1. Ki ifi katulo yetuha iezahala?

 LUPILA ka nako fokuka bela ni licinceho zetuna! Honacwale-cwale fa, Jesu ukaatula batu kaufela babapila fa lifasi. Jesu naabulezi za nako yelibisa kwa katulo yeo ka kufa balutiwa bahae “sisupo” sa bupolofita bobubonisa nako ya kubateñi kwa hae asabonwi ni nako ya “kufela kwa lifasi.” (Mat. 24:3) Bupolofita bo, buñozwi kwa Mateu kauhanyo 24 ni 25 ni kwa Mareka kauhanyo 13 ni Luka kauhanyo 21.

2. Ki lika mañi zeluka nyakisisa mwa taba ye, mi kueza cwalo kuka lutusa cwañi?

² Jesu naafile litemuso zende ka kuitusisa linguli zetaalu. Linguli zeo ki, nguli ya lingu ni lipuli, nguli ya basizana babanani kutwisiso ni ba likuba, ni nguli ya litalenta. Nguli ni nguli ilutusa kuutwisisa mo zaeza mutu likaamela mwakaatulelwa. Halunze lunyakisisa linguli ze, luswanela kulemuha lituto zeluituta ni kubona molukona kulisebeliseza. Nguli yapili yeluka nyakisisa ki ya lingu ni lipuli.

LINGU NI LIPULI

3. Jesu ukaatula lili batu?

³ Mwa nguli ya lingu ni lipuli, Jesu utalusa katulo ya batu babanani kolo ya kuamuhela taba yende ni kutusa banyani bahae babatozizwe. (Mat. 25:​31-46) Ukaatula batu bao ka nako ya “ñalelwa yetuna,” pili ndwa ya Armagedoni isika kalisa kale. (Mat. 24:21) Sina feela mulisana haketanga lingu mwahalaa lipuli, Jesu ukaketahanya batu babatusa ka busepahali balateleli bahae babatozizwe mwahalaa babasa ezi cwalo.

4. Ka kuya ka Isaya 11:​3, 4, ki kabakalañi halukona kukolwa kuli Jesu ukaatula batu ka kuluka? (Mubone ni siswaniso.)

 ⁴ Bupolofita bwa mwa Bibele bubonisa kuli Jesu, ka kuba Muatuli yaketilwe ki Jehova, kamita ukaatula batu ka kuluka. (Mubale Isaya 11:​3, 4.) Utalimisisa ka tokomelo muzamao, mubonelo, ni lipulelo za batu—kukopanyeleza cwalo ni mobaezeza babatozizwe. (Mat. 12:​36, 37; 25:40) Jesu ukaziba batu bane bayemezi banyani bahae babatozizwe ni kubatusa mwa musebezi wabona. a Yeñwi ya linzila za butokwa hahulu ili zeo babaswana sina lingu bakona kuyemela ka zona banyani ba Kreste ki ka kubatusa mwa musebezi wa kukutaza. Baba batusa ka nzila ye bakaatulwa kuba “babalukile” mi bakaba ni kolo ya kufumana “bupilo bobusa feli” fa lifasi. (Mat. 25:46; Sin. 7:​16, 17) Wo ki mupuzo omunde hahulu kwa batu babazwelapili kusepahala! Haiba bazwelapili kusepahala ka nako ya ñalelwa yetuna ni hasamulaho, mabizo abona akazwelapili kuba mwa “buka ya bupilo.”—Sin. 20:15.

5. Ki tuto mañi yeluituta kwa nguli ya lingu ni lipuli, mi ki bo mañi babakona kutusiwa ki yona?

⁵ Mubonise kuli mwasepahala. Nguli ya Jesu ya lingu ni lipuli sihulu iama kwa batu babanani sepo ya kuto pila fa lifasi. Babonisa tumelo yabona isiñi feela ka kutusa banyani ba Kreste mwa musebezi wa kukutaza kono hape ni ka kulatelela ka busepahali ketelelo ya sikwatanyana sa Bakreste babatozizwe babaketilwe ki Jesu. (Mat. 24:45) Kono babanani sepo ya kuyo pila kwa lihalimu ni bona batokwa kuutwa temuso ye mwa nguli ye. Kabakalañi? Bakeñisa kuli Jesu walemuha muzamao wabona, mubonelo, ni lipulelo. Ni bona baswanela kubonisa kuli basepahala. Mane Jesu naafile linguli zeñwi zepeli kwa Bakreste babatozizwe, mokunani litemuso zenongile. Lufumana linguli zeo kwa Mateu kauhanyo 25. Cwale halunyakisiseñi nguli ya basizana babanani kutwisiso ni ba likuba.

