Buikuhumuso bwakona kutahiseza mutu kuketulula babañwi. Mutu yaikuhumusa uikutwanga kuli mayemo ahae apahami hahulu. Uikunga kuli ki wa butokwa hahulu mi uunga batu babashutana ni yena kuli haki ba butokwa kumufita. Mañi ni mañi wakona kukalisa kunahana cwalo. Buka ya Encyclopædia Britannica ili: “Batu ba lizo zetushutana-shutana babanga ni mibonelo yebato swana ya kuli mupilelo wabona, lico zabona, mutinelo wabona, mikwa yabona, litumelo zabona, likuka zebalatelela mane ni zeñwi cwalo, ki za butokwa hahulu kufita za batu ba lizo zeshutana ni zabona.” Lukona kuambuka cwañi mubonelo ofosahezi wo?

“Ka kuba ni buikokobezo muunge babañwi kuli bamifita.”—MAFILIPI 2:3.

Timana ye ilulutañi? Kuli lusike lwaikuhumusa, lutokwa kuikataza kuba ni buikokobezo. Kuikokobeza kulutusa kulemuha kuli batu babañwi balufita mwa linzila zeñwi. Hakuna sikwata silisiñwi sa batu sesifita likwata za batu babañwi mwa linzila kaufela.

 Halunyakisiseñi mutala wa bo Stefan. Nebahulezi mwa naha mone kupila batu bane batoile bazwahule, kono hasamulaho nebacincize mubonelo wabona. Bo Stefan bali: “Kuunga babañwi kuli ki ba butokwa kulufita kwakona kulutusa kusa baketulula. Hanizibi lika kaufela. Kacwalo, nakona kuituta sesiñwi ku mutu kaufela.”

Mube ni mubonelo oswanela ka za mina beñi, mi muzwelepili kulemuhanga bufokoli bwamina. Muhupulange kuli kunani lika zebakona kueza hande babañwi kumifita. Musike mwanahananga kuli batu kaufela babasimuluha mwa sikwata sesiñwi banani bufokoli bobuswana.

Mwa sibaka sa kuatula mutu bakeñisa mosiingelwa sikwata sa batu bazwa ku sona, muipuze kuli:

• ‘Kana mikwa yenitoile ya mutu yo imaswe luli kamba yashutana feela ni yaka?’

• ‘Kana mutu yo wakona kulemuha bufokoli bwaka?’

• ‘Mutu yo unifita mwa linzila lifi?’

Haiba mualaba lipuzo zeo ka kusepahala, mukatuhela kuketulula batu mi hape mukalata mikwa yabona yeminde.