mutala, naasika itusisa Mweli wahae kufa Mulao kwa Maisilaele ba kwaikale, kono naaitusisize bana bahae babañwi ba mangeloi kueza cwalo.—Likezo 7:53; Magalata 3:19; Maheberu 2:2, 3.
Hape Mwendi Mwakona Kutabela Litaba Ze
LITIMANA ZA MWA BIBELE ZETALUSIZWE
Joani 1:1 Italusizwe—“Kwa Simuluho Nekunani Linzwi”
Liñolo le litalusa litaba ka za bupilo bwa Jesu Kreste pili asika taha kale fa lifasi ni kuba mutu.
MAVIDIO A LITUTO ZA BUTOKWA ZA MWA BIBELE
Kana Jesu Kreste ki Mulimu?
Kana Jesu Kreste ki yena Mulimu Yamaata Kaufela? Kamba kana Jesu ni Mulimu bashutana?