BASIZANA BABANANI KUTWISISO NI BA LIKUBA

6. Basizana baketalizoho nebabonisize cwañi kuli banani kutwisiso? (Mateu 25:​6-10)

⁶ Mwa nguli ya basizana, Jesu naabulezi za basizana baalishumi bane baile kuli bayo katanyeza munyali. (Mat. 25:​1-4) Kaufelaa bona nebabata kusindeketa munyali kwa mukiti wa linyalo. Jesu naatalusize kuli baketalizoho ku bona nebanani “kutwisiso” mi babañwi baketalizoho neli “likuba.” Basizana babanani kutwisiso nebaitukiselize mi nebazwezipili kutona. Nebaitukiselize kuzwelapili kulibelela munyali, mane niha naakataha fahalaa busihu. Kacwalo, nebalwezi lilambi za mafula kuli lituse kwa liseli ka nako ya busihu. Mane nebalwezi mafula amañwi kuli bakone kuitusisa ona haiba munyali aliyeha. Kacwalo, nebaitukiselize kuli lilambi zabona lizwelepili kutuka. (Mubale Mateu 25:​6-10.) Munyali hapunya, basizana babanani kutwisiso baya ni yena kwa mukiti wa linyalo. Ka nzila yeswana, Bakreste babatozizwe bababonisa kuli baitukiselize ka kuzwelapili kutona ni kusepahala kufitela Kreste ataha, bakaatulwa kuli baswanela kuba ni munyali, yena Jesu, mwa Mubuso wahae kwa lihalimu. b (Sin. 7:​1-3) Kucwañi ka za basizana baketalizoho ba likuba?

7. Ki lika mañi zeneezahezi kwa basizana ba likuba baketalizoho, mi ki kabakalañi?

⁷ Ka kushutana ni basizana babanani  kutwisiso, basizana ba likuba baketalizoho bona nebasika itukiseza munyali hapunya. Lilambi zabona nelituha litima, mi nebasina mafula amañwi. Hane balemuhile kuli munyali atuha apunya, baya kuyo leka mafula. Munyali hapunya bona nebasa ile kuyo leka mafula. Ka nako yeo, “basizana bane baitukiselize bakena ni yena mwa mukiti wa linyalo, mi sikwalo sakwaliwa.” (Mat. 25:10) Hasamulaho, basizana balikuba bakuta mi hane babata kukena, munyali ababulelela kuli: “Hani mizibi.” (Mat. 25:​11, 12) Basizana bao nebasika itukiseza kuzwelapili kulibelela munyali ka nako yetelele. Ki tuto mañi yebaituta Bakreste babatozizwe?

8-9. Ki tuto mañi yebakona kuituta Bakreste babatozizwe kwa nguli ya basizana? (Mubone ni siswaniso.)

⁸ Mubonise kuli muitukiselize ni kuli mwatona. Jesu naasapolofiti kuli kukaba ni likwata zepeli za Bakreste babatozizwe, ili sikwata sa babaitukiselize kulibelela kuisa kwa mafelelezo a lifasi le ni babasika itukiseza. Kono naatalusa zekaezahala kwa Bakreste babatozizwe haiba basaitukisezi kuitiisa ka busepahali kuisa kwa mafelelezo. Haiba kuba cwalo, habana kufiwa mupuzo wabona. (Joa. 14:​3, 4) Taba yeo ki ya butokwa hahulu! Ibe kuli lunani sepo ya kuyo pila kwa lihalimu kamba kuto pila fa lifasi, kaufelaa luna luswanela kumamela temuso ye mwa nguli ya basizana. Mañi ni mañi waluna uswanela kuzwelapili kutona ni kuitukiseza kuitiisa kuisa kwa mafelelezo.—Mat. 24:13.

⁹ Hamulaho wa kubulela za nguli ya basizana kuli akoñomeke butokwa bwa kuitukiseza ni kutona, Jesu naabulezi za nguli ya litalenta. Nguli yeo ibonisa butokwa bwa kubeleka ka taata.

