Ndwa ya Armagedoni ki ndwa ya mafelelezo ye mwahalaa mibuso ya batu ni Mulimu. Mibuso ye ni batu babaswalisana ni yona balwanisa Mulimu mane nihaiba ka nako ya cwale ka kuhana kubusiwa ki yena. (Samu 2:2) Ndwa ya Armagedoni ikafelisa puso ya batu.—Daniele 2:44.

 Linzwi la “Armagedoni” lifumaneha feela hañwi mwa Bibele, kwa Sinulo 16:16. Bupolofita bwa kwa Sinulo bubonisa kuli “malena ba lifasi kaufela” bakakubukanyezwa “hamoho kwa ndwa ya lizazi lelituna la Mulimu Yamaata Kaufela” kwa “sibaka sesibizwa Armagedoni ka Siheberu.”—Sinulo 16:14.

 Ki bo mañi babaka lwana fa ndwa ya Armagedoni? Jesu Kreste ukaetelela mpi ya kwa lihalimu mi bakatula lila za Mulimu. (Sinulo 19:11-16, 19-21) Lila zeo likopanyeleza babalwanisa puso ya Mulimu ni baba mushwaula.—Ezekiele 39:7.

 Kana ndwa ya Armagedoni ikalwanelwa kwa libaka ze kwa upa wa liwate la Mediteranea luli? Batili. Ndwa ya Armagedoni haina kulwanelwa mwa sibaka feela silisiñwi, kono ikaba ya mwa lifasi kaufela.—Jeremia 25:32-34; Ezekiele 39:17-20.

 Linzwi la Armagedoni fokuñwi litolokiwanga sina “Harmagedoni” (mwa Siheberu Har Meghid·dohnʹ), lelitalusa “Lilundu la Megido.” Megido neli muleneñi wa mwa linako za Isilaele wa kwaikale. Litaba za kwamulaho libonisa kuli neli sibaka kone kulwanelwanga lindwa zetuna, kukopanyeleza cwalo ni lindwa zeñwi zebulezwi mwa Bibele. (Baatuli 5:19, 20; 2 Malena 9:27; 23:29) Nihakulicwalo, Armagedoni haikoni kuba sibaka luli sesiinzi bukaufi ni Megido ya kwaikale. Teñi ko hakuna lilundu lelituna, mi batu kaufela babalwanisa Mulimu habakoni kukwana mwa Musindi wa Jizireele. Kono ka nako ya ndwa ya Armagedoni, mibuso yemaata ya lifasi ikakopana hamoho kulwanisa Mubuso wa Mulimu.

 Lika likaba cwañi ka nako ya ndwa ya Armagedoni? Nihaike kuli haluzibi kuli Mulimu ukaitusisa cwañi maata ahae, mwendi ukaitusisa lika zanaaitusisize kwamulaho, zecwale ka pula ya simbwewewe, zikinyeho yetuna ya lifasi, kunelisa ñundupula, mulilo ni sulufula, lumonyi, ni kunata batu ka matuku. (Jobo 38:22, 23; Ezekiele 38:19, 22; Habakuki 3:10, 11; Zakaria 14:12) Lila za Mulimu likalyanganeha, mi babañwi kubona bakakala kubulayana, kono kwa mafelelezo, bakaziba kuli ki Mulimu yasweli kubalwanisa.—Ezekiele 38:21, 23; Zakaria 14:13.

 Kana ndwa ya Armagedoni ikasinya lifasi? Haina kusinya lifasi kakuli Mulimu ulufile lona kuli lupile fateñi kuya kuile. (Samu 37:29; 96:10; Muekelesia 1:4) Ndwa ya Armagedoni haina kuyundisa batu kaufela kono ika bapilisa kakuli “buñata bobutuna bwa batu” bwa batanga ba Mulimu bakapunyuha.—Sinulo 7:9, 14; Samu 37:34.

 Mwa Bibele, fokuñwi linzwi la “lifasi” litalusa batu babamaswe babasa lati kuutwa Mulimu. (1 Joani 2:15-17) Ka kuya ka taluso ye, ndwa ya Armagedoni “ikafelisa lifasi.”—Mateu 24:3, Bibele ya King James Version.

 Ndwa ya Armagedoni ikaba teñi lili? Jesu naabulezi cwana hanaatalusa za “ñalelwa yetuna” yekatatamiwa ki ndwa ya Armagedoni: “Haili ka za lizazi ni nako yeo, hakuna yaliziba, ibe mangeloi a mwa mahalimu kamba Mwana, konji Ndate alinosi.” (Mateu 24:21, 36) Nihakulicwalo, Bibele ibonisa kuli Armagedoni ikaba teñi ka nako ya kubateñi kwa Jesu, mi nako yeo ikalile ka silimo sa 1914.—Mateu 24:37-39.