Batu babañata kacenu mwa lifasi habana hande za kuca ni mandu a kupila ku ona. Babañwi ku bona batokwa kutalusezwa kuli kwapili lika likaba hande. Mulimu uka lufuyaula haiba lutusa batu babacwalo.

“Yashemuba mubotana ukolotisa Jehova, mi Yena uka mukutiseza kabakala saezize.”—LIPROVERBIA 19:17.

Jesu naakandekile likande la muuna yanaanatilwe ki masholi ni kusiiwa mwa nzila inze awelezi. (Luka 10:29-37) Mutu yomuñwi yanaafita feela mwa nzila atusa muuna yo yanaaholofezi maswe. Muuna yo naatusize muuna yanaaholofezi nihaike kuli yena naasimuluha kusili.

Muuna yasishemo yo naalafile litombo za muuna yo yanaaholofezi, naamutusize kufumana makundamo, mi hape naamuomba-ombile, ili nto yene tahisize kuli muuna yo aikutwe hande.

Luitutañi kwa likande leo? Jesu naaluluta tuto ya butokwa ya kuli, luswanela kutusanga babañwi ka kueza zelukona. (Liproverbia 14:31) Mañolo Akenile alutusa kuziba kuli kwapilinyana, Mulimu ukafelisa bubotana ni manyando. Kono mwendi lwakona kuipuza kuli, Mulimu ukaeza cwañi cwalo mi ukaeza cwalo lili? Mwa taba yetatama, lukanyakisisa lika zende zaka mifa Mubupi wamina kwapili.