BIBELE YA CINCANGA BUPILO BWA BATU

“Ne ni li Mutu wa Mifilifili”

Taba ye kandekilwe ki bo Esa Leinonen

SILIMO SE NE BA PEPILWE: 1960

NAHA KO NE BA PEPEZWI: FINLAND

LITABA ZE EZAHEZI: MUOPELI WA LIPINA ZE LILATA

BUPILO BWA KA BWA KWAMULAHO: Ne ni hulezi mwa tolopo ya Turku ye fa likamba la liwate, mi buñata bwa batu ba mwa silalanda seo ne li babotana. Bo ndate ne ba tumile hahulu mwa papali ya liñindi, mi na ni munyanaa ka wa mushimani, lwa kala ku bapalanga papali yeo. Ka nako ye ne ni sa kena sikolo, hañata ne ni lwananga hahulu. Ha ne ni li mwa lilimo za ku nonoboka, na kala ku swalisana ni sikwata sa batu ba ba maswe, kamukwaocwalo, ne se ni ipumananga mwa mifilifili ye mituna hahulu. Hape na kala ku tabela lipina ze lilata, ni ku nahananga za ku ba muopeli yo mutuna wa lipina zeo.

Na leka mifuta ye miñwi ya milupa ni ku toma sikwata sa baopeli mi hamulaho wa nakonyana, na ba muopeli yo mutuna wa sikwata. Ha ne ni banga fa liopelelo, ne ni tabelanga hahulu ku bina ka mabifi. Bakeñisa kuli sikwata sa luna ne li sa batu ba mifilifili hahulu mi ponahalo ya luna ne li ye komokisa, lwa kala ku zibahala hahulu. Lwa kalisa ku opelanga lipina fapilaa batu ba bañata hahulu ni ku zwisa matapa a lipina li sikai, mi litapa la mafelelezo la tabelwa hahulu ki batu. Kwa mafelelezo a lilimo za ma 1980, lwa ya kwa naha ya United States kuli lu yo zibahaza sikwata sa luna. Ne lu opezi lipina li sikai mwa New York ni mwa Los Angeles, mi pili lu si ka kutela kale kwa Finland, ne lu konile ku zibana ni ku eza litumelelano ni batu ba bañwi ba ba cuukile mwa litaba za lipina.

Nihaike kuli ne ni ikolanga ku ba mwa sikwata sa baopeli, ne ni nyolelwa hahulu ku ba ni tabo sakata mwa bupilo. Ne ni sa tabeli moya wa likangisano ni mifilifili ye ne ba na ni yona baopeli, mi ne ni zwafile hahulu bakeñisa kuli ne ni sinyeza feela nako ya ka kwa ku opela lipina. Ne ni ikutwanga ku ba mutu ya maswe, mi ne ni i kalelwanga kuli ni ka yo ca mwa lihele la mulilo. Ne ni likile ku bata likalabo kwa lipuzo za ka, ka ku bala mifuta kaufela ya libuka za bulapeli. Hape ne ni lapezi ka taata ku Mulimu kuli a ni tuse, nihaike kuli ne ni ikutwa kuli ha ni koni ku mu tabisa.

MO NE I CINCELIZE BUPILO BWA KA BIBELE: Ne ni beleka mwa ofisi ya poso mwa silalanda sa luna, ilikuli ni fumane za ku ipilisa ka zona. Zazi le liñwi, na lemuha kuli yo muñwi wa batu ba ne ni beleka ni bona ne li yo muñwi wa Lipaki za Jehova. Na kala ku mu buzaka lipuzo ze ñata. Mi likalabo za hae ze utwahala hande ze ne tomile fa Mañolo, ne li ni tabisize hahulu kuli mane  na lumela ku ituta Bibele ni yena. Ha se ni itutile Bibele ka lisunda li sikai, sikwata sa luna sa baopeli sa fiwa musebezi wa masheleñi a mañata, mi ne ku bonahala kuli ne si ka zwisa litapa la lipina mwa naha ya United States. Na ikutwa kuli yeo ne li kolo ye nde ye ne ka ni konisa ku ba ni lika ze ne ni tokwa mwa bupilo.

