MU SUTELELE KU MULIMU

“U li . . . Patululezi Limbututu”

Kana mwa tabela ku ziba niti ka za Mulimu; niti ya kuli ki mañi, ki lika mañi za lata ni za toile, ni kuli tato ya hae ki ifi? Mwa Bibele, lona Linzwi la hae, Jehova Mulimu u patulula niti ka za hae. Kono haki mutu kaufela ya bala Bibele ya kona ku utwisisa niti yeo ka ku tala. Ki kabakalañi? Kakuli ku utwisisa niti yeo ki tohonolo, mi haki mutu kaufela ya kona ku ba ni yona. Ha lu nyakisiseñi za naa bulezi Jesu ka za taba yeo.—Mu bale Mateu 11:25.

Timana yeo i kalisa ka manzwi a li: “Ka yona nako yeo, Jesu a li.” Kamukwaocwalo, mwendi manzwi a naa tuha a bulela Jesu naa ama kwa kezahalo ye ne sa zo ezahala. Jesu kihona ha naa sa zo nyaza batu ba mwa mileneñi ye milaalu ya Galilea ba ne ba si ka amuhela lushango lwa hae niha naa ezize misebezi ye miñata ye maata mwateñi. (Mateu 11:20-24) Mu kana mwa buza kuli: ‘Mutu ya naa bona Jesu inze a eza limakazo, u kona ku palelwa cwañi ku lumela niti ya naa luta ni ku mu latelela?’ Se ne si tahisize kuli batu bao ba si ke ba lumela ne li kabakala kuli lipilu za bona ne li mbumbutezi.—Mateu 13:10-15.

Jesu naa ziba kuli, kuli lu utwisise niti ya Mulimu ye fumaneha mwa Bibele, lu tokwa lika ze peli: Lu tokwa ku tusiwa ki Mulimu ni ku ba ni lipilu ze nde. Jesu u talusa kuli: “Na ku lumbeka fapilaa nyangela Ndate, wena Mulenaa lihalimu ni lifasi, kakuli u patile lika ze ku ba ba butali ni ba ba itutile mi u li patululezi limbututu.” Kana mwa lemuha libaka ku utwisisa niti ye fumaneha mwa Bibele ha ku kona ku ngiwa kuli ki tohonolo? Jehova u na ni tukelo ya ku keta batu ba tabela ku patululela niti, kakuli ki “Mulenaa lihalimu ni lifasi.” Mañi ni mañi u na ni kolo ya ku utwisisa niti kakuli Mulimu ha ketululi batu. Ki sika mañi se si tahisa kuli Mulimu a patululele batu ba bañwi niti ya mwa Bibele kono ni ku sa i patululela ba bañwi?

Jehova u lata batu ba ba ikokobeza isiñi ba ba ikuhumusa. (Jakobo 4:6) U patela niti “ba ba butali ni ba ba itutile,” bona batu ba ba na ni butali bwa silifasi ni ba ba itutile hahulu bao, ka buikuhumuso ni ka buisepo ba ikutwa kuli ha ba tokwi ku tusiwa ki Mulimu. (1 Makorinte 1:19-21) Kono u patululela niti ya hae “limbututu” ili batu ba ba taha ku yena ka lipilu ze nde, ba ba ikokobeza sina banana. (Mateu 18:1-4; 1 Makorinte 1:26-28) Jesu, yena Mwanaa Mulimu, naa zibile likwata ze peli zeo. Baeteleli ba bulapeli ba bañata ba ne ba ikuhumusa ni ba ne ba itutile hahulu, ne ba palezwi ku utwisisa lushango lwa hae, kono bayambi ba ne ba ikokobeza ne ba konile ku lu utwisisa. (Mateu 4:18-22; 23:1-5; Likezo 4:13) Kono hape batu ba bañwi ba ne ba itutile ni ba ne ba fumile ba ne ba bonisize buikokobezo bwa niti ne ba bile balateleli ba Jesu.—Luka 19:1, 2, 8; Likezo 22:1-3.

Ha lu kuteñi kwa puzo ye ne i buzizwe kwa makalelo a taba ye, ye li: Kana mwa tabela ku ziba niti ka za Mulimu? Haiba ki cwalo, mwendi mu ka omba-ombiwa ki ku ziba kuli Mulimu ha shemubangi batu ba ba ikutwa kuli ba na ni butali bwa silifasi. Kono u shemubanga batu ba ba nyazisezwa ki ba ba na ni butali bwa lifasi le. Haiba mu ituta Linzwi la Mulimu ka buikokobezo ni ka pilu ye nde, mwa kona ku ba mwahalaa batu bao Jehova a fa mpo ya butokwa hahulu, yona ya ku utwisisa niti ka za hae. Ha mu ka utwisisa niti yeo, mu ka ba ni tabo mwa bupilo bwa mina ka nako ya cwale mi mu ka fumana “bupilo sakata,” bona bupilo bwa ku ya ku ile mwa lifasi le li nca la sepisize Mulimu le li tuha li taha. *—1 Timotea 6:12, 19; 2 Pitrosi 3:13.

Litaba za mwa Bibele ze akalelizwe ku baliwa mwa January:

Mateu 1-21

[Litaluso za kwatasi]