LITALENTA

10. Batanga bababeli nebabonisize cwañi kuli basepahala? (Mateu 25:​19-23)

¹⁰ Mwa nguli ya litalenta, Jesu naabulezi za batanga bababeli bane basepahalile ku mulenaa bona ni alimuñwi yanaasika sepahala. (Mat. 25:​14-18) Batanga bababeli bao  nebabonisize kuli basepahala ka kubeleka ka taata kuli bafumanele mulenaa bona masheleñi amañata. Pili asika tama kale musipili wa kuya kwa naha ya kwahule, naabasiyezi litalenta, ili masheleñi amañata hahulu. Batanga bababeli babasepahala nebabelekile ka taata, mi nebaitusisize hande masheleñi ao. Ki lika mañi zenezwile mwateñi? Mulenaa bona hanaakutile, nese baminahanyize habeli masheleñi ane bafilwe. Mulenaa bona naabababalize mi ‘bataba ni mulenaa bona.’ (Mubale Mateu 25:​19-23.) Kono kucwañi ka za mutanga wabulaalu? Naaitusisize cwañi masheleñi anaafilwe ki mulenaa hae?

11. Ki lika mañi zeneezahezi ku mutanga “yabuzwa,” mi ki kabakalañi?

¹¹ Mutanga wabulaalu naafilwe talenta iliñwi, kono naali “yabuzwa.” Mulenaa hae naalibelela kuli ukaitusisa hande talenta yeo. Kono apumbeka talenta yeo. Mulenaa hae hanaakutile, mutanga yo amukutiseza talenta iliñwi yeo kusina kekelezo. Mutanga yo naasina mubonelo omunde. Kufita kukupa swalelo kabakala kupalelwa kufumanela mulenaa hae masheleñi amañata, mutanga yo aikemela ka kubulela kuli mulenaa hae neli “mutu yataata.” Mutanga yo naasika tabisa mulenaa hae. Kono nto yemaswe nikufita kikuli, naaamuhilwe talenta yeo ni kulundulwa mwa ndu ya mulenaa hae.—Mat. 25:​24, 26-30.

12. Batanga bababeli babasepahala bayemela bo mañi kacenu?

¹² Batanga bababeli babasepahala bayemela Bakreste babatozizwe babasepahala. Jesu, yena mulenaa bona, ubata kuli batabe ni yena. Bakazusiwa mwa zuho yapili ni kufiwa mupuzo wabona wa kuya kwa lihalimu. (Mat. 25:​21, 23; Sin. 20:5b) Kwa neku leliñwi, mutala omaswe wa mutanga yabuzwa ufa temuso kwa Bakreste babatozizwe. Ka mukwa ufi?

13-14. Ki tuto mañi yebaituta Bakreste babatozizwe kwa nguli ya litalenta? (Mubone ni siswaniso.)

¹³ Mubonise kuli mubeleka ka taata ni ka tukufalelo. Sina feela mone kuinezi mwa nguli ya basizana, Jesu naasapolofiti kuli Bakreste babatozizwe bakaba ni buzwa, hanaabulezi nguli ya litalenta. Kono naatalusa  zekaezahala ku bona haiba bapalelwa kuzwelapili kuba ni tukufalelo. Haiba kuba cwalo, bakapalelwa ‘kutiisa kubiziwa ni kuketiwa kwabona,’ mi habana kulumelezwa kukena mwa Mubuso wa kwa lihalimu.—2 Pit. 1:10.

¹⁴ Linguli zanaafile Jesu, ili nguli ya basizana ni ya litalenta, libonisa hande kuli Bakreste babatozizwe kaufelaa bona baswanela kuba babaitukiselize ni kutona, mi hape baswanela kubeleka ka taata ni ka tukufalelo. Kono kana kunani litaba zeñwi zanaabulezi Jesu kuli afe temuso kwa Bakreste babatozizwe? Eni, kunani! Lufumana litaba zeo kwa Mateu 24:​40, 41, ili zeama kwa katulo ya mafelelezo ya Bakreste babatozizwe.

KI BO MAÑI ‘BABAKA ANGIWA’

15-16. Liñolo la Mateu 24:​40, 41 libonisa cwañi libaka Bakreste babatozizwe habaswanela kuzwelapili kutona?

¹⁵ Pili Jesu asika talusa kale linguli zetaalu, naabulezi za katulo ya mafelelezo ya Bakreste babatozizwe yekabonisa babasepahala mwahalaa bona. Naabulezi za baana bababeli bane babeleka mwa simu ni za basali bababeli bane babela fa sibelelo. Mwa muinelo ni muinelo, batu bababeli babonahala kuli baeza musebezi oswana, kono Jesu naabulezi kuli “yomuñwi ukaangiwa mi yomuñwi ukasiiwa.” (Mubale Mateu 24:​40, 41.) Kihona aeleza balateleli bahae kuli: “Muzwelepili kutona, kakuli hamuzibi lizazi lataha Mulenaa mina.” (Mat. 24:42) Jesu naabulezi nto yebato swana hamulaho wa kutalusa nguli ya basizana. (Mat. 25:13) Kana litaba zeo zaswalisana? Kubonahala cwalo. Ki Bakreste feela babatozizwe luli ili babasepahala ‘babaka angiwa’ ni kuamuhelwa ki Jesu mwa Mubuso wa kwa lihalimu.—Joa. 14:3.

