Mwa Kona ku Ba ni Tumelo Ya Niti

Sarah Jayne ha n’a li wa lilimo ze 19, na til’o lemuha kuli n’a kula butuku bwa kansa ya kwa zwalo. Hamulaho wa ku pazulwa, a ikutwa hande mi n’a na ni buikolwiso bwa kuli nako ya kwapili neikaba ye nde. N’a na ni sepo ye tuna hahulu kuli mane ha n’a til’o ba wa lilimo ze 20, a beelezwa mi a kalisa ku eza litukiso za sinawenga. Ka sona silimo seo, butuku bwa kansa hape bwa mu kutela, mi a ziba kuli n’a siyalezwi fela ki liviki ze sikai za ku pila. Sarah Jayne n’a timezi mwa June 2000, hanyinyani fela kuli a be wa lilimo ze 21.

BE NE ba potelanga Sarah Jayne mwa sipatela ne ba tabisizwe ki buikolwiso bwa hae bo bu tiile ka za nako ya kwapili, hamohocwalo ni tumelo ye tiile ku Mulimu ni Linzwi la hae, yona Bibele. Ku si na taba ni butuku bo butuna bwa n’a kula, n’a na ni sepo ye tiile ka za zuho—kuli hape n’a ka bona balikani ba hae kaufela. (Joani 5:28, 29) N’a ize: “Ni ka mi bona kaufel’a mina mwa lifasi le linca la Mulimu.”

Ba bañwi ba nga tumelo ye cwalo ku ba tolo fela. Ludovic Kennedy u buza kuli: “Bupilo hamulaho wa lifu ki nto mañi, kana haki tumelo fela ya ba ba si na buikolwiso ba ba nga kuli kuti tolombita ya mafelelezo ha i ka lila ku ka ba ni ze tabisa hahulu, kuli ni bona mane ba ka ikola ze tabisa zeo ni ku lizezwa litolombita, ni kuli mwa Edeni ye tezi likota ba ka ikola ku ba ni ba bañwi be ne ba shwile pili ni ba bañwi ba ba kana ba shwa hamulaho wa bona?” Lu lukela ku buza puzo ya ku hana nto yeo, ya kuli, se si utwahala ki sifi—ku lumela kuli “ha ku na bupilo bo buñwi kwand’a bo fela, mi kacwalo lu lukela ku itusisa bona ka ku tala,” ka mw’a taluseza Kennedy, kamba ku lumela ku Mulimu ni  sepiso ya hae ya zuho ya bafu? Sarah Jayne n’a iketezi ku lumela ku Mulimu ni sepiso ya hae ya zuho ya bafu. N’a bile cwañi ni tumelo ye cwalo?

‘Mu Bate Mulimu mi Mu Mu Fumane’

Kuli mu sepe ni ku lumela mutu yo muñwi, mu tokwa ku fita fa ku mu ziba ni ku ziba mw’a nahanela ni mw’a ezeza lika. Ku eza cwalo ku ama pilu ni munahano. Kucwalo luli ni ka za ku ba ni tumelo ya niti ku Mulimu. Mu lukela ku fita fa ku mu ziba, ku ituta mikwa ni butu bwa hae, ku ziba mwa sa boniselize busepahali bwa hae mwa linako ze felile ku zote za n’a bulezi ni ku eza.—Samu 9:10; 145:1-21.

Ba bañwi ba ikutwa kuli seo ha si konahali. Ba li Mulimu u kwahule hahulu, h’a konwi ku utwisiswa—haiba luli u teñi. Muhononi u kona ku buza kuli: “Haiba Mulimu u teñi luli ka mwa bonahalela ku ba teñi kwa Bakreste sina Sarah Jayne, ki kabakalañi ha sa ipatululi ku luna kaufela?” Kono kana Mulimu luli u kwahule hahulu mi h’a konwi ku fumanwa? Muapositola Paulusi ha n’a ikambotile ni baituti ba mihupulo ya batu ni ba bañwi ba ba itutile mwa Athens, n’a bulezi kuli “Mulimu ya ezize lifasi ni linto kamukana ze ku lona” u file ze tokwahala kaufela kuli a ‘batiwe; ni kuli a fumanwe.’ Mane, Paulusi n’a ize: ‘Ha ini kwahule ni mutu ni mutu wa luna.’—Likezo 17:24-27.

Mu kona cwañi he ku ‘bata Mulimu ni ku mu fumana’? Ba bañwi ba ezize cwalo ka ku lemuha fela pupo ye ba iponela. Ku ba bañata, bo ki bupaki bo bu likani bwa ku ba kolwisa kuli Mubupi luli u teñi. * (Samu 19:1; Isaya 40:26; Likezo 14:16, 17) Ba ikutwa ka mwa n’a ikutwezi muapositola Paulusi kuli “za Mulimu ze sa bonwi, ona mata a hae a kamita ni bumulimu bwa hae, ki ze bonahala hande haisamba lifasi li ezwa, inze li lemuhiwa mwa misebezi ya hae.”—Maroma 1:20; Samu 104:24.

