LITIMANA ZA MWA BIBELE ZETALUSIZWE

Mateu 6:33—“Mubate Pili Mubuso wa Mulimu”

MUBAPALE

“Cwale muzwelepili kubata pili Mubuso ni kuluka kwahae, mi lika zeñwi zeo kaufela muka liekelezwa kwateñi.”—Mateu 6:33, Bibele ya Toloko ya Lifasi Lelinca.

“Kono mubate pili Mubuso wa Mulimu ni kuluka Kwahae, mi lika zeo kaufela muka liekelezwa kwateñi.”—Mateu 6:33, Bibele ya New King James Version.

Taluso ya Liñolo la Mateu 6:33

Mubuso wa Mulimu ki mulonga o kwa lihalimu okatahisa kuli tato ya Mulimu iezwe fa lifasi. (Mateu 6:9, 10) Mutu ubonisa kuli ubata pili Mubuso wa Mulimu mwa bupilo bwahae ka kuisa hahulu pilu kwateñi. a Mi kueza cwalo hakuami feela kuituta za Mubuso wa Mulimu, kono hape kuama kutaluseza babañwi lika zende zeuka peta. (Mateu 24:14) Mutu yabata Mubuso wa Mulimu hape ukalapela za kuli utahe.—Luka 11:2.

Kuluka kwa Mulimu kukopanyeleza lika zaanga kuba zelukile ni zesika luka. (Samu 119:172) Kacwalo, mutu ubonisa kuli ubata kuluka kwa Mulimu ka kupila ka kulatelela likuka za Mulimu zeama muzamao, ili zetusa kamita.—Isaya 48:17.

Manzwi a kuli lika zeo kaufela muka liekelezwa kwateñi ki sepiso yebonisa kuli Mulimu ukababalela batu kaufela bababata pili Mubuso wahae mwa bupilo bwabona ni babatabela kupila ka likuka zahae.—Mateu 6:31, 32.

Litaba zeñwi zeswalisana ni litaba ze kwa Mateu 6:33

Jesu naabulezi manzwi a, mwa ngambolo yebizwa kuli Ngambolo ya fa Lilundu, yefumaneha kwa Mateu likauhanyo 5 kuisa 7. Kusina kukakanya, buñata bwa batu bane bateeleza kwa ngambolo ya Jesu ye neli babotana. Mwendi nebaikutwa kuli nebatokwa kuisa hahulu pilu kwa kubata mone bakaipiliseza mi nebasina nako ya kubata pili Mubuso. Kono Jesu naabasusuelize kutalimisisa mo Mulimu ababalelela limela ni lifolofolo. Mulimu usepisa kuli ukaeza cwalo ni kwa batu bababata pili Mubuso wahae.—Mateu 6:25-30.

Mibonelo Yefosahezi ka za Liñolo la Mateu 6:33

Mubonelo ofosahezi: Mutu yabata Mubuso wa Mulimu ukafuma.

Niti ya Taba: Jesu naabulezi kuli batu bababeya za Mubuso wa Mulimu mwa sibaka sapili bakafumana zebatokwa, zecwale ka lico ni liapalo. (Mateu 6:25, 31, 32) Nihakulicwalo, naasika sepisa batu kuli bakapila bupilo bwa mbombolelwa kamba kuli Mulimu uka bafuyaula ka kubafa sifumu sesiñata. Kono mane Jesu naalemusize batu bane bateeleza ku yena kuli basike baipatela sifumu, ili nto yekona kupaleliswa mutu kubata pili Mubuso wa Mulimu. (Mateu 6:19, 20, 24) Muapositola Paulusi naasebelize ka taata kuli azwisezepili Mubuso wa Mulimu, kono ka linako zeñwi, naasabangi ni lika zanaatokwa kwa mubili. Sina Jesu, Paulusi ni yena naalemusize batu ka za butata bobukona kutahiswa ki kubata sifumu.—Mafilipi 4:11, 12; 1 Timotea 6:6-10.

Mubonelo ofosahezi: Bakreste habaswaneli kusebeza kuli bafumane za kuipilisa ka zona.

Niti ya Taba: Bibele ibonisa kuli Bakreste baswanela kusebeza kuli bafumane zebatokwa kwa mubili ni zelutokwa lubasi lwabona. (1 Matesalonika 4:11, 12; 2 Matesalonika 3:10; 1 Timotea 5:8) Jesu naasika bulela kuli balateleli bahae baswanela kubata feela Mubuso, kono naabulezi kuli baswanela kubata pili Mubuso.

Batu bababata pili Mubuso wa Mulimu ni babasebezanga kuli bafumane zebatokwa kwa mubili banani buikolwiso bwa kuli Mulimu uka batusa kufumana lika zeo.—1 Timotea 6:17-19.

a Manzwi ali, “muzwelepili kubata” atolokilwe fa linzwi la Sigerike lelitalusa kezo, lelitalusa kuzwelapili kueza nto yeñwi, mi hape linzwi leo likona kutolokiwa kuli “musike mwatuhela kubata.” Kacwalo, batu baswanela kubata pili Mubuso isike feela ka nakonyana, kono ka nako kaufela.