Eni, mwa Bibele kunani litaba zefa bupaki bobutuna bwa kuli Mulimu uteñi luli. Bibele ilususueza kuba ni tumelo ku Mulimu, isiñi kulumela feela litaba zebuluta bulapeli kusina kunyakisisa bupaki, kono kuitusisa ‘maata aluna a kunahana.’ (Maroma 12:1; 1 Joani 5:​20) Hamunyakisise litaba za mwa Bibele zelatelela zebonisa kuli Mulimu uteñi:

•   Kuba teñi kwa mahalima ni lifasi ni zepila kubonisa kuli kunani Mubupi. Bibele ibulela kuli: “Ki niti kuli ndu ni ndu inani yaiyahile, kono yayahile lika kamukana ki Mulimu.” (Maheberu 3:4) Nihaike kuli mutala wo ubunolo, batu babañata babaitutile hahulu baukuteka. a

•   Ka kuba batu, lunani takazo ya kubata kuutwisisa mulelo wa bupilo, ili nto yeluzwelanga pili kubata kuziba niha lunani zelutokwa za kwa mubili. Takazo yeo ki yeñwi ya lika zeibulela Bibele ka za batu “babalemuha kuli batokwa za Mulimu,” mi takazo yeo ikopanyeleza kubata kuziba Mulimu ni kumulapela. (Mateu 5:3; Sinulo 4:​11) Takazo ya kubata kuziba za Mulimu ki bupaki bwa kuli Mulimu uteñi mi hape ibonisa kuli Mulimu ki Mubupi yalilato yabata kuli lumuzibe.​—Mateu 4:4.

•   Bupolofita bone buñozwi mwa Bibele lilimo-limo kwamulaho nebutilo talelezwa sina feela mone bupolofitezwi. Kutalelezwa ka kunepahala kwa bupolofita bo kusina kukakanya kubonisa kuli bupolofita bo habuzwi ku mutu-tu feela, kono buzwa ku yanani maata amatuna kufita a mutu.​—2 Pitrosi 1:​21.

•   Bañoli ba Bibele nebanani zibo ya litaba za sayansi kufita batu bane bapila ni bona ka nako yeo. Ka mutala, mwa linako za kwamulaho, batu babañata nebalumela kuli lifasi nelitiyezi fa folofolo, yecwale ka tou, kulube ya mwa mushitu, kamba pulu. Ka kushutana ni taba yeo, Bibele ibulela kuli Mulimu “upahekile lifasi fa nto yesiyo.” (Jobo 26:7) Bibele hape ibulela kuli lifasi ki la laundi. (Isaya 40:22) Batu babañata baikutwa kuli litaba zene bañozi bañoli ba Bibele zeo zenepahalile, libonisa kuli bañoli bao nebañola litaba zezwa ku Mulimu.

•   Bibele ialaba lipuzo zeñata zetaata, ili lipuzo zeeza kuli, haiba lisaalabiwi hande, mutu wakona kukalisa kulumela kuli hakuna Mulimu. Ka mutala, lipuzo zecwale ka za kuli: Haiba Mulimu unani lilato lelituna mi ki yamaata kaufela, ki kabakalañi hakunani manyando ni bumaswe fa lifasi? Ki kabakalañi bulapeli habususuezanga batu kueza lika zemaswe isiñi zende?​—Tite 1:​16.