Le Banefilimi Bādi Bāni?
Bilondolola Bible
Banefilimi bādi batumpangala, lutundu lusenswe bya lūma lutabukile bantu bukomo lwābutwile bamwikeulu babi na bana ba bantu bana-bakaji mu mafuku a Noa. a
Nsekununi ya mu Bible inena’mba, “bana ba Leza wa bine bāshilula kujingulula’mba bana ba bantu bana-bakaji i bayampe mapala.” (Ngalwilo 6:2) Bano “bana ba Leza” i bamwikeulu bātombokēle Leza, “bāshiya kīkalo kyabo kine kibafwaninwe” momwa mūlu, bāvwala imbidi ya bantu, “bāanza kusela bu bakaji bonso bobādi basaka.”—Yude 6; Ngalwilo 6:2.
Bana ba nsanga bobābutwile kebādipo mwikadilanga bana bonso’ba. “Kwādi Banefilime pano pa ntanda mu oa mafuku ne mu alondele’po.” (Ngalwilo 6:4) Banefilimi bādi babipalapala bapuñame, bantu ba kasusu bāyujije bya lūma pano pa ntanda. (Isaya 25:4) Bible wibatela bu “bantu bakomokomo ba kitatyi kya kala, bantu ba ntumbo.” (Ngalwilo 6:4) Bāshile munyuma mwabo tundwe ne moyo.—Ngalwilo 6:5; Umbadilo 13:33. b
Milangwe ya bubela pa Banefilimi
Milangwe ya bubela: Banefilimi bakidi’ko pano pa ntanda dyalelo.
Bubine: Yehova wāletele dilobe ntanda yonso mwanda wa konakanya ntanda ya kala ya bya lūma. Banefilimi bāonakanibwe pamo na bantu bonso babi. Ino Yehova wātōkelwe Noa ne kyandi kisaka mutyima, kadi i abo kete bapandile mu kine kitatyi’kya.—Ngalwilo 6:9; 7:12, 13, 23; 2 Petelo 2:5.
Milangwe ya bubela: Banefilimi bābutwilwe na bantu.
Bubine: Bashabo betwanga bu “bana ba Leza wa bine.” (Ngalwilo 6:2) Bible wingidijanga bino bishima bimo byonka mwanda wa kwisambila pa bamwikeulu. (Yoba 1:6; 2:1; 38:7) Bamwikeulu bādi na bukomo bwa kuvwala ngitu ya bantu. (Ngalwilo 19:1-5; Yoshua 5:13-15) Mutumibwa Petelo wēsambīle pa “mishipiditu [idi] mu kifungo, yoya yātombokele pa kala kitatyi kyādi kilaije Leza na mutyima mutūke mu difuku dya Noa.” (1 Petelo 3:19, 20) Yude mulembi umo wa Bible nadi wēsambīle pobadi, wāshintulula’mba bamwikeulu bamo “kebālaminepo kyaba kyabo kibajinji ino bāshiya kīkalo kyabo kine kibafwaninwe.”—Yude 6.
Milangwe ya bubela: Banefilimi i bamwikeulu bāponene.
Bubine: Myanda idi kūlu ne kunshi kwa Ngalwilo 6:4 ilombola’mba Bamwikeulu kebādipo bamwikeulu, ino lutundu lwa nsanga lwābutwile bamwikeulu bāvwele ngitu ya bumuntu na bana-bakaji. Pāanjile bamwikeulu “kusela bu bakaji bonso bobādi basaka,” Yehova wānenene amba mu myaka 120 ukonakanya ntanda yampikwa bwine Leza ya mu kine kitatyi’kya. (Ngalwilo 6:1-3) Nsekununi ibweja’ko amba “mu oa mafuku” bamwikeulu bāvwele ngitu ya bantu “bādi ke balāla na bana-bakaji bana ba bantu,” ebiya bābutula “bantu bakomokomo ba kitatyi kya kala,” Banefilimi.—Ngalwilo 6:4.
a Kishima kya Kihebelu kyalamwinwe bu “Banefilimi,” kishintulula padi amba “bashindañani.” Dibuku dimo (Wilson’s Old Testament Word Studies) dinena’mba kino kishima kifunkila pa boba “baponena pa bantu na lupusa, bebatūta ne kwibaponeja.”
b Mwenda mafuku batubedibedi bene Isalela batelelwe mu Umbadilo 13:33, bāmwene bantu bapuñame bēbavulwije nsekununi ya Banefilimi, bene bāfwile ke papite myaka tutwa na tutwa.—Umbadilo 13:33; Ngalwilo 7:21-23.
Tala'po Bidi ne Bino:
BIPANGUJO BYA MU BIBLE BILONDOLWELWE
Le Bandemona Badi’ko Bine?
Le bandemona i bāni? Le bātambile kwepi?
KITEBA KYA MULAMI
Noa ‘Wānangile na Leza wa Bine’
MYANDA ITUTALA
Lomba Kwifunda Bible
Mwisambilei pa bipangujo bya mu Bible, yukila’ko bivule pa Batumoni ba Yehova.