Bubi kebulekelwapo bufunkila pa bilongwa ne ngikadila ilengeja kipya-mambo akomenwe kulekelwa na Leza. Lelo muntu ubwanya kwikala na ngikadila ya uno muswelo namani?

 Leza ulekelanga boba besāsa bubi bwabo, balonda misoñanya yandi mu būmi bwabo, ne balombola lwitabijo mudi Yesu Kidishitu. (Bilongwa 3:19, 20) Inoko muntu ubwanya kutokamina bininge mu bubi wakomenwa kushinta ngikadila nansha mwiendelejo wandi. Bible unena’mba uno muntu udi na “mutyima mubi” kadi ukomejibwanga “mutyima na bukomo bwa kyongo bwa bubi.” (Bahebelu 3:12, 13) Pamo bwa dīma disōkwe mu fūlu kedibwanyapo kubumbululwa monka, mutyima wa uno muntu ulwanga nyeke na Leza. (Isaya 45:9) Byokekudipo bubinga bwa kulekela uno muntu, i mulambikwe mambo a bubi kebulekelwapo.—Bahebelu 10:26, 27.

 Bayuda bamo bendeji ba bipwilo ba mu mafuku a Yesu bālongele bubi kebulekelwapo. Bādi bayukile amba Yesu wādi ulonga bingelengele na bukomo bwa mushipiditu ujila wa Leza, ino bānenene na nshikani amba bukomo bwandi bwādi butamba kudi Satana Dyabola.​—Mako 3:22, 28-30.

Bimfwa bya Bubi bobabwanya kulekela

•  Kutuka Leza pa mwanda wa kubulwa kuyuka. Kyaba kimo mutumibwa Polo wādi muntu utuka Leza, ino wānena mwenda mafuku amba: “Nafwidilwe lusa, mwanda nadi nonga nabya pampikwa kuyuka kadi pampikwa lwitabijo.”—1 Temote 1:13.

•  Makoji. Bible utela bantu bamo bālongele kyaba kimo makoji ino bashinta ngikadila yabo, Leza nandi wēbalekela.—1 Bene Kodinda 6:9-11.

“Le ne mulonge bubi kebulekelwapo?”

 Shi bine ushikilwe mwiendelejo obe wa pa kala wa bubi kadi usaka kushinta bya binebine, nabya kulongelepo bubi kebulekelwapo. Leza ubwanya’nka ne kukulekela bubi bumo bonka bolongele misunsa mivule shi mutyima obe keūminine’mopo.​—Isaya 1:18.

 Bantu bamo balañanga’mba i balonge bubi kebulekelwapo mwanda i balēmenenwe na milangwe ya kwitopeka. Inoko Bible ufundija’mba ketubwanyapo kukulupila nyeke milangwe yetu. (Yelemia 17:9) Leza ketupelepo lupusa lwa kutyibila muntu mambo, enka ne lwa kwityibila’o batwe bene. (Bene Loma 14:4, 12) Aye ubwanya kwitulekela nansha shi mutyima wetu ukitutopeka.—1 Yoano 3:19, 20.

Le Yudasa Isakadiota wālongele bubi kebulekelwapo?

 En-en. Makomwa-meso āmulengeje ebe lupeto lobādi baleta mwanda wa kwingila mwingilo ukola. Kadi wālangile amba utele balanda mutyima aye papo utele’o ku kulundika lupeto lwa kwiba. (Yoano 12:4-8) Kyaba kimo mutyima wa Yudasa wādi utele’nka ku kulonga bibi, waaba Yesu ku bityele 30 bya ndalama. Yesu wādi uyukile amba Yudasa kakesāsapo nansha dimo pa byaālongele, wāmwita bu “mwana wa bonakani.” (Yoano 17:12) Kino kishintulula’mba kitatyi kyādi kya kufwa Yudasa, wādi wa konakanibwa lonso, pampikwa lukulupilo lwa lusangukilo.—Mako 14:21.

 Yudasa kēsāshilepo bubi bwandi bya binebine. Wēsapwile ku bendeji ba bipwilo baākutyile nabo kitumba, ke kudipo Leza.—Mateo 27:3-5; 2 Bene Kodinda 7:10.