Hamubata kuziba mutu yomuñwi, hañata mukalanga ka kumubuza kuli: “Ki mina bo mañi?” Hane mukabuza Mulimu puzo yeo, naakaalaba cwañi?

“Ki na Jehova. Ki lona libizo laka.”—Isaya 42:8.

Libizo leo ki la butokwa ku Mulimu. Hakuna mutu yanaabeile Mulimu libizo; ki yena yanaaipeile lona. Jehova naabulezi kuli: “Le ki lona libizo laka kuya kuile, mi nikahupulwa ka lona mwa masika asataha.” (Exoda 3:15) Mwa Bibele, libizo la Mulimu lifumaneha hahulu kufita malumbatina ahae acwale ka Yamaata Kaufela, Ndate, Mulena, kamba Mulimu, mi lifumaneha hahulu kufita mabizo a batu acwale ka Abrahama, Mushe, Davida, kamba Jesu. Hape tato ya Jehova ki ya kuli libizo lahae lizibahale. Bibele ibulela kuli: “Haike batu bazibe kuli wena, wa libizo la Jehova, ki wena unosi Yapahami ka Kufitisisa fahalimwaa lifasi kaufela.”—Samu 83:18.

Libizo leo ki la butokwa ku Jesu. Mwa tapelo yebabizanga batu babañata kuli Tapelo ya Mulena, Jesu naalutile balateleli bahae kuli bakupange Mulimu ka kubulela kuli: Libizo lahao likeniswe.” (Mateu 6:9) Mane Jesu naalapezi ku Mulimu kuli: “Ndate, kanyisa libizo lahao.” (Joani 12:28) Mwa bupilo bwahae kaufela, Jesu naanga kukanyisa libizo la Mulimu kuba kwa butokwa hahulu, kona libaka hanaalapezi kuli: “Nizibahalize libizo lahao ku bona mi nika lizibahaza.”—Joani 17:26.

Libizo leo ki la butokwa ku babaziba Mulimu. Batanga ba Mulimu ba kwamulaho nebatokwa kuziba libizo la Mulimu leliipitezi kuli basilelezwe ni kupiliswa. “Libizo la Jehova ki tawala yetiile. Mutu yalukile umatela mwateñi mi wasilelezwa.”  (Liproverbia 18:10) “Mutu kaufela yabiza fa libizo la Jehova ukapiliswa.” (Joele 2:32) Bibele ibonisa kuli libizo la Mulimu nelikatahisa kuli kuzibahale babamusebeleza ni babasa musebelezi. “Kakuli macaba kaufela akazamaya, sesiñwi ni sesiñwi ka libizo la mulimu wasona, kono luna lukazamaya ka libizo la Jehova Mulimu waluna kamita ni kuya kuile.”—Mika 4:5; Likezo 15:14.

Libizo la Mulimu litaluhanya Mulimu kwa milimu yemiñwi. Licaziba babañata babulela kuli libizo la Jehova litalusa kuli “Utahisa Kubateñi.” Jehova Mulimu naatalusize zelitalusa libizo lahae hanaabulezi ka za hae ku Mushe kuli: “Nikaba Senika Keta Kuba Sona.” (Exoda 3:14) Kacwalo, libizo la Mulimu litalusa zeñata kufita feela taba ya kuli ki Mubupi wa lika kaufela. Libizo lahae libonisa kuli unani buikoneli bwa kuba nto ifi kamba ifi kamba kutahisa kuli pupo yahae ibe nto ifi kamba ifi kuli apete mulelo wahae. Nihaike kuli malumbatina akona kubonisa buikalabelo, situlo, kamba maata a Mulimu, libizo la Jehova ki lona feela lelibonisa kuli ki mañi luli ni kuli ki lika mañi zakona kueza.

Libizo leo libonisa kuli Mulimu walulata. Taluso ya libizo la Mulimu ibonisa kuli walata pupo yahae kaufela, kukopanyeleza cwalo ni luna. Kuzwa fo, taba ya kuli Mulimu uzibahalize libizo lahae ibonisa kuli ubata kuli lumuzibe. Mi mane ulutaluselize libizo lahae lusika ziba kale kuli lwakona kumubuza ka za lona. Kaniti, Mulimu ubata kuli lumuunge kuli uteñi luli ni kuli lwakona kusutelela kuyena, isiñi kumuunga kuli ki mulimu wa maswaniso kamba kuli ki nto yesiyo.—Samu 73:28.

Kuitusisa libizo la Mulimu kubonisa kuli lwamulata. Ka mutala, mwakona kubulelela mutu yomubata kuli abe mulikanaa mina kuli amibizange ka kuitusisa libizo lamina la sipepo. Mukona kuikutwa cwañi haiba mutu yo azwelapili kusaitusisa libizo lamina leo? Hamulaho wa nako, mukana mwakakanya haiba mutu yo luli naabata kuba mulikanaa mina. Ki nto yeswana ni ku Mulimu. Jehova ubulelezi batu libizo lahae mi ulususueza kuli luitusisange lona. Haluitusisa libizo la Mulimu, lubonisa kuli lubata kuba balikani bahae. Kakuli mane Mulimu walemuha “babakengeyela [kamba, “babaitebuha,” litaluso ze kwatasi] libizo lahae”!—Malaki 3:16.

Kuituta za libizo la Mulimu ki yona nto yapili yekona kumitusa kumuziba. Kono luswanela kuzwelapili kuituta zeñwi ka za hae. Luswanela kuziba kuli Mulimu ki mañi luli, mi lutokwa kuziba kuli ucwañi luli.