Kalunganyembo (“Sheole” ne “Hadese” mu ndimi mibajinji yālembelwe’mo Bible) i kibundu, ke kifukopo kya mudilo mususulwa bantu. Le i ani wendanga mu kalunganyembo? I bantu bayampe ne babi bene. (Yoba 14:13; Ñimbo ya Mitōto 9:17) Bible unena’mba kino kibundu mwendanga bantu bonso, i “njibo kukabungakena bantu bonso bōmi.”—Yoba 30:23.

 Enka ne Yesu wāendele mu kalunganyembo paāfwile. Inoko “[kebāmushilepo] mu kalunganyembo,” mwanda Leza wāmusangwile.—Bilongwa 2:31, 32, Mukanda Ukola.

Le kalunganyembo i ka nyeke?

 Boba bonso benda mu kalunganyembo bakatamba’mo, bakasangulwa na Yesu kupityila ku bukomo bwa Leza. (Yoano 5:28, 29; Bilongwa 24:15) Bupolofeto budi mu Kusokwelwa 20:13 bwisambila pa lusangukilo lwa mu mafuku a kumeso amba, “lufu ne Kalunganyembo nabo balubula bafu badi monka.” (MK) Pakashala kalunganyembo bitupu; kekakekala’kopo monka, i kutupu kadi muntu ukenda’mo mwanda “lufu kelukekala’kopo dikwabo.”—Kusokwelwa 21:3, 4; 20:14.

 Inoko ke muntupo ense ufwanga, wendanga mu kalunganyembo. Bible ulombola’mba bantu bamo i batokamine mu bibi, kadi kebakashintapo nansha dimo. (Bahebelu 10:26, 27) Kitatyi kifwanga bano bantu, kebendangapo mu kalunganyembo, ino bendanga mu Ngehena, mine yelekeja bonakani bwa lonso. (Mateo 5:29, 30) Kimfwa, Yesu wālombwele amba bendeji bamo ba bipwilo banzazangi ba mu andi mafuku bakenda mu Ngehena.—Mateo 23:27-33.