Lelo Madia I Inandya Leza?

VUMIJA MU

Bilondolola Bible

Aa, Bible kafundijangapo amba Madia i inandya Leza, nansha kunena’mba bene Kidishitu bafwaninwe kutōta Madia nansha kumutumbija. a Langa’po bidi:

Madia kānenenepo nansha dimo amba i inandya Leza. Bible ushintulula’mba, wābutwile “Mwanā Leza,” ke Leza mwinepo.—Mako 1:1; Luka 1:32.
Yesu Kidishitu kānenenepo amba Madia i inandya Leza nansha’mba ufwaninwe kutumbijibwa. Na bubine, aye wālemunwine mwana-mukaji umo wālemekele Madia bipitepite pa nsangaji ya kumubutula, wānena’mba: “Aa, ino, ba nsangaji i boba bevwana mwanda wa Leza ne kwiulama!”—Luka 11:27, 28.
Bishima “Inandya Leza” ne “Theotokos” (Ubutwile Leza) kebidipo mu Bible.
Bishima “Mulopwe Mukaji wa Mūlu” bitelelwe mu Bible, kebifunkilapo padi Madia, ino bifunkila pa leza mukaji wa bubela wādi utōtwa na bene Isalela batupondo. (Yelemia 44:15-19) Padi “Mulopwe Mukaji wa Mūlu” wādi Ishitala (Astarté), leza mukaji wa Babiloni.
Bene Kidishitu babajinji kebādipo batōta Madia, kadi kebādipo bamutumbija. Mulembi umo wa mānga unena’mba, bene Kidishitu babajinji “bādi bapela butōtyi bwa bilezaleza kadi bādi padi na moyo wa amba shi bate Madia mutyima byampikwa kwendela’mo, butōtyi bwabo bukamonwa bu butōtyi bwa leza mukaji.”—In Quest of the Jewish Mary.
Bible unena’mba Leza udi’ko nyeke. (Ñimbo ya Mitōto 90:1, 2; Isaya 40:28) Byakadipo na ngalwilo, nanshi kabwanyapo kwikala na inandi. Ne kadi, Leza kabwanyapo kubwana mu difu dya Madia; mwanda Bible unena patōkelela’mba madiulu keakokejapo kumubwana.—1 Balopwe 8:27.

Madia—I Inandya Yesu, ino ‘ke inandya Lezapo’

Madia wādi Muyuda wa kibutwila, kadi wātambile ku lutundu lwa Mulopwe Davida. (Luka 3:23-31) Bāmutōkelwe mutyima bikatampe kudi Leza pa mwanda wa lwitabijo ne kwipāna kwandi. (Luka 1:28) Leza wāmutongele ekale inandya Yesu. (Luka 1:31, 35) Kadi ba Madia ne wandi mulume Yosefa, bābutwile bana bakwabo.—Mako 6:3.

Nansha Bible byanena’mba Madia wāikele ke mwanā bwanga wa Yesu, ino kalombwelepo myanda mivule imutala.—Bilongwa 1:14.

Mwanda waka bantu bamo bamonanga Madia bu inandya Leza?

Bantu baānjile kutumbija Madia tamba ku mfulo kwa myaka katwa ka buná Yesu Ke Mwiye. Mu kine kitatyi’kya, Kipwilo kya Katolika kyāikele ke Mutōtelo wa Bulopwe bwa Loma. Mfulo mfulō, bantu bavule bajentaila bāikala ke bene Kidishitu ba dijina bitupu. Kadi kipwilo kyāitabija lufundijo lwa Busatu Busantu lwampikwa kukwatañana na bisonekwa.

Lufundijo lwa Busatu Busantu lwālengeje bantu bavule mu kipwilo bafule ku kulanga’mba shi Yesu i Leza, nabya Madia i inandya Leza. Mu 431 Yesu Ke Mwiye, bānenene ku kitango kya mu Efisesa amba Madia i “Inandya Leza.” Butōtyi bwa kutōta Madia bwāsambakene pāpwile Kitango kya mu Efisesa. Bajentaila pa kutwela mu kipwilo, bityebitye bapingakanya baleza bakaji ba bumeni, kimfwa Alatemise (Diana, ku bene Loma) ne Isis na byelekejo ne bankishi ba Madia Mujike.

Mu 432 Yesu Ke Mwiye, Papa Sixte III wāsoñanya bōbakile “Inandya Leza” kipwilo mu Loma. Kyāubakwa kubwipi na tempelo yāubakīlwe Lucine, leza mukaji wa Loma wa lubutulo. Mulembi umo unena’mba kino kipwilo i “kiyukeno kya nyeke kilombola’mba butōtyi bwādi butōtwa Inabana Mukatampe na bajentaila, bwāpingakanibwe na butōtyi bwa Madia pātwelele bwine Kidishitu mu Loma.”—Mary—The Complete Resource.

a Bipwilo bivule bifundijanga’mba Madia i inandya Leza. Babwanya kumutela bu “Mulopwe Mukaji wa Mūlu” nansha bu Theotokos, kishima kya Kingidiki kishintulula’mba “Ubutwile Leza.”