Na bulelela Paki ye ne ni ituta ni yena kuli ne ni bata ku zwisa feela litapa li li liñwi la lipina, mi hamulaho kihona ha ne ni ka sebelisa hahulu likuka za Bibele mwa bupilo bwa ka. Naa si ka bulela maikuto a hae fa taba yeo, kono na ni taluselize feela kuli ni bale manzwi a Jesu a fumaneha kwa Mateu 6:24. Timana yeo i li: “Ha ku na mutu ya kona ku sebeleza malena ba babeli.” Ne ni komokile hahulu ha ne ni utwisisize za talusa manzwi a Jesu ao. Kono hamulaho wa mazazi a sikai, mutu ya naa ituta ni na Bibele ni yena a komoka hahulu! Ne ni mu taluselize kuli bakeñisa kuli ne ni bata ku latelela Jesu, ne ni tuhezi ku swalisana ni sikwata sa baopeli!

Bibele ne i swana sina siiponi ku na bakeñisa kuli ne i ni tusize ku ziba mifokolo ya ka. (Jakobo 1:22-25) Na lemuha kuli ne ni li mutu wa mifilifili: Ne ni ikuhumusa, mi ne ni tabela hahulu ku ba ni libubo. Ne ni li wa lipulelo ze maswe, ne ni lwananga, ne ni zuba, mi ne ni nwa hahulu bucwala. Ne ni zwafile hahulu ha ne ni lemuhile kuli mupilelo wa ka ne u lwanisana hahulu ni likuka za Bibele. Nihakulicwalo, ne ni itukiselize ku cinca mupilelo wa ka.—Maefese 4:22-24.

Sihulu kwa makalelo, ne ni zwafanga hahulu ha ne ni hupulanga mafosisa a ka a kwamulaho. Kono Paki ye ne ni ituta ni yena Bibele naa ni tusize hahulu. Naa ni bonisize ze i bulela Bibele kwa Isaya 1:18, liñolo leo li li: “Libi za mina, niha li ka ba ze fubelu sina mali, li ka fetuha ze sweu sina litwa.” Liñolo le, ni mañolo a mañwi a mwa Bibele, naa ni kolwisize kuli Ndataa luna wa kwahalimu u na ni makeke, mi wa tabela ku swalela batu ba ba bakela mafosisa a bona.

Ha ne ni fitile fa ku ziba hande Jehova ni ku itebuha tulemeno twa hae, naa neela bupilo bwa ka ku yena. (Samu 40:8) Ne ni kolobelizwe ka 1992 kwa mukopano wa macaba wa Lipaki za Jehova o ne u bezi kwa St. Petersburg, mwa Russia.

MO NI TUSELIZWE: Ni fumani balikani ba bañata ba bande mwahalaa balapeli ba Jehova. Fokuñwi lwa kopananga hamoho ni balikani ba ka bao ku liza lipina ze nde ni ku ikola mpo ye nde yeo ye zwa ku Mulimu. (Jakobo 1:17) Mpo ye nde hahulu ye ni bile ni yona ki ku fumana musali ye ni lata, yena musalaa ka Kristina. Mwa bupilo bwa ka ni Kristina, ku na ni linako ze lu bile ni tabo ni linako ze lu kopani ni butata, mi wa ziba mo ni ikutwelanga.

Kambe ne ni si ka ba yo muñwi wa Lipaki za Jehova, mwendi kambe ni shwile kale. Kwamulaho, ne ni ipumananga hañata mwa butata. Kono cwale se ni ziba libaka le ni pilela, mi ni ikutwa kuli lika se li ni zamaela hande mwa bupilo.

[Manzwi a bañi ba siswaniso]

© Bo Kaj Ewart

[Manzwi a fa likepe 9]

“Ndataa luna wa kwahalimu u na ni makeke, mi u bata ku swalela batu ba ba bakela mafosisa a bona”