Lelo Kinenwa kya Leza I Ani Nansha I Bika?

VUMIJA MU

Bilondolola Bible

Divule, kishima “kinenwa kya Leza” nansha “mwanda wa Leza” kifunkilanga pa musapu wa Leza umo nansha mivule. (Luka 11:28) Mu mavese amo kishima “Kinenwa kya Leza” nansha “Kinenwa” kingidijibwanga bu kitenta.—Kusokwelwa 19:13; Yoano 1:14.

Musapu wa Leza. Bapolofeto bavule bādi banena’mba misapu yobādi basapula i kinenwa kya Leza. Kimfwa, Yelemia ushilula musapu wandi wa bupolofeto amba “kinenwa kya Yehova kyaiya kondi.” (Yelemia 1:4, 11, 13; 2:1) Mupolofeto Samwele nandi, kumeso kwa kusapwila Solo amba Leza wamutonge bu mulopwe, wānenene amba: “Abe imana pano nkusapwile kinenwa kya Leza.”—1 Samwele 9:27.

Kitenta. Mu Bible kishima “Kinenwa” i kingidijibwe kadi bu kitenta kya Yesu Kidishitu, paādi kipangwa kya ku mushipiditu mūlu nansha muntu pano pa ntanda. Tubandaulei’ko bubinga bumobumo bubingija uno mwanda:

Kinenwa wāikele’ko kumeso kwa bipangwa bikwabo byonso. “Ku ngalwilo wādi Kinenwa . . . Uno’u wādi ku ngalwilo na Leza.” (Yoano 1:1, 2) Yesu i “umbedi wa bipangwa byonso . . . Udi kumeso kwa bintu bikwabo byonso.”—Kolose 1:13-15, 17.
Kinenwa wāile pano panshi bu muntu. “Kinenwa waalamuka ke ngitu kadi waikala mu bukata mwetu.” (Yoano 1:14) Yesu Kidishitu “wekōlele aye mwine ne kwikala mu muswelo wa bu umpika, waikala muntu.”—Fidipai 2:5-7.
Kinenwa i Mwanā Leza. Mutumibwa Yoano pa kupwa kunena’mba “Kinenwa waalamuka ke ngitu,” wābwejeje’ko amba: “twabandile ntumbo yandi, ntumbo bwa yoya ya mwana wa bunka, itamba kudi shandi.” (Yoano 1:14) Yoano wālembele monka’mba: “Yesu i Mwanā Leza.”—1 Yoano 4:15.
Kinenwa udi na ngikadila ya Leza. “Kinenwa wādi leza.” (Yoano 1:1) Yesu “ye umwekeja ntumbo ya Leza kadi i kyelekejo kinekine kya mwaikadile.”—Bahebelu 1:2, 3.
Kinenwa uludikanga bu mulopwe. Bible unena’mba ku mutwe wa Kinenwa kya Leza kudi “tubāla twa bulopwe.” (Kusokwelwa 19:12, 13; kunshi kwa dyani) Kinenwa witwanga ne bu “Mulopwe wa balopwe ne Mfumwandya bamfumu.” (Kusokwelwa 19:16) Yesu witwanga bu “Mulopwe wa boba babikele bu balopwe kadi Mfumwandya boba babikele bu bamfumu.”—1 Temote 6:14, 15.
Kinenwa wingilanga bu musedi wa myanda wa Leza. Mobimwekela kitenta “Kinenwa” kifunkilanga pa muntu wingidijibwa na Leza mwanda wa kusapula myanda nansha bulombodi bwaleta. Yesu wālombwele amba wāvuije uno mwingilo pa kunena’mba: “Tata wauntumine i mumpe aye mwine mbila ya bya kunena ne bya kwisamba. . . . Penepo byonso byonesamba, nesambe’byo monka mwanombwedile’byo Tata.”—Yoano 12:49, 50.