TUTO 17
Jesu ki Mutu Yacwañi?
Halunze luituta ka za lika zanaabulezi Jesu ni zanaaezize hanaali fa lifasi, lukalemuha kuli unani tulemeno totunde totutahisa kuli lusutelele ku yena ni ku Ndatahe, yena Jehova. Ki tufi totuñwi twa tulemeno to? Mi lukona kulikanyisa cwañi Jesu mwa bupilo bwaluna?
1. Jesu uswana cwañi ni Ndatahe?
Hanaali kwa lihalimu, Jesu naaitutile zeñata ku Ndatahe yalilato ka lilimo zeñata-ñata. Taba yeo itahisize kuli minahano, maikuto, ni likezo za Jesu liswane ni za Mulimu. (Mubale Joani 5:19.) Jesu ubonisa tulemeno twa Ndatahe ka nzila yeipitezi kuli mane naabulezi kuli: “Mutu kaufela yaniboni uboni ni Ndate.” (Joani 14:9) Hamunze munyakisisa tulemeno twa Jesu, mukaziba zeñata ka za Jehova. Ka mutala, mukekecima wanaabonisize Jesu kwa batu ulutusa kuutwisisa mwaikutwela Jehova ka za mañi ni mañi waluna.
2. Jesu ubonisize cwañi kuli walata Jehova?
Jesu naabulezi kuli: “Kono kuli lifasi lizibe kuli nilata Ndate, nieza sina mwanilaelezi Ndate.” (Joani 14:31) Hanaali fa lifasi, Jesu naabonisize kuli naalata hahulu Ndatahe ka kulatelela litaelo zahae niha nekuli taata kueza cwalo. Jesu hape naalata kutaluseza babañwi ka za Ndatahe ni kubatusa kuba balikani ba Mulimu.—Joani 14:23.
3. Jesu ubonisize cwañi kuli walata batu?
Bibele ibulela kuli Jesu ‘ulata hahulu batu.’ (Liproverbia 8:31, litaluso ze kwatasi) Naabonisize lilato leo ka kususueza batu ni kubatusa mwanaakonela kaufela. Naaezize limakazo zenebonisa kuli naanani maata ni mukekecima. (Mareka 1:40-42) Jesu naabonisanga batu sishemo mi naasa baketululangi. Zanaabulelanga neliomba-ombanga batu ba lipilu zende ni kubatusa kuba ni sepo. Jesu naaitombozi kunyanda ni kushwa bakeñisa kuli naalata batu kaufela. Kono Jesu ulata hahulu batu babalatelela lituto zahae.—Mubale Joani 15:13, 14.
MUBATISISE
Muitute zeñata ka za tulemeno twa Jesu. Munyakisise momukona kuboniseza lilato ni bufani sina Jesu.
4. Jesu walata Ndatahe
Zanaaezize Jesu lilutusa kuziba zelukona kueza kuli lubonise kuli lwalata Mulimu. Mubale Luka 6:12 ni Joani 15:10; 17:26. Hamulaho wa kubala leliñwi ni leliñwi la mañolo ao, munyakisise puzo yelatelela:
-
Lukona kubonisa cwañi kuli lwalata Jehova ka kulikanyisa Jesu?
Jesu naalata Ndatahe wa kwa lihalimu mi naaambolanga ni yena mwa tapelo hañata-ñata
5. Jesu uiyakatwa batu babatokwa tuso
Jesu naaisanga hahulu pilu ku zene batokwa babañwi kufita zanaatokwa yena. Niha naakatalanga, naaitusisanga nako ni maata ahae kutusa batu. Mubale Mareka 6:30-44, mi kihona mukanyakisisa lipuzo zelatelela:
-
Ka kuya ka taba yeo, ki mwa linzila mañi mo Jesu naabonisize kuli naaiyakatwa babañwi?—Mubone litimana 31, 34, 41, ni 42.
-
Ki kabakalañi Jesu hanaatusanga batu? —Mubone timana 34.
-
Taba ya kuli Jesu naabonisa tulemeno twa Ndatahe, ilulutañi ka za Jehova?
-
Ki mwa linzila mañi molukona kulikanyisa Jesu ka kuiyakatwa babañwi?
6. Jesu unani bufani
Nihaike kuli Jesu naasina lika zeñata, naanani bufani mi naalususuelize kuli lube ni bufani. Mubale Likezo 20:35, mi kihona mukanyakisisa puzo yelatelela:
-
Ka kuya ka zanaabulezi Jesu, ki lika mañi zekona kulutusa kuba ni tabo?
Mubuhe VIDIO, mi kihona mukanyakisisa puzo yelatelela.
-
Ki mwa linzila mañi molukona kubonisa bufani niha lusina lika zeñata?
Kana mwaziba?
Bibele iluluta kuli lulapelange ku Jehova ka kuitusisa libizo la Jesu. (Mubale Joani 16:23, 24.) Haluitusisa libizo la Jesu, lubonisa kuli lwaziba zapetile Jesu kuli alutuse kuba balikani ba Jehova.
BABAÑWI BABULELANGA KULI: “Mulimu haana taba ni manyando elukopana ni ona.”
-
Taba ya kuli Jesu ubonisa tulemeno twa Ndatahe, ibonisa cwañi kuli Jehova waluisa pilu?
LITABA KA BUKUSWANI
Jesu walata Jehova ni batu. Bakeñisa kuli Jesu waswana ni Ndatahe, hamunze muituta ka za Jesu, mukaziba zeñata ka za Jehova.
Mulundulule
-
Lukona kubonisa cwañi kuli lwalata Jehova sina mwanaaezelize Jesu?
-
Lukona kubonisa cwañi kuli lwalata batu sina mwanaaezelize Jesu?
-
Ki kalemeno kafi kemutabela hahulu kwa tulemeno twa Jesu?
MUBONE LITABA ZEÑWI
Munyakisise tulemeno totuñwi twa Jesu tolukona kulikanyisa.
“Kuli Mulikanyise Jesu, Mutokwa . . .” (Jesu ki Yena Nzila, Niti, ni Bupilo, likepe 317)
Munyakisise libaka halutokwa kulapelanga ka kuitusisa libizo la Jesu.
“Ki Kabakalañi Haluswanela Kulapela ka Libizo la Jesu?” (Tawala ya Mulibeleli, April-June, 2008)
Kana kunani zeibulela Bibele ka za mwanaabonahalela Jesu?
Luitutañi ku Jesu ka mwanaapilisanezi ni basali?
“Kubonisa Likute ka Kuetelelwa ki Mulimu” (Tawala ya Mulibeleli, September 1, 2012)
Hape Mwendi Mwakona Kutabela Litaba Ze
LIPUZO ZEBUZIWANGA HAÑATA
Tuto ya Bibele Yebazamaisanga Lipaki za Jehova ki Nto Mañi?
Hamunze muituta Bibele ni Lipaki za Jehova, mwakona kuitusisa toloko ya Bibele ifi kamba ifi yemutabela. Mulukuluhile kumema lubasi lwamina kaufela kamba mulikani wamina ufi kamba ufi kuli afumanehe kwa tuto yamina.
