Isaya 32:1-20
32 Hamubone! Mulena+ ukabusa ka kuluka,+Mi manduna bakabusa ka kuya ka katulo yelukile.
2 Mi yomuñwi ni yomuñwi ukaba sina sisabelo* hakufuka moya,Abe sina makundamo* hakunani pula ya liñungwa,Sina linukana za mezi mwa naha yesina mezi,+Ni sina muluti wa licwe lelituna mwa naha yeomile.
3 Cwale meeto a bababona haasana kukwaliwa,Mi mazebe a babautwa akateeleza.
4 Pilu ya bababubebe ikanahana litaba za zibo,Mi lulimi lwa babakukuma lukabulela litaba zeutwahala hande.+
5 Mutu wa sitoto hasana kubizwa kuli wafana,Mi mutu yasasepahali haana kubizwa kuli wakutekeha;
6 Kakuli mutu wa sitoto ukabulela litaba zesina tuso,Mi pilu yahae ikalela lika zemaswe,+Kuli asusueze babañwi kuba bakwenuheli* ni kubulela litaba zekeluhile zelwanisa Jehova,Kutahisa kuli yashwile tala asike afepiwaNi kutima yashwile linyolwa sa kunwa.
7 Milelo ya mutu yasasepahali imaswe;+Ususueza babañwi kuba ni muzamao oswabisaKuli asinyeze mubotana ka kubulela litaba za buhata,+Mubotana nihaka bulela litaba zelukile.
8 Kono mutu yafana unani milelo ya bufani,Mi uzwelapili kutusa babañwi ka bufani bwahae.*
9 “Mina basali babasa isi pilu kwa lika, hamuyeme mi muteeleze kwa linzwi laka!
Mina bana babasizana babasina lipilaelo,+ muutwe zenibulela!
10 Hamulaho feela wa silimo, mina babasina lipilaelo mukangangama,Kakuli hamulaho wa kutulo ya miselo ya veine, hakuna muselo okakutulwa.+
11 Mina basali babasa isi pilu kwa lika, hamukuñe!
Mungangame, mina babasina lipilaelo!
Hamutubule liapalo zamina,Mi muitame masila a saka mwa liteka zamina.+
12 Muinate fa lifuba inze mulilaKabakala masimu alakazeha ni likota za veine zebeya hahulu.
13 Kakuli miutwa ni mikakani likakwahela naha ya sicaba saka;Likakwahela mandu kaufela a tabo,Likwahele muleneñi wa minyaka.+
14 Kakuli tawala yesilelelizwe iyubekilwe;Muleneñi olilata usiilwe.+
Ofele+ ni tawala ya mulibeleli lifetuhile matota a kamita,Ili mabapalelo a limbongolo za mwa naheñi,Ni mafulelo a mitapi,+
15 Kufitela moya usululelwa fahalimwaa luna kuzwa kwahalimu,+Ni lihalaupa lifetuha simu ya likota zebeya miselo,Mi simu ya likota yeo iingiwa kuli ki mushitu.+
16 Katulo yelukile ikaina mwa lihalaupa,Mi kuluka kukayaha mwa simu ya likota zebeya miselo.+
17 Kuluka kwa niti kukatahisa kozo,+Mi muselo wa kuluka kwa niti ikaba buiketo ni silelezo ka nako kaufela.+
18 Sicaba saka sikaina mwa sibaka sa kozo sesiinelezi,Mwa mandu atiile ni mwa mapumulelo a kozo.+
19 Kono pula ya macwe ikawisaka likota mwa mushitu,Mi muleneñi ukatubiwa.
20 Tabo ki yamina babacala peu kwatuko ni libaka za mezi kaufela,Babalukulula* poho ni mbongolo.”+
Litaluso ze kwatasi
^ Kamba “mukunda.”
^ Kamba “masabelo.”
^ Kamba “aeze lika ka kutokwa likute ku Mulimu.”
^ Kamba “ka misebezi yahae yeminde.”
^ Kamba “Babatamulula.”
