MU SUTELELE KU MULIMU

Kana Luli Jehova wa mi Babalela?

Musali yo muñwi ne ku mu belanga taata ku lumela kuli Jehova luli wa kona ku mu babalela. Mi naa bulezi kuli: “Butata bo butuna bo ni na ni bona bo bu ni palelwisa ku sutelela ku Mulimu ki ku ikutwa ku sa ba wa butokwa.” Kana ni mina kona mo mu ikutwelanga cwalo? Haiba ki cwalo, mwendi mu ipuzanga kuli: ‘Kana luli Jehova wa babalela yo muñwi ni yo muñwi wa balapeli ba hae?’ Eni! Manzwi a naa bulezi Jesu a bonisa kuli Jehova wa babalela yo muñwi ni yo muñwi wa balapeli ba hae.—Mu bale Joani 6:44.

Ki lika mañi za naa bulezi Jesu, yena ya ziba hande tulemeno ni tato ya Jehova ku fita mutu ufi kamba ufi? (Luka 10:22) Jesu naa talusize kuli: “Ha ku na mutu ya kona ku taha ku na, konji haiba Ndate, ya ni lumile, a mu hoha.” Kamukwaocwalo, ha lu koni ku ba balateleli ba Kreste, kamba ku ba balapeli ba Ndataa luna ya kwa lihalimu Jehova, konji haiba Jehova yena kasibili a lu hoha. (2 Matesalonika 2:13) Ha lu utwisisa sa naa talusa Jesu, fohe lu ka lemuha bupaki bo bu bonisa kuli Jehova wa babalela yo muñwi ni yo muñwi wa balapeli ba hae.

Taba ya kuli Jehova wa lu hoha, i talusañi? Linzwi la Sigerike le li tolokilwe kuli ku “hoha” hape li itusisizwe ku talusa ku hoha litapi ka kanyandi. (Joani 21:6, 11) Kana Jehova wa lu hohanga inge lu sa lati, ili ku lu hapeleza ku mu sebeleza? Batili. Jehova u lu file mpo ya ku iketela, kamukwaocwalo, ha hapelezangi lipilu za luna ku kwaluha. (Deuteronoma 30:19, 20) Jehova u tatubanga lipilu za batu ba bañata mwa lifasi ilikuli a fumane ba ba bata ku mu sebeleza ka lipilu za bona kaufela. (1 Makolonika 28:9) Jehova ha fumana mutu ya cwalo, u nganga muhato o tabisa. Kamukwaufi?

Jehova u hohanga ka lilato mutu ya na ni ‘pilu ye nde.’ (Likezo 13:48) Jehova u ezanga cwalo ka linzila ze peli; ka taba ye nde ya mwa Bibele ili ye fitanga ku mañi ni mañi wa luna, ni ka moya wa hae o kenile. Jehova ha bona mutu ya amuhela niti ya mwa Bibele, u itusisanga moya wa hae kuli a tuse mutu yo ku utwisisa ni ku sebelisa niti yeo mwa bupilo bwa hae. (1 Makorinte 2:11, 12) Haiba Mulimu a sa lu tusi, ni kamuta ha lu koni ku ba balateleli ba Jesu ni ku ba balapeli ba Jehova ba ba sepahala.

Cwale manzwi a Jesu a bulezwi kwa Joani 6:44 a lu lutañi ka za Jehova Mulimu? Jehova u hohanga batu kakuli u bonanga nto ye ñwi ye nde mwa lipilu za bona, mi u ba balelanga mañi ni mañi wa bona. Ku utwisisa manzwi a niti a kwa liñolo le, ne ku omba-ombile musali ya bulezwi kwa makalelo a taba ye. Musali yo u bulela kuli: “Ku ba mutangaa Jehova ki yona tohonolo ye tuna ya kona ku ba ni yona mutu ufi kamba ufi. Mi ha u bona Jehova u ni ketile ku ba mutanga hae, u zibe ni wa butokwa ku yena.” Mina bo? Kana ku ziba kuli Jehova u babalela yo muñwi ni yo muñwi wa balapeli ba hae kwa mi susueza ku bata ku sutelela ku yena?

Litaba za mwa Bibele ze akalelizwe ku baliwa mwa May

Luka 22–Joani 16

[Manzwi a fa likepe 14]

“Jehova u lu file mpo ya ku iketela, kamukwaocwalo, ha hapelezangi lipilu za luna ku kwaluha”