BUKA ya Evangeli ya Mateu ibulela kuli, “Jesu akena mwa tempele mi alelekela kwande batu kaufela bane balekisa ni bane baleka mwa tempele, mi afetaula litafule za babacinca masheleñi ni lipula za babalekisa maiba. Mi ali ku bona: ‘Kuñozwi kuli, “Ndu yaka ikabizwa ndu ya tapelo,” kono mina muifetula makundamo a masholi.’”—Mat. 21:12, 13.

Litaba zakale za Sijuda libonisa kuli batu bane balekisanga mwa tempele nebaputelelanga baleki ka kutulisa hahulu mileko yabona. Ka mutala, litaba zakale za Sijuda zebizwa Mishnah (Keritot 1:7), libonisa kuli ka nako yeñwi mwa miteñi ya baapositola, teko ya linkwilimba zepeli zenekona kufiwa sina sitabelo neitulile hahulu kuli neilikana ni dinari ya gauda. Masheleñi ao naalikana ni tuwelo yanaakona kubelekela mubeleki-beleki feela mwa mazazi a 25. Babotana nebakona kufa matabelo a linkwilimba kamba maiba; kono nihaiba zona linyunywani zeo nese litula hahulu kuli mane nebasa koni kulileka. (Liv. 1:14; 5:7; 12:6-8) Muluti yabizwa Simeon ben Gamaliel, naanyemile hahulu kabakala muinelo wo, kuli mane akusufaza kwa palo ya matabelo anaalukela kufiwa, ili taba yenetahisize kuli linkwilimba zepeli lilekwe fa teko yecipile hahulu-hulu.

Litaba zebulezwi fahalimu zeo, libonisa libaka hane kuswanela kuli Jesu abize batu bao bane balekisa mwa tempele kuli ki “masholi,” kakuli nebanani buputeleli ni mukwañuli.