¹⁶ Mubonise kuli mwazwelapili kutona. Bakreste babatozizwe kaufela babapalelwa kuzwelapili kutona kwa moya habana kukubukanyiwa hamoho ni “baketiwa.” (Mat. 24:31) Kono Bakreste babanani sepo ya kuto pila fa lifasi, ni bona baswanela kuzwelapili kutona ni kusepahala.

17. Ki kabakalañi halusa swaneli kubilaela ka za nako yeo Jehova aketa kutoza Bakreste babañwi ka moya wahae okenile?

¹⁷ Lufitile fa kuziba hande Jehova; kacwalo, lusepile katulo yahae. Halubilaeli haiba Jehova uketile kutoza Bakreste babañwi babasepahala mwa lilimo za cwanoñu fa. c Lwahupula zanaabulezi Jesu ka za babeleki bane bakeni ka hora yabu 11 mwa swanisezo yahae ya simu ya veine. (Mat. 20:​1-16) Bane bakalile kubeleka mwa simu ya veine ka kuliyeha ni bona nebaamuhezi tuwelo yeswana ni yene baamuhezi bane bakalile ka kuitahanela. Ka mukwa oswana, kusina taba ni nako fobatozezwa Bakreste babañwi, kaufelaa bona bakaamuhela mupuzo wabona wa kwa lihalimu haiba baatulwa kuli balukile.

MUMAMELE LITEMUSO

18-19. Ki lituto mañi ni litemuso zelunyakisisize?

¹⁸ Ki lika mañi zelunyakisisize? Ku babanani sepo ya kupila kuya kuile fa lifasi, nguli ya lingu ni lipuli ibonisa butokwa bwa kuzwelapili kusepahala ku Jehova ka nako ya cwale ni ka nako ya ñalelwa yetuna yetaha. Ka nako yeo, Jesu ukaatula babalukile kuli baswanela kufiwa “bupilo bobusa feli.”—Mat. 25:46.

¹⁹ Hape lunyakisisize linguli zepeli zefa temuso kwa Bakreste babatozizwe. Mwa nguli ya Jesu ya basizana babanani kutwisiso ni ba likuba, baketalizoho nebabonisize butali. Nebaitukiselize ni kutona, mi nebazwezipili kulibelela munyali kusina taba ni nako yanaaka  punya. Kono basizana ba likuba bona nebasika itukiseza. Kacwalo, munyali naasika balumeleza kukena mwa mukiti wa linyalo. Ni luna luswanela kuitukiseza kulibelela kusina taba ni kuli kukafita nako yekuma kai, kufitela Jesu afelisa lifasi lelimaswe le. Hape mwa nguli ya Jesu ya litalenta, lunyakisisize za batanga bababeli babasepahala bane babelekile ka taata ni ka tukufalelo. Nebabelekezi mulenaa bona ka taata mi neba mutabisize. Kono mutanga yabuzwa naahanilwe. Luitutañi? Luswanela kuzwelapili kupateha mwa sebelezo yaluna ku Jehova kuisa kwa mafelelezo. Hasamulaho, lunyakisisize zebaswanela kueza Bakreste babatozizwe kuli bazwelepili kutona ilikuli ‘baangiwe’ ki Jesu ni kufiwa mupuzo wabona wa kwa lihalimu. Bakreste bao banyolezwi hahulu ‘kukubukanyezwa’ ku Jesu. Hamulaho wa ndwa ya Armagedoni, bakaba banyaliwa ba Jesu mwa linyalo la Ngunyana.—2 Mates. 2:1; Sin. 19:9.

20. Jehova ukaezezañi batu babamamela litemuso zahae?

²⁰ Nihaike kuli katulo yaaatumela, haluswaneli kuikalelwa. Haiba luzwelapili kusepahala, Ndataa luna yalilato ya kwa lihalimu uka lufa “maata afita a butu” ilikuli ‘lukone kuyema fapilaa Mwanaa mutu.’ (2 Makor. 4:7; Luka 21:36) Ibe kuli sepo yaluna ki ya kuyo pila kwa lihalimu kamba ki ya kuto pila fa lifasi, kaufelaa luna lukatabisa Ndataa luna haiba lumamela litemuso ze mwa linguli za Jesu. Mi kabakala sishemo sa Jehova sesituna, mabizo aluna ‘akafumanwa añozwi mwa buka’ ya bupilo.—Dan. 12:1; Sin. 3:5.