SEPO KI . . . YA BUTOKWA KULI LUBE NI SILIKANI SESINDE NI MULIMU, mi ki yona feela yekona kulutusa ka nako yeluikutwa kuziyeleha, ka nako yeluikutwa buinosi, kamba halunani sabo yeñwi.”—Buka yebizwa Hope in the Age of Anxiety.

Mwa Bibele, kunani litaba zebonisa kuli batu batabela hahulu kuba ni sepo, mi hape Bibele ilueleza kuli lusike lwasepa lika za buhata. Samu 146:3 ibulela kuli: “Musike mwasepa manduna kamba kusepa mwanaa mutu, yasakoni kupilisa.” Kufita kusepa zebaeza batu ka mulelo wa kuli balupilise, luswanela kusepa Mubupi waluna yanani maata a kutaleleza lisepiso zahae kaufela. Ki lika mañi zalusepisize Mulimu? Munyakisise lisepiso zelatelela.

BUMASWE BUKAFELA; MI BABALUKILE KIHONA BAKAIKOLA KOZO YA KUYA KUILE: Liñolo la Samu 37:10, 11 libulela kuli: “Kusiyezi feela nakonyana, mi babamaswe habasana kubateñi . . . Kono babaishuwa bakaluwa lifasi, mi bakataba hahulu kabakala kozo yetuna.” Mi timana 29 iekeza kubulela kuli ‘babalukile bakapila kuya kuile’ fa lifasi.

LINDWA LIKAFELA: “Jehova . . . ufelisa lindwa mwa lifasi kamukana. Uloba buta ni kupumaka lilumo; ucisa likoloi za ndwa ka mulilo.”—Samu 46:8, 9.

MATUKU, MANYANDO, KAMBA LIFU LIKAFELA: “Tende ya Mulimu iinzi ni batu . . . Ukatakula miyoko kaufela kwa meeto abona, mi lifu halisana kubateñi, nihaiba kutahelwa ki maswabi kamba kulila kamba kuutwa butuku.”—Sinulo 21:3, 4.

LICO LIKABA ZEÑATA MI LIKAKWANA BATU KAUFELA: “Kukaba ni bubeke bobuñata mwa lifasi; bukaba bobuñata hahulu fahalimwaa malundu.”—Samu 72:16.

KUKABA NI MUBUSO ULIMUÑWI MWA LIFASI KAUFELA OKABUSA KA KULUKA—MUBUSO WA KRESTE: “[Jesu Kreste] afiwa bulena, likute, ni mubuso, kuli batu kaufela, macaba kaufela, ni ba lipuo kaufela bamusebeleze. Bulena bwahae ki bulena bwa kuya kuile bobusike bwafela, mi mubuso wahae hauna kusinyiwa.”—Daniele 7:14.

Lukona kuikolwisa cwañi kuli lisepiso zeo likatalelezwa luli? Hanaali fa lifasi, Jesu naabonisize hande kuli waswanela kuba Mulena. Naafolisanga bakuli, naafepanga babotana, mi naazusanga bafu. Mane sa butokwa ni kufita neli lituto zanaalutanga, ili zebonisa likuka zekatusa batu kupila hamoho kuya kuile ka kozo ni ka swalisano. Jesu hape naapolofitile zeneka ezahala kwapili, kukopanyeleza cwalo ni likezahalo zeneka bonisa kuli lifasi selili mwa mazazi a mafelelezo.

Jesu naapolofitile kuli mwa mazazi a mafelelezo, nekusike kwaba ni kozo ni buiketo, kono nekukaba ni miinelo yetaata! Zeñwi za lika zeli “sisupo sa nako ya kufela kwa lifasi” likopanyeleza lindwa za mwa lifasi kaufela, kutaela kwa lico, matuku ayambukela, ni lizikinyeho zetuna za lifasi. (Mateu 24:3, 7; Luka 21:10, 11; Sinulo 6:3-8) Jesu hape naabulezi kuli: “Kabakala kuekezeha kwa bumaswe, lilato la babañata likafola.”—Mateu 24:12.

Sina mwanaapolofitezi muñoli yomuñwi wa Bibele, kufola kwa lilato la babañata kwaiponahalela mwa linzila zeñata. Kwa liñolo la 2 Timotea 3:1-5, lubala kuli, “mwa mazazi a mafelelezo,” batu babañata nebakaba baitati, babalata masheleñi, ni minyaka. Nebaka ikutwisisa mi nebakaba ni buhali. Mabasi naasike alatana, mi bana nebasike bautwa bashemi babona. Batu bababonahala kuba balumeli nebasike bapila sina balumeli.

Miinelo yemaswe yeo ibonisa kuli lifasi le, lituha lifela. Hape ibonisa kuli Mubuso wa Mulimu okatahisa kuluka utuha ubusa lifasi. Jesu hape naabulezi litaba zelufa sepo mwa bupolofita bwahae ka za mazazi a mafelelezo, naaize: “Taba yende ye ya Mubuso ikakutazwa mwa lifasi kaufela kuli ibe bupaki kwa macaba kaufela, kihona kukataha mafelelezo.”—Mateu 24:14.

Taba yende yeo ifa temuso kwa batu babamaswe ni sepo kwa batu babalukile, ili kukolwisa babalukile kuli limbuyoti zebasepisizwe lituha litalelezwa. Kana mwatabela kuituta zeñata ka za limbuyoti zeo? Haiba mwatabela, mubale litaba zeñozwi fa likepe lelitatama.