Mu Tokwa Bibele

Kono kuli mu be ni tumelo ye tiile ku Mubupi, mu tokwa nto ye ñwi ya fanile. Ki nto mañi yona yeo? Ki Bibele—lona Linzwi la Mulimu le li buyelezwi, ili m’o a bonisa tato ni mulelo wa hae. (2 Timotea 3:16, 17) Ba bañwi ba kana ba bulela kuli: “Kono mu kona ku lumela cwañi nto ifi kamba ifi ye bulela Bibele ha mu bona ze maswe ze ba eza batu ba ba ipala ku latelela Bibele?” Ki niti kuli Krestendomu i ezize lika ze ñata za buipi, ze situhu, ili za buhule. Kono mutu kaufela ya utwisisa lika wa kona ku bona kuli Krestendomu i ipumisa fela ku latelela likuka za Bibele.—Mateu 15:8.

Yona Bibele ka sibili ne i lemusize kuli batu ba bañata ne ba ka li ba lapela Mulimu kono kaniti fela ne ba ka “latula Mulena ya ba liuluzi.” Muapositola Pitrosi n’a ize: “Kabakala bona, nzila ya Niti i ka nyefulwa.” (2 Pitrosi 2:1, 2) Jesu Kreste n’a bulezi kuli bao ki “ba ba sebezanga ze maswe” ili be ne ba ka zibahala hande-nde ka likezo za bona ze maswe. (Mateu 7:15-23) Ku hana Linzwi la Mulimu kabakala bumaswe bo bu ezizwe ki Krestendomu ku swana ni ku yumba liñolo le li zwa ku mulikani ya sepahala kabakala fela kuli li tisizwe ki mutu wa libubo le li maswe.

Ha ku si na Linzwi la Mulimu, ha ku konahali ku ba ni tumelo ya niti. Ki ka Bibele fela Jehova a bonisa mwa ngela litaba. Wa fa likalabo kwa lipuzo ze sa feli ze cwale ka za libaka ha tuhelezi manyando ni butuku ni z’a ka eza ka za muinelo w’o. (Samu 119:105; Maroma 15:4) Sarah Jayne n’a fitile fa ku lumela kuli Bibele ki Linzwi la Mulimu le li buyelezwi. (1 Matesalonika 2:13; 2 Pitrosi 1:19-21) Ka mukwa ufi? Ne si ka libaka la kuli bashemi ba hae ne ba mu bulelezi cwalo, kono kakuli n’a ngile nako ku tatuba ka busepahali bupaki kaufela bo bu bonisa kuli Bibele ki sinulo ye ipitezi ye zwa ku Mulimu. (Maroma 12:2) Ka mutala, n’a lemuhile susuezo ye m’ata ya Bibele mwa bupilo bwa batu ba ba kumalela kwa likuka za yona. Ka tuso ya lihatiso ze cwale ka The Bible—God’s Word or Man’s?, * hape n’a tatubisize bupaki bo buñata-ñata bo bu mwa Bibele bo bu bonisa kuli ne i buyelezwi ki Mulimu.

“Tumelo I Zwa kwa ku Utwa”

Kono haki ko ku likani ku luwa fela Bibele  kamba mane ku lumela kuli i buyelezwi. Muapositola Paulusi u ñola kuli: “Tumelo i zwa kwa ku utwa.” (Maroma 10:17) Ku utwa Bibele, isiñi fela ku ba ni Bibele, ki kona ko ku yaha tumelo. Mu “utwa” s’a bulela Mulimu ka ku bala ni ku ituta Linzwi la hae. Banana ni bona ba kona ku eza cwalo. Paulusi u bulela kuli “ku zwa kwa bwanana,” Timotea n’a lutilwe “Mañolo a kenile” ki bom’ahe ni bokukw’a hae. Kana seo si talusa kuli n’a hapilikelizwe ka nzila ye ñwi? Kutokwa! Timotea n’a si ka puma-pumiwa ka nzila ifi kamba ifi. N’a ‘kolisizwe ku lumela’ za n’a utwile ni ku bala.—2 Timotea 1:5; 3:14, 15.

