Haiba luikauhanya kwa batu boluunga kuli bamaswe, luka baketulula hahulu. Mi haiba luitama feela bulikani ni batu babaswana ni luna, lwakona kukalisa kunahana kuli batu kaufela baswanela kunahana inge luna ni kueza lika moluezezanga luna.

“Mukwalule hahulu lipilu zamina.”​—2 MAKORINTE 6:13.

Timana ye ilulutañi? “Pilu” yaluna yebulezwi mwa timana ye ikona kutalusa maikuto aluna. Haiba luiyakatwanga feela batu babaswana ni luna, pilu yaluna ikakwaliwa. Kuli nto yeo isike yaezahala, luswanela kuba ni balikani babashutana ni luna.

Haluka ziba hande batu, lukautwisisa libaka habaezanga lika ka nzila yeshutana ni yaluna. Mi silikani saluna ni bona hasinze sihula, lukabaanga sina batu boluswana ni bona. Lukaitebuha lika zebaeza mi lukataba ni bona ni kuikutwa bumaswe habakopana ni miinelo yetaata.

Halunyakisiseñi mutala wa bo Nazaré. Nebaketululanga batu babazwa kwa linaha lisili. Bo Nazaré batalusa zebatusize, bali: “Nakala kutandanga nako ni bazwahule ni kusebeza ni bona. Nenikopani ni bazwahule babanani lipilu zende, ili kushutana ni litaba za buhata zene babulelanga batu mwa silalanda. Hamuitama silikani ni mutu yanani sizo sesishutana ni samina, mukaituta kusaketululanga  sikwata sa batu bakeñisa zebabulela babañwi, mi muka balata ni kuitebuha zebaeza ka butu.”

Mubatange kolo ya kuambola ni batu babazwa kwa naha isili, ba mushobo usili, kamba bababulela puo isili. Mwakona

• Kubakupa kuli bamitaluseze bupilo bwabona.

• Kubamemela kwa sico.

• Kuteeleza kwa makande abona kuli muzibe lika zebaanga kuba za butokwa.

Haiba mulika kuutwisisa kuli zeezahezi ku bona mwendi litahisize kuli baezange lika ka nzila yeñwi, mukaba ni mubonelo omunde ka za sikwata sa batu sebazwa ku sona.