Yoano Umbajinji 4:1-21
4 Banwe baswedibwe, kemwakitabijai binenwa byonso binenenwe ku mushipiditu,*+ inoko tompai binenwa binenenwe ku mushipiditu* mumone shi i bitambe kwa Leza,+ mwanda kubatambe bapolofeto ba bubela bavule mu ino ntanda.+
2 Talai mwa kuyukila binenwa binenenwe ku mushipiditu shi i bya kwa Leza: Binenwa byonso binenenwe ku mushipiditu bitabija’mba Yesu Kidishitu waile mu ngitu, i bitambe kwa Leza.+
3 Inoko binenwa byonso binenenwe ku mushipiditu kebitabijapo Yesu, kebitambilepo kwa Leza.+ Ne kadi, bino’bi byo binenwa binenenwe ku mushipiditu bya kinkwa na Kidishitu, byomwaivwene amba bīyanga,+ kadi pano bidi kala mu ino ntanda.+
4 A twana tutyetye, banwe mwi batambe kwa Leza, kadi mubebanekenya,+ mwanda yewa udi mu bumo nenu+ i mukatampe kutabuka yewa udi mu bumo na ino ntanda.+
5 Abo i batambe mu ino ntanda;+ o mwanda mwine banenanga byobya bitamba mu ino ntanda kadi ntanda nayo ibevwananga.+
6 Batwe twi batambe kwa Leza. Yewa uyuka Leza witutejanga;+ yewa katambilepo kwa Leza ketutejengapo.+ Pano e potushiyañenya binenwa binenenwe ku mushipiditu bya bine, ne binenwa binenenwe ku mushipiditu bya bubela.+
7 Banwe baswedibwe, twisanswei nyeke batwe bene na bene,+ mwanda buswe i bwa kwa Leza, kadi muntu ense usenswe i mubutulwe na Leza kadi uyukile Leza.+
8 Yewa ense kasenswepo kayukile Leza, mwanda Leza i buswe.+
9 Pano e pasokokēle buswe bwa Leza kotudi, amba Leza watumine wandi Mwana wa bunka+ mu ino ntanda mwanda wa tumone būmi kupityila kudi aye.+
10 Buswe bwine budi namino, ke kunenapo amba batwe twamusenswe Leza, ino amba aye wetusenswe watuma ne wandi Mwana bu kitapwa kya kupwanija*+ pa mwanda wa bubi bwetu.+
11 Banwe baswedibwe, shi e mwetusanshilwe Leza namino, nanshi tufwaninwe netu kwisanswa batwe bene na bene.+
12 I kutupu muntu ke mumone Leza nansha dimo.+ Shi twisanswe nyeke batwe bene na bene, nabya Leza udi nyeke motudi kadi buswe bwandi bubafikijibwa ku bubwaninine motudi.+
13 Pa kino tuyukile amba tudi nyeke mu bumo nandi, aye nandi mu bumo netu, mwanda wetupele mushipiditu wandi.
14 Ne kadi, batwe bano’ba twamwene kadi tusapulanga bukamoni amba Tata watumine wandi Mwana ekale umpandiji wa ino ntanda.+
15 Yewa ense witabija’mba Yesