Bine tudi na bubinga bwa kutyinina lufu walwana netu ne kulonga bukomo bwa kulama būmi bwetu. (1 Bene Kodinda 15:26) Inoko, moyo wampikwa kwendela’mo wa kutyina lufu wimanine pa myanda ya bubela nansha kabutyibutyi kalengeja bantu “bamunwe bupika mu būmi bwabo bonso.” (Bahebelu 2:15) Kuyuka bubine kukakukūla ku moyo wa bitupu wa kutyina lufu​—moyo ubwanya kukulengeja ukomenwe kusangela būmi.​—Yoano 8:32.

Bubine butala pa lufu

•   Bafwe kebayukilepo kintu. (Ñimbo ya Mitōto 146:4) Nanshi kufwaninwepo kutyina misanshi nansha masusu shi ubafu, mwanda Bible udingakanya lufu na tulo.​—Ñimbo ya Mitōto 13:3; Yoano 11:11-14.

•   Bafwe kebabwanyapo kwitusanshija. Nansha ke balwana netu ba kasusu i “bampikwa bukomo mu lufu.” (Nkindi 21:16) Bible unena’mba “mushikwa wabo ne mukao wabo ke byoneke kala.”​—Musapudi 9:6.

•   Lufu kelwitulengejangapo tuleke kwikala’ko lonso. Kupityila ku lusangukilo, Leza ukajokejeja bantu bafwile ku būmi.—Yoano 5:28, 29; Bilongwa 24:15.

•   Leza i mulae kitatyi ‘kekikekala’kopo lufu dikwabo.’ (Kusokwelwa 21:4) Bible unena pa dino difuku amba: “Boloke bakapyananga ntanda, kadi bakekalanga’po nyeke,” bakūlwe lonso ku moyo wa kutyina kufwa.—Ñimbo ya Mitōto 37:29.