Mu kona ku ezañi kuli mu sutelele ku Mulimu? Lu nyakisisize lika li sikai ze kona ku mi tusa ku ba ni silikani se si tiile ni Mulimu. Lika zeo ki:

1. Mu zibe libizo la Mulimu, lona la Jehova mi mu itusisange lona.

2. Mu ambolange ni Mulimu kamita ka ku lapelanga ni ku itutanga Linzwi la hae, yona Bibele.

3. Mu tundamene ku eza ze tabisa Jehova.

Ku likana ni litaba ze bulezwi zeo, kana mu sweli mwa eza lika ze ka ku mi tusa ku sutelela ku Mulimu? Kana ku na ni lika ze mu sa ezi hande? Kwa utwahala kuli ku sutelela ku Mulimu ku tokwa ku ikataza, kono mu nyakisise lika ze nde ze zwanga mwateñi.

Bo Jennifer, basali ba ba pila kwa United States, ba bulela kuli: “Ku ikataza ku eza silikani se si tiile ni Mulimu ku tusa hahulu. Silikani se, si tisa kuli mutu a fumane limbuyoti ze ñata, a sepe hahulu Mulimu, a utwisise hahulu mikwa ya Mulimu, mi sa butokwa ni ku fita kikuli u ka ba hahulu ni lilato. Hakuna bupilo bo bunde bo bu fita bo!”

Haiba mu bata ku ba ni silikani se si tiile ni Mulimu, mu ambole ni Lipaki za Jehova, ba ka tabela ku mi tusa ku eza cwalo. Ba ka lukisa ku itutanga Bibele ni mina ku si na tifo. Hape mwa kona ku yo kopana ni bona kwa Ndu ya Mubuso ye li bukaufi ni mina, ko mu ka yo ikola siango se sinde ni batu ba ba li balikani ba Mulimu. * Ha mu ka eza cwalo, ni mina mu ka ikutwa sina mwa naa ikutwezi wa lisamu ya naa ize: “Kono na, buswa bwa ka, ki ku sutelela ku Mulimu.”—Samu 73:28.