Sarah Jayne ni yena n’a kolwisizwe cwalo. Sina Bakreste ba kwa Berea ba mwa lilimo za mwanda wa pili, n’a ‘amuhezi Linzwi [kwa bashemi ba hae ni baluti ba bañwi] ka ku li tukufalelwa.’ Ha n’a li mwanana, kaniti luli n’a sepile hahulu ze ne ba mu bulelezi bashemi ba hae. Hasamulaho, ha n’a nze a hula, n’a si ka lumela-lumela fela zote za n’a lutilwe. N’a ‘batisisanga mwa Mañolo, ka mazazi kaufela, kuli a lemuhe litaba za n’a bulelelwa kana ki mo li inezi.’—Likezo 17:11.

Mwa Kona ku Ba ni Tumelo Ya Niti

Ni mina mwa kona ku ba ni tumelo ya niti—ili mufuta wa tumelo ye talusizwe ki muapositola Paulusi mwa liñolo la n’a ñolezi Bakreste ba Maheberu. Ka mwa n’a bulelezi, tumelo ye cwalo ki ‘ku sepa ka ku tiya ze lu libelezi, ni ku kolwa ze sa bonwi.’ (Maheberu 11:1) Ka ku ba ni tumelo ye cwalo, mu ka kolwa ka ku tala kuli zote ze mu sepa ni ku libelela, ku kopanyeleza cwalo ni sepiso ya Mulimu ya zuho ya bafu, li ka talelezwa. Mu ka kolwa kuli lisepo ze cwalo li tomile fa litumelo ze tiile, isiñi fa litaba za ku sepa fela. Mu ka fita fa ku ziba kuli Jehova ha si ka palelwa ni kamuta ku taleleza lisepiso za hae. (Joshua 21:45; 23:14; Isaya 55:10, 11; Maheberu 6:18) Lifasi le linca l’a sepisize Mulimu li ka ba la niti ku mina mane inge kuli se li li teñi kale. (2 Pitrosi 3:13) Mi ka meto a tumelo, mu ka bona hande-nde kuli Jehova Mulimu ni Jesu Kreste ki ba luli, ni kuli Mubuso wa Mulimu ki wa luli, isiñi tolo fela.

Ha mu si ka yubekiwa kuli mu ipumanele tumelo ya niti mu nosi. Kwand’a ku ezisa kuli Linzwi la hae li fumanehe ka bunolo, Jehova hape u lukisize puteho ya Sikreste mwa lifasi kaufela ye sweli ku tusa batu ba ba sepahala ku ba ni tumelo ku Mulimu. (Joani 17:20; Maroma  10:14, 15) Mu amuhele tuso kamukana y’a fa Jehova ka yona kopano yeo. (Likezo 8:30, 31) Mi ka ku ba kuli tumelo ki muselo wa moya o kenile wa Mulimu, mu kupange moya w’o kuli u mi tuse ku ba ni tumelo ya niti.—Magalata 5:22.

Mu si zwafiswi ki bahononi ba ba nyefula mañi ni mañi ya lumela ku Mulimu ni Linzwi la hae. (1 Makorinte 1:18-21; 2 Pitrosi 3:3, 4) Mane, tumelo ya niti ki ya butokwa hahulu kwa ku tiisa tundamo ya mina ya ku tiyela litwaniso ze cwalo. (Maefese 6:16) Sarah Jayne n’a iponezi buniti bwa seo, mi n’a susuezanga be ne ba mu potelanga mwa sipatela ku ba ni tumelo ye tiile. N’a bulelanga kuli: “Mu tome mwa niti. Mu itute Linzwi la Mulimu. Mu kumalele kopano ya Mulimu. Mu tiiseze ku lapela. Mu zwelepili ku sebeza ka t’ata mwa sebelezo ya Jehova.”—Jakobo 2:17, 26.

Nasi yo muñwi ha n’a boni tumelo ya Sarah Jayne ku Mulimu ni mwa zuho ya bafu, n’a bulezi kuli: “Kaniti luli kona s’o lumela seo, nji cwañi?” Ha n’a buzizwe libaka ha n’a na ni mubonelo o cwalo wa sepo ku si na taba ni miliko ya hae, n’a alabile kuli: “Ki ku ba ni tumelo ku Jehova. Ki mulikan’a ka luli, mi ni mu lata hahulu.”

[Litaluso za kwatasi]

[Siswaniso se si fa likepe 6]

“Ku zwa kwa bwanana,” Timotea n’a lutilwe “Mañolo a kenile” ki bom’ahe ni bokukw’a hae

[Siswaniso se si fa likepe 6]

Ba kwa Berea ne ba babalizwe kabakala ku tatuba Mañolo ka zazi

[Manzwi a bañi ba siswaniso]

Ku zwa mwa “Photo-Drama of Creation,” 1914

[Maswaniso a fa likepe 7]

Ki ku utwa ni ku latelela Bibele, isiñi ku i luwa fela, ko ku yaha tumelo

[Siswaniso se si fa likepe 7]

“Ni ka mi bona kaufel’a mina mwa lifasi le linca la Mulimu”