Nabutwidilwe mu Uganda mu kipindi kya Gomba. Bantu bavule ba kwine’kwa badi balanda bininge. Mu kyetu kibundi byokemwadipo mudilo wa nshinga, twadi twimunikila bufuku na malampi.

 Bambutwile bami babidimye, bavilukile ku Rwanda baenda mu Uganda. Badi badima kafé ne makonde, kadi ku makonde badi benga’ko mālwa etwa bu waragi adi avudile kutoma bantu bavule. Kadi bami bambutwile badi bamunine banzolo, bambuji, bangulube, ne bañombe. Bibidiji byetu ne bintu byobamfundije byanengeje nange amba mukaji ufwaninwe’nka kukōkela wandi mulume kitatyi kyonso, ne amba kafwaninwepo nansha dimo kuleta milangwe yandi.

 Ponabwenye myaka 23, navilukila mu Rwanda, mwine monadi ñenda kukaja na bankasampe ba yami myaka mu mabala a bufuku. Nadi mvudile kwenda bininge mu bala imo pa ano, ebiya mwimaniji wampa kalata ka kutwela nako ku bitupu. Kadi nadi nsenswe mafilime a bya lūma. Bantu bonadi mpwene nabo, ne kwipwija mukose kwami byanengeje nsanswe bya lūma ne busekese.

 Mu 2000, twashikata na nsongwakaji witwa bu Skolastique Kabagwira, twabutula nandi bana basatu. Mungya byobamfundije pa bunkasampe, nadi nsaka umfukamina pa kuñimuna ne pa kunomba kintu. Kadi nadi nanga’mba bintu byonso bya kisaka i byami kasuku, byombwanya kwingidija monso monsakila. Divule dine nadi ntaluka ku njibo kyolwa ne kujokela’ko ke ku nsá ya busatu ya ku lubanga kadi mukolwe. Nadi nkōkola ku njibo, ino shi Skolastique waije kunshitwila, nadi mukupila.

 Mu kine kitatyi’kya, nadi ñingila bu mukulu wa kaji ku sosiete ya balami, kadi nadi tambula mfutwa miyampe. Ku njibo, Skolastique wadi ulonga bukomo bwa kunekenya nkapwile mu kyabo kipwilo kya pantekote, na kulanga’mba mbwanya kushinta. Ino nkyadipo nsaka kwenda nandi ku kipwilo. Pa kyaba kya kushinta, nasanswa mwana-mukaji mukwabo. Pa mwanda wa mwiendelejo wami wa kimpuma ne wa busekese, Skolastique wasela betu bana basatu, wakajokela kudi bambutwile bandi.

 Mulunda netu umo mununu wesambila nami pa mwadi mwikadile būmi bwami. Wankankamika njokeje Skolastique. Waunena’mba bobe bana bayampe kebafwaninwepo kwikala kulampe na abe shabo. Ebiya mu 2005, naleka’byo kutoma mālwa, naleka uno mwana-mukaji, kupwa najokela kudi Skolastique. Mu 2006 twesonga. Inoko nadi nekisenswe bya lūma kadi ntuka wami mukaji.

 Mu 2008, Joël Kamoni wa Yehova umo waiya ku yetu njibo, naivwana musapu wandi. Baendelela kumpempula kyaba ne kyaka na Bonaventure, Kamoni mukwabo, twisambila nabo bininge pa Bible. Nadi ngipangula bipangujo, nakampata pa mukanda wa Kusokwelwa. Na bubine, nadi nkimba kwibalengeja bamone amba Batumoni kebadipo na bubinga. Kimfwa, naipangwile amba mwanda waka Batumoni banenanga’mba “kibumbo kikatampe” kitelelwe mu Kusokwelwa 7:9 kikekala pano pa ntanda, aye vese papo unena’mba “[kīmene] kumeso kwa lupona [lwa Leza] ne ku meso a Kana ka Mukōko,” Yesu Kidishitu. Joël wadi ulondolola bipangujo byami na kitūkijetyima. Kimfwa, wanombwele kisonekwa kya Isaya 66:1, mwine munena Leza amba ntanda i “kitūlo kya maulu” andi. Nanshi na bubine kibumbo kikatampe kīmene ku meso a lupona lwa Leza pano pa ntanda. Kupwa natanga kisonekwa kya Ñimbo ya Mitōto 37:29, kinena’mba boloke bakekalanga nyeke pano pa ntanda.

 Mwenda mafuku, naitabija kwifunda Bible. Kupwa Bonaventure kaefunde Bible na Skolastique ne ami. Potwadi twifunda Bible, byonefundile byanengeja nsake kushinta būmi bwami. Nefundile kumona wami mukaji na bulēme. Nkyakidipo kadi musakila afukame kumeso kwa kuñimuna nansha kwa kunomba kintu, kadi naleka’byo kulanga’mba bintu byonso bya kyetu kisaka i byami bunka. Naleka’byo ne kutala mafilime a bya lūma. Kushinta uno muswelo kwadi kukomo kadi kulomba kwīfula kwa binebine ne kwityepeja.

 Myaka mityetye ku ngalwilo, natumine Christian, wami mwana mubajinji kukashikata na babutule mu Uganda. Ino pa kupwa kutanga kisonekwa kya Kupituluka mu Bijila 6:4-7, najingulula’mba ami ne wami mukaji bo badi na kiselwa ku meso a Leza kya kulela betu bana, ne kwibafundija misoñanya ya Leza. Bine, batwe ne wetu mwana, twasangele bininge paajokēle ku njibo!

 Nefundile amba Yehova i Leza wa lusa, kadi nkulupile amba i mundekele ngikadila ne mwiendelejo wami wa kala. Ne musangale pa kwitabija kwaitabije Skolastique kwifunda nami Bible pamo. Twapēne būmi bwetu kudi Yehova ne kubatyijibwa batwe bonso mu mafuku 4 Kweji 12, 2010. Pano twi bekulupile, tudi na nsangaji mu kisaka mwanda tulondanga misoñanya ya mu Bible. Wami mukaji i musangale mwanda njokelanga ku njibo pa kupwa’tu kwa kaji. Kadi i musangale mwanda mulongelanga bintu na kanye ne bulēme, nakwete ami mwine butyibi bwa kuleka kutoma mālwa, ne kadi nkikidipo muntu wa kimpuma. Mu 2015, bantongele bu mukulumpe mwanda wa kukwasha ku mwingilo wa kukumba kipwilo kyetu. Mu betu bana batano, basatu ke babatyijibwe.

 Ponashilwile kwifunda Bible na Batumoni ba Yehova, nkyadipo ngitabija bupofu byonso byobadi bamfundija. Ino nasangedile muswelo obadi bengidija Bible pa kulondolola bipangujo byami. Ami ne Skolastique twaivwanije amba shi twitela bu bengidi ba Leza wa bine, tufwaninwe kwiendeja mungya misoñanya yandi pa kyaba kya kwiifutulula. Bine, nemusangale bininge kukoka kunkokēle Yehova kwadi ne pa kubadilwa kombadilwa dyalelo mu kisaka kyandi kya ku mushipiditu. Ponangulukilanga pa būmi bwami bwa pa kala, nkulupile amba na bukwashi bwa Leza, muntu yense wampikwa budimbidimbi ubwanya kushinta mwanda wa kumusangaja.