•  Le i kika kikwashanga Batumoni ba Yehova bayuke shi fetyi kampanda i mitabijibwe?

•  Batumoni ba Yehova byokebafetangapo mafetyi amoamo, le ko kunena’mba kebasenswepo bisaka byabo?

•  Le Batumoni ba Yehova balombolanga bantu baleke kufeta mafetyi kampanda?

 Kumeso kwa kukwata butyibi bwa kwitabija nansha kupela kufeta fetyi kampanda, Batumoni ba Yehova babandaulanga Bible. Mafetyi amo ne binkumenkume bimo kebikwatañenepo na misoñanya idi mu Bible. Batumoni ba Yehova kebafetangapo mafetyi a uno muswelo. Kudi mafetyi makwabo alomba Kamoni ne Kamoni akwate butyibi bwandi aye mwine, aku ulonga buninge bwa “kulama mutyima wa mundamunda utōka ku meso a Leza ne a bantu.”—Bilongwa 24:16.

 Bino bilonda’ko, i bipangujo bimo biipangulanga Batumoni ba Yehova mwanda wa kuyuka shi babwanya kufeta fetyi kampanga, nansha kupela. a

•   Le fetyi’ya ikwatañene na mfundijo keidipo mu Bible?

   Musoñanya wa mu Bible: “‘Tambai mu bukata mwabo, ne kwisansanya,’ i Yehova unena, ‘kadi lekai kutenga kintu kya disubi.’”—2 Bene Kodinda 6:15-17.

   Pa kwisansanya ne pa mfulo na mfundijo isubija ku mushipiditu, nansha amba keikwatañenepo na binena Bible, Batumoni ba Yehova kebafetangapo mafetyi adi na bino bintu bilonda’ko.

   Mafetyi adi na nkulupilo nansha butōtyi bwa baleza bakwabo. Yesu wānenene amba: “Ufwaninwe kutōta Yehova Leza obe, kadi aye kete ye ofwaninwe kwingidila mingilo ikola.” (Mateo 4:10) Batumoni ba Yehova byobengidijanga kino kidyumu, o mwanda kebafetangapo fetyi ya Noele, Pasaka, nansha May Day, mwanda ano mafetyi i matambe ku butōtyi bwa baleza bakwabo pa kyaba kya Yehova. Ne kadi, kebafetangapo ne ano mafetyi alonda’ko.

  •  Kwanzaa. Dijina Kwanzaa “i ditambe ku bishima bya Kiswahidi matunda ya kwanza, bishintulula’mba ‘bipa bibajinji.’ Ino fetyi i mitambe ku mafetyi a mwangulo mubajinji mu mānga ya Afrika.” (Encyclopedia of Black Studies) Nansha bantu bamo byobamonanga amba Kwanzaa ke fetyipo ya kipwilo, Encyclopedia of African Religion iidingakanya na fetyi ya mu Afrika mwine “mobādi balambula baleza ne bakulutuba [bipa bibajinji] bu muswelo wa kwibafwija’ko.” Ibweja’ko amba: “I mushipiditu umo onka udi ne na Kwanzaa fetyi ya bene Afrika bashikete mu Amerika, mushipiditu wa kufwija’ko bakulutuba babo.”

  •  Fetyi ya Kweji 9 nansha 10. Ino “fetyi iloñwanga mwanda wa kutumbija leza mukaji kweji.” (Holidays, Festivals, and Celebrations of the World Dictionary) Palongwa ino fetyi “bana-bakaji ba ku mobo bafukatyilanga leza mukaji, kino kisela kitwanga mu Kishinwa amba kowtow.”—Religions of the World—A Comprehensive Encyclopedia of Beliefs and Practices.

  •  Nauruz (Nowruz). “Ino fetyi i mitambe ku Bazoroastre, i difuku dibadilwa mu mafuku ajila kutabuka mu kalandadiye kabo. . . . Mwendele bisela bya Bazoroastre, difuku dya fetyi ya Nowruz mu nsá ya Midi, badi bafeta kujoka kwa mushipiditu wa Midi witwa ne bu [Rapithwin]. Mungya abo uno mushipiditu wadi mujīkwe panshi na mushipiditu wa mu myeji ya mashika.”—United Nations Educational, Scientific and Cultural Organization.

  •  Shab-e Yalda. Ino fetyi iloñwanga mu Kweji 12 kitatyi kikalanga mwinya mwipi kupita bufuku. Dibuku Sufism in the Secret History of Persia dilombola’mba, ino fetyi “ikwatañene na butōtyi bwa Mithra,” leza wa kitōkeji. Bamo nabo bamonanga’mba ino fetyi ikwatañene na butōtyi bwa baleza dyuba ba Bene Loma ne Bangidiki. b

  •  Fetyi ya kulombola kufwija’ko. Pamo bwa fetyi ya Kwanzaa, ino fetyi i mitambe ku fetyi ya mwangulo wa kala mwine wadi utumbija baleza bavule. Mwenda mafuku, “bino bisela bitumbe byadi kebilongwa ne na kipwilo kya bwine Kidishitu.”—A Great and Godly Adventure—The Pilgrims and the Myth of the First Thanksgiving.

   Mafetyi emanine pa majende nansha pa kukulupila dyese. Bible unena’mba boba “bāla meza a leza wa Dyese” badi “mu bukata mwa boba baleka Yehova.” (Isaya 65:11) O mwanda Batumoni ba Yehova kebafetangapo ano mafetyi alonda’ko:

  •  Ivan Kupala. Dibuku The A to Z of Belarus dinena’mba: “Bantu bavule bakulupile amba, mu difuku dya [Ivan Kupala] bupangi bulupulanga bukomo bwa majende, bwine bubwanya kutalajibwa enka na bankanka ne ba dyese.” Poyashilwile, yadi fetyi ya bantu kebatōtapo Leza bene badi beifeta mu kitatyi kya mwaka kikalanga mwinya mulampe kupita bufuku. Inoko, enka na mulombwela’kyo dibuku Encyclopedia of Contemporary Russian Culture, “yatyangilwe ku fetyi ya Kipwilo [itwa bu “difuku dijila” dya Yoano Mubatyiji] kupwa kwa bajentaila kutyangwa mu bwine Kidishitu.”

  •  Fetyi ya Mwaka Mupya (ya bashinwa nansha bene korea). “Mu kino kitatyi kya mwaka, bisaka, balunda ne babutule bekimbilanga dyese, balombola bulēme ku baleza ne mishipiditu, ne kwisakila būmi buyampe mu mwaka ulonda’ko.” (Mooncakes and Hungry Ghosts—Festivals of China) Mo monka ne fetyi ya Mwaka Mupya ya bene Korea “baloñanga’mo butōtyi bwa bankambo, bisela bya kupanga nabyo mishipiditu mibi ne kwisakila dyese mu Mwaka Mupya. Kadi bakimbanga ne biyukeno bya kwibakwasha bayuke bikalongeka mu mwaka mupya.”—Encyclopedia of New Year’s Holidays Worldwide.

   Mafetyi emanine pa mulangwe wa amba muya keufungapo. Bible unena patōkelela amba muya ufwanga. (Ezekyele 18:4) O mwanda Batumoni ba Yehova kebafetangapo mafetyi alonda kunshi’a, mene akankamika nkulupilo ya amba muya keufungapo:

  •  Difuku dya Myuya Yonso (Difuku dya Bafu). Mungya New Catholic Encyclopedia, dino i difuku dya “kuvuluka bantu bakikōkeji betushile. Tamba mu myaka ya 500 Y.M. kutūla ku myaka ya 1 500 Y.M. bantu bavule bādi bakulupile amba myuya idi mu kikungilo imwekelanga bantu beisanshije poyakidi myumi mu bu bibanda, bamfwityi, byula, ne mu miswelo mikwabo.”

  •  Fetyi ya Qingming (Ch’ing Ming) ne ya Bibanda Bikalabale. Ano mafetyi onso abidi aloñwanga mwanda wa kulēmeka bankambo. Dibuku Celebrating Life Customs Around the World—From Baby Showers to Funerals dinena’mba, paloñwanga Ch’ing Ming, “byakudya, bitomibwa, ne lupeto lwa papye bisōkwanga mwanda wa bafwe kebakyenda na nzala nansha na kyumwa ne amba kebakabulwa lupeto.” Dino dibuku dinena monka amba “mu Kweji wa Bibanda Bikalabale, nakampata mu bufuku bumwekanga kweji mutuntulu, [bantu bafetanga ino fetyi bakulupile amba] kudi kipwano kikatampe pa bukata bwa bafwe ne bōmi kupita mobikadilanga mu bufuku bukwabo bo-bonso. O mwanda i kya mvubu kukimba’ko muswelo wa kutalaja bafwe ne kulēmeka bankambo.”

  •  Fetyi ya Chuseok. Dibuku The Korean Tradition of Religion, Society, and Ethics dinena’mba, mu ino fetyi mwikalanga ne “kupa myuya ya bafwe byakudya ne vinyu.” Bino bitapwa bilombola “nkulupilo ya amba myuya ya bantu yendelelanga kwikala’ko kupwa kwa imbidi yabo kufwa.”

   Mafetyi adi na bilongwa bya majende. Bible unena’mba: “Muntu ubuka lubuko, nansha ulonga bya maleñanya, nansha wa mitāmu, nansha wa majende, muntu uloa bakwabo, ne wipangula babuka na bibanda nansha kilumbu, nansha wipangula bafwe . . . i wa munyanji kudi Yehova.” (Kupituluka mu Bijila 18:10-12) Pa kushala batōka mu mwanda utala majende—mwine mubadilwa kubuka na ñenyenye—Batumoni ba Yehova kebafetangapo Halowine nansha ano mafetyi alonda’a:

  •  Mwaka Mupya wa Sinhala ne Tamil. “Mu bisela biloñwanga mu ino fetyi . . . mubadilwa ne kuvuija mingilo pa kitatyi kitungilwe na babuka na ñenyenye na mulangwe wa amba kulonga namino kusa kuvudija madyese.”—Encyclopedia of Sri Lanka.

  •  Songkran. Dijina dya ino fetyi ya bene Azia “i ditambe ku kishima kya Kisanskrite . . . kishintulula ‘kujina’ nansha ‘kushinta,’ kadi [ino fetyi] ilombolanga kwenda kwa dyuba mu bisansa bya ñenyenye ya zodiaka itwa bu Mukōko Mulume.”—Food, Feasts, and Faith—An Encyclopedia of Food Culture in World Religions.

   Mafetyi a mu butōtyi adi mu Bijila bya Mosesa, mene āfudile na kitapwa kya Yesu. Bible unena’mba: “Kidishitu e mfulo ya Bijila.” (Bene Loma 10:4) Bene Kidishitu bakimwenanga mu misoñanya idi mu Bijila bya Mosesa byāpelwe Isalela wa kala. Inoko, kebafetanga’po mafetyi adi’mo, nakampata oa ebatwala kudi Meshiasa mwine ukulupilwe na bene Kidishitu amba ke mwiye kala. Bible unena’mba, “Bino’bi i munjiñininya wa bintu bīya kumeso, ino bintu binebine i bya Kidishitu.” (Bene Kolose 2:17) Ano mafetyi adi kunshi’a byoabadilwa mu mafetyi ke mafikidije kitungo kyao, ne byoadi na bisela bimo kebikwatañenepo na Bisonekwa, o mwanda Batumoni ba Yehova kebafetanga’opo:

  •  Hanukkah. Mu ino fetyi bavulukanga’mo kupānwa dipya kwa tempelo ya Bayuda mu Yelusalema. Ino Bible unena’mba Yesu wāikele ke Kitobo Mukatampe wa “pema mukatampe kadi mubwaninine mpata [nansha’mba, tempelo] wampikwa kulongwa ku makasa, ko kunena’mba, ke wa buno bupangipo.” (Bahebelu 9:11) Ku bene Kidishitu, ino tempelo ya ku mushipiditu yapingakene tempelo ya mu Yelusalema.

  •  Rosh Hashanah. Dino i difuku dibajinji dya mwaka wa Bayuda. Mu bitatyi bya kala, mu ino fetyi bādi balambula’mo Leza bitapwa bya pa bula. (Umbadilo 29:1-6) Inoko Yesu Kidishitu byadi Meshiasa, wāfudije “kitapwa ne kyabuntu kilambulwe,” byāikala byampikwa mvubu ku meso a Leza.—Danyele 9:26, 27.

•   Le mu kino kinkumenkume mulomba bipwilo bishileshile bitōtele pamo?

   Musoñanya wa mu Bible: “Le muntu mwitabije ne wampikwa kwitabija pobeifwanine i paka le? Le tempelo ya Leza ne bilezaleza pobeivwanikile i paka le?”—2 Bene Kodinda 6:15-17.

   Nansha Batumoni ba Yehova byobaloñanga bukomo bwa kwikala mu ndoe na balondakani nabo ne kulēmeka bwanapabo bwa muntu ne muntu bwa kwitongela kyafwaninwe kukulupila, ino bapelanga kufeta mafetyi alomba bipwilo bifetele pamo. Tala ano mafetyi amo:

   Mafetyi alēmekeja muntu wa kipwilo mutumbe ne binkumenkume bilomba kutōtela pamo kwa bipwilo bishileshile. Pādi paludikila Leza bantu bandi ba pa kala mu ntanda mipya mwine mwādi bekadi batōta mu bipwilo bingi, wēbalombwele amba: “Kufwaninwepo kusamba nabo kipwano nansha na baleza babo bene. . . . Shi wingidile baleza babo, nankyo bine dikekala dikinga kodi.” (Divilu 23:32, 33) O mwanda Batumoni ba Yehova kebafetangapo mafetyi alonda’a.

  •  Loy Krathong. Mu ino fetyi ya bene Tailande, “bantu baloñanga bibakudi bya mani baela’mo mabuji nansha tumityi twa ensense, kupwa batūla kibakudi’kya pangala pa mema. Balañanga’mba kibakudi’kya kikasonsolwela kishoto kulampe. Mu ino fetyi bavulukanga’mo lwayo lujila lushile Buddha.”—Encyclopedia of Buddhism.

  •  Difuku dya Kwisāsa dya Ntanda. Boba batanwanga ku ino fetyi “Betabijanga [ku] lwitabijo lwa bwine Kidishitu,” mungya binenwa bya muntu wa lupusa bidi mu The National, dipepala dya mu Papuazi-Nuvele-Giné. Unena’mo amba kufeta ino fetyi kukwashanga “kuningija misoñanya ya bwine Kidishitu mu ntanda.”

  •  Vesak. “Ino i fetyi ijila bininge mu mafetyi a bene Buddha, mwine mobavulukanga kubutulwa kwa Buddha, mwaātambwidile kitōkeji, ne lufu lwandi, paāfikīle pa Nirvana.”—Holidays, Festivals, and Celebrations of the World Dictionary.

   Mafetyi adi na bisela kebidipo mu Bible. Yesu wālombwele bendeji ba bipwilo amba: ‘Mubaalamuna kinenwa kya Leza ke kya bitupu mwanda’tu wa kishi kyenu.’ Ne kadi wānenene bitala butōtyi bwabo amba i bwa bitupu mwanda bādi bafundija “bijila bya bantu amba yo mfundijo.” (Mateo 15:6, 9) Kudi binkumenkume bivule bya bipwilo bipelanga kulonga Batumoni ba Yehova mwanda batele mutyima ku kino kidyumu.

  •  Epiphany (Timkat Difuku dya Balopwe Basatu, nansha Los Reyes Magos). Mu ino fetyi bavulukanga’mo kupempulwa kwakapempwilwe Yesu na babuka na ñenyenye nasha lubatyijo lwa Yesu. Ino fetyi “yālengeje mafetyi amo a bajentaila ādi alongwa mu muketeko wa mvula mene ādi alēmekeja baleza ba mema a mulungu, minonga ne tuminonga ke a bwine Kidishitu.” (The Christmas Encyclopedia) Timkat, fetyi iifwene nayo “idi na bisela bivule.”—Encyclopedia of Society and Culture in the Ancient World.

  •  Fetyi ya Kutekwinwa Mūlu kwa Mujike Madia. Ino fetyi idi na nkulupilo ya amba inandya Yesu wātekwinwe mūlu na umbidi wandi wa bu muntu. Dibuku Religion and Society—Encyclopedia of Fundamentalism dinena’mba, “Ino nkulupilo keyādipo iyukene ku bene Kidishitu babajinji, ne kadi keidipo mu Bisonekwa.”

  •  Fetyi ya Kwimita Pampikwa Bubi. “Kwimita [kwa Madia] Pampikwa Bubi kekutelelwepo mu Bible . . . i butyibi bwākwete Kipwilo.”—New Catholic Encyclopedia.

  •  Kareme. Mungya New Catholic Encyclopedia kino kitatyi kya kwisāsa ne kushikilwa na nzala kyātūdilwe’ko mu “myaka ya katwa ka buná,” myaka 200 ne kupita kupwa kwa Bible kulembwa yense mutuntulu. Encyclopedia yānenene pa bitala difuku dibajinji dya Kareme amba: “Kilongwa kya kushinga bantu ba kikōkeji buto pa mapala Difuku Dya Busatu dya Buto kyāikele ke kilongwa kivulukwa ntanda yonso tamba ku Kitango kya Benevento mu 1091.”

  •  Meskel (nansha, Maskal). Dibuku Encyclopedia of Society and Culture in the Medieval World dinena’mba mu ino fetyi ya bene Efiopya bafetanga’mo “kusokolwa kwa Musalaba wa Bine (kwine kwāpopelwe Kidishitu), na kwakija tumidilo ne kuja koku betujokoloka.” Ino Batumoni ba Yehova kebengidijangapo musalaba mu butōtyi bwabo.

•   Le i fetyi itumbija muntu, bulongolodi kampanda, nansha kyelekejo kya ntanda?

   Musoñanya wa mu Bible: “Yehova wanena namino amba: “Afingwe mafingo yewa muntu ukulupila mu bantu ba bituputupu, ukulupila mu bukomo bwa muntu, kadi wa mutyima upaluka kudi Yehova.’”—Yelemia 17:5.

   Nansha Batumoni ba Yehova byobafwijanga’ko ne kulombelela’ko bakwabo, ino kebatanwangapo ku binkumenkume ne ku mafetyi adi pamo bwa ano alonda’ko:

   Fetyi ya kulēmekeja muludiki nansha muntu mukwabo wa bulēme. Bible unena’mba, “Pa mwanda wa būmi bwenu, lekai kukulupila muntu wa bitupu, aye i umpuya’tu bitupu mu mapunge a myulu yandi. Lelo kyomumubangila i kika?” (Isaya 2:22) O mwanda Batumoni ba Yehova kebafetangapo mafetyi pamo bwa fetyi ya kubutulwa kwa mfumu.

   Difuku dya kulēmeka ndalapo ya ntanda. Batumoni ba Yehova kebafetangapo Difuku dya Ndalapo. Mwanda waka? Mwanda Bible unena’mba: “Mwilamei ku bilezaleza.” (1 Yoano 5:21) Bantu bavule dyalelo kebamonengapo ndalapo bu kilezaleza—kintu kitōtwa—inoko mulembi wa mānga Carlton Joseph Huntley Hayes walembele amba: “Kyelekejo kikatakata kya lwitabijo lwa mushipiditu wa kufwila ntanda ne kité kya mutōtelo wa muzo i ndalapo nansha lwembela.”

   Mafetyi nansha binkumenkume bitumbija ujila. Le byāikele namani muntu utyina Leza paāfukatyile Petelo? Bible unena’mba: “Petelo wamwimika, kamunena’mba: ‘Imana; ami nami ne muntu’tu.’” (Bilongwa 10:25, 26) Petelo nansha ke batumibwa bakwabo bene byokebāitabijepo kupebwa bulēme bwa pa bula nansha kutōtwa, Batumoni ba Yehova nabo kebatanwangapo ku binkumenkume bilēmekeja boba bamonwa bu bajila, pamo bwa mafetyi alonda’ko’a:

  •  Difuku dya Bajila Bonso. “Fetyi ya kulēmeka bajila bonso. . . . Kutambile ino fetyi kekuyukenepo biyampe.”—New Catholic Encyclopedia.

  •  Fetyi ya Mwana-Mukaji wa Guadalupe. Ino fetyi i ya kulombola bulēme kudi “mwana-mukaji ujila wa lupeto wa mu Meksike,” mwine wādi umonwa na bavule bu Madia inandya Yesu. Binenwanga amba, wāmwekēle mu kingelengele muntu umo wa ku madimi mu 1531.—The Greenwood Encyclopedia of Latino Literature.

  •  Difuku dya Dijina. Dibuku Celebrating Life Customs Around the World—From Baby Showers to Funerals dinena’mba, “Difuku dya dijina i fetyi ya kuvuluka ujila mwine obasesele dijina ne kwinika’dyo mwana mu difuku dyabutulwa nansha difuku dyaitabija mu kipwilo kupityila ku bisela.” Dibweja’ko amba kudi “bintu bivule biloñanga bantu mu dino difuku bikwatañene na mutōtelo.”

   Binkumenkume bya politike nansha bya bantu. Bible unena’mba, “I kipite buya kunyemena mudi Yehova kupita’ko kukulupila bantu.” (Ñimbo ya Mitōto 118:8, 9) Batumoni ba Yehova byobakulupīle amba bantu kebabwanyapo kupwija makambakano a mu ino ntanda poso’nka Leza, o mwanda kebatanwangapo ku fetyi ya Difuku dya Bunkasampe nansha Difuku dya Balolo, mene akwatakanya politike nansha bisumpi bya bantu. I enka pa buno bubinga bobapelelanga kufeta mafetyi a bantu basaka bonso bekale mu ludingo lumo nansha mafetyi adi bwa ano. Ino abo, bayukile amba i enka Bulopwe bwa Leza bo bukapwija makambakano atala kwisañuna kwa nkoba ne kulengeja bantu bonso bekale mu ludingo lumo.—Bene Loma 2:11; 8:21.

•   Le fetyi’ya imwekejanga kabila nansha ntanda kampanda bu mipite makwabo?

   Musoñanya wa mu Bible: “Leza kadipo na mboloji, ino mu mizo yonso yewa muntu umutyina ne ulonga byoloke ye witabijibwa nandi.”—Bilongwa 10:34, 35.

   Nansha Batumoni ba Yehova bavule byobasenswe matanda, bapelanga kutanwa ku binkumenkume bimwekeja matanda nansha tubila tumo bu bipite bikwabo, pamo bwa bino bidi kunshi’ku.

   Binkumenkume bitumbija bibumbo bya divita. Yesu kākankamikilepo divita, ino aye wālombwele bandi bana ba bwanga amba: “Sanswai nyeke balwana nenu ne kulombelela boba bemupangapanga.” (Mateo 5:44) O mwanda Batumoni ba Yehova kebafetangapo mafetyi alēmekeja basola, mwine mubadilwa ne ano alonda’ko:

  •  Difuku dya Anzac. “Anzac i mutelelo wa mu kīpi wa dijina Australian and New Zealand Army Corps [kisumpi kya bulwi kya mu Ostrali ne mu Nuvele-Zelande]. Mwenda mafuku Difuku dya Anzac dyāikele ke difuku dya kuvuluka na bulēme boba bafwile ku divita.”—Historical Dictionary of Australia.

  •  Fetyi ya Basola ba Kala (itwanga ne bu Difuku dya Kuvuluka, Dya Yenga Divulukwa, nansha amba Difuku dya Kivulukilo). Ano mafetyi alēmekejanga “ba mudyavita ba kala ne boba bafwile mu mavita a ntanda yabo.”—Encyclopædia Britannica.

   Mafetyi muvulukwa mānga ya ntanda nansha difuku dya bwanapabo. Yesu wānenene bitala bandi bana ba bwanga amba: “Abo ke ba ino ntandapo, monka monkikadilepo wa ino ntanda.” (Yoano 17:16) Nansha Batumoni ba Yehova byobasangelanga kufunda mānga ya ntanda, ino bekalanga besansanye na mafetyi pamo bwa ano alonda’ko:

  •  Difuku dya Ostrali. Mungya Worldmark Encyclopedia of Cultures and Daily Life, mu ino fetyi bavulukanga’mo “difuku dya mu 1788 pāimikile basola ba mu Angeletele ndalapo yabo [mu Ostrali] ne kwiitela bu ke ntanda ibikelwe nabo.”

  •  Difuku dya Guy Fawkes. I “difuku dya ntanda dya kuvuluka muswelo wākomenwe Guy Fawkes ne Bakatolika kuponeja Mulopwe James I ne Buludiki [bwa mu Angeletele] mu 1605.”—A Dictionary of English Folklore.

  •  Difuku dya Dipandá. Mu matanda mavule, dino i “difuku ditūdilwe’ko mwanda wa bantu bonso bavuluke mwaka ne mwaka mwāpedilwe ntanda bwanapabo.”—Merriam-Webster’s Unabridged Dictionary.

•   Le mu fetyi’ya mulongekanga bilongwa bya kubulwa kwibeja ne mwiendelejo mubi?

   Musoñanya wa mu Bible: “Kitatyi kyapita kibemubwana kyomwadi mufikidija kiswa-mutyima kya mizo pomwadi mulonga bilongwa bya kwiendeja pampikwa bumvu, bilokoloko bya kubulwa kwibeja, mutomeno-mpata, mafetyi mabimabi, kutomatoma mālwa mangi, ne butōtyi bwa bilezaleza bujilula bijila.”—1 Petelo 4:3.

   Kukwatañana na uno musoñanya, Batumoni ba Yehova bepukanga mafetyi mudi mutoneno-mpata ne kemwibejapo bantu. Batumoni ba Yehova basangelanga kwitana pamo na balunda, ne kadi babwanya enka ne kutoma mālwa, inoko na ndingamano. Baloñanga bukomo bwa kulonda ano madingi a mu Bible a amba: “Nansha mudye nansha mutome nansha mulonge kintu kyo-kyonso, longai byonso mwanda wa ntumbo ya Leza.”—1 Bene Kodinda 10:31.

   O mwanda Batumoni ba Yehova kebatanwangapo ku makarnavale ne ku binkumenkume biifwene nabyo bikankamika mwiendelejo wampikwa kwendela’mo upelejibwe na Bible. Muno mubadilwa ne masobo a Bayuda a Pudimi. Nansha Pudimi byoyādi ilongwa pa kala mwanda wa kuvuluka kunyongololwa kwa Bayuda mu myaka katwa ka butano Y.K., dibuku Essential Judaism dinena’mba, pano bimweka bu “dino difuku i karnavale ya Bayuda nansha Mardi Gras.” Bavule batanwanga’ko, “beinanyanga (divule dine bana-balume bavwala bivwalwa bya bana-bakaji), beendeja pampikwa kwijiba, batoma mālwa mavule, ne kulenga lungwe bininge.”

 Aa. Bible ufundijanga bantu basanswe ne kulēmeka bantu ba mu byabo bisaka, pampikwa kubanga nkulupilo yabo. (1 Petelo 3:1, 2, 7) Shako shi Kamoni wa Yehova waleka kutanwa ku binkumenkume kampanda, bantu bamo mu kyandi kisaka babwanya kufītwa, kwiivwana bibi, enka ne kumona amba webasūla. Ino nansha nankyo, Batumoni ba Yehova baloñanga bukomo bwa kukulupija babutule babo amba bebasenswe, ne kwibashintulwila na bunwa bubinga bwine bobapelela kwilunga nabo, ne kadi bebapempulanga mu mikenga mikwabo.

 Aa. Bakulupile amba muntu ense unenwe kwikwatyila butyibi aye mwine. (Yoshua 24:15) Batumoni ba Yehova ‘balēmekele bantu ba miswelo yonso,’ pampikwa kubanga nkulupilo ya bipwilo byabo.—1 Petelo 2:17.