Batumoni ba Yehova bapwidilanga mu kifuko kyabo kya kutōtela’po kitwa bu Njibo ya Bulopwe, misunsa ibidi yenga ne yenga. Le i bika bipitanga’ko, le i muswelo’ka obwanya kumwena’mo shi ubatanwa’ko?

•  I bika biloñwanga ku Njibo ya Bulopwe?

•  Mwanda waka ufwaninwe kutanwa’ko?

•  Binena’po bakwenu

 Njibo ya Bulopwe i kifuko kya kwifundila’po bufundiji bwa kamweno budi mu Bible. Kupwila kulongelwa’po kukakukwasha:

•   wifunde bubine padi Leza.

•   wivwanije kine kilongekela myanda yotumona dyalelo.

•   wikale muntu muyampe mpata.

•    usokole balunda bayampe.

 Le wadi uyukile? Kifuko kipwidila’po Batumoni ba Yehova kitelwanga bu Njibo ya Bulopwe, mwanda besambilanga’po nakampata myanda ya Bulopwe bwa Leza.—Mateo 6:9, 10; 24:14; Luka 4:43.

 Ukamwena mu myanda ipita’ko. Misoñanya ya mu Bible ifundwa ku kupwila kwa Batumoni ba Yehova ikakukwasha ‘wikale na tunangu.’ (Nkindi 4:5) Ko kunena’mba Bible ukakukwasha wikale ukwata butyibi buyampe mu būmi bobe. Kadi ukakukwasha usokole malondololo ku bipangujo bya mvubu mpata mu būmi, kimfwa:

•   I kika kyotwikadile’ko?

•   Le Leza ye ufwaninwe kutopekwa pa masusu etu?

•   Shi muntu wafu wikalanga namani?

 Tala myanda imo īsambilwanga’po mu mīsambo ya ku kupwila kwetu kwa ku mfulo kwa yenga:

•   Mwanda Waka Ufwaninwe Kuludikwa na Bible?

•   I Kwepi Kokatana Bukwashi mu Kitatyi kya Tusuwa?

•   Bintu Bitulongela Bulopwe bwa Leza Dyalelo.

 “Mulunda nami wa ku masomo waile kupwila netu. Washikata pamo na kisaka kyetu, twalonda nandi kupwila mu bitabo byetu. Pa kupwa, wansapwila’mba watulumuka pa malondololo adi aleta bantu mu bipindi bya bipangujo. Wanena ne kunena’mba mu kipwilo kyabo kebadipo na bingidilwa bya kwifundila’mo na motwikadile nabyo’mu.”—Brenda.

 Le wadi uyukile? Ku Njibo ya Bulopwe, bityi i kushikata bitupu, kadi kekudipo mukongo wa lupeto.

 Bokatana’ko bakakukankamika. Bible utela bubinga bumo bufwaninwe bene Kidishitu kupwidila pamo amba i mwanda wa ‘kwikankamika batwe bene na bene.’ (Bahebelu 10:24, 25) Kupwana na bantu babadikije Leza ne bakwabo kumeso i mwanda ukankamika mutyima mu ino ntanda ya bantu besakila.

 “Nkōkanga ne kupungila shi naingila difuku dituntulu, inoko bantu bontananga ku Njibo ya Bulopwe banengejanga nyeke neivwane biyampe. Ponjokela kwinjibo ntamba ku kupwila, ngikalanga na nsangaji ne na bukomo bwa kulwa na difuku dilonda’ko.”—Elisa.

 Le wadi uyukile? Ntanda yonso kudi bipwilo bya Batumoni ba Yehova 120000 ne kupita bipwidila pa bifuko 60000 ne kupita. Mwaka ne mwaka kūbakwanga nansha kulongolola Mobo a Bulopwe kintu kya 1500 mwanda wa kuvula kwa bantu batanwa’ko. a