“Tumelo ki sepo yetiile ya zelibelezwi, ki bupaki bobukolwisa bwa lika za niti zesabonwi.”—Maheberu 11:1, Bibele ya Toloko ya Lifasi Lelinca.

 “Tumelo ki kusepa ka kutiya lika zelibelezwi, bupaki bwa lika zesabonwi.”—Maheberu 11:1, King James Version.

 Timana ya mwa Bibele ye, italusa hande tumelo mi ibonisa kuli kuba ni tumelo hakutalusi kulumela feela litaba kusina bupaki.

 “Tumelo ki sepo yetiile ya zelibelezwi.” Mwa puo ya kwa makalelo mone liñozwi liñolo la Maheberu 11:1, linzwi la Sigerike lelitolokilwe kuli “tumelo” litalusa kuba ni buikolwiso, kusepa, kamba kukolwiswa kuli taba yeñwi ki ya niti. Tumelo yecwalo haisika toma fa litaba za kuikumbuta feela; kono itomile fa “sepo yetiile.” Linzwi la Sigerike lelitolokilwe kuli “sepo yetiile” a hape likona kutolokiwa kuli “liñolo la bupaki,” ili nto yefa bupaki bobutiile kamba sepo ku mutu yanani yona.

 “Tumelo ki . . . bupaki bobukolwisa bwa lika za niti zesabonwi.” Tumelo itomile fa bupaki bobukolwisa. Bupaki bo, butiile mi bukona kukolwisa mutu kuli nto yeñwi ki ya luli niha sakoni kuibona.

 Buka ya Bibele ya Maheberu ki liñolo leo muapositola Paulusi naañolezi Bakreste ba mwa linako za baapositola bane bapila mwa Jerusalema ni mwa libaka zene potolohile Jerusalema. Mwa kalulo ya liñolo ye, Paulusi utalusa butokwa bwa kuba ni tumelo. Ka mutala, naañozi kuli: “Hakusina tumelo hakukonahali kutabisa Mulimu, kakuli mutu kaufela yaatumela Mulimu uswanela kulumela kuli uteñi mi ki yena yafa mupuzo ku babatukufalezwi kumubata.” (Maheberu 11:6) Hamulaho wa kubulela zeitalusa tumelo kwa Maheberu 11:1, Paulusi utalusa mitala ya baana ni basali bababulezwi mwa Bibele bane babonisize kalemeno ka. Utalusa ka butungi mone baboniselize tumelo yabona ka kueza lika zenezamaelela ni tato ya Mulimu.—Maheberu 11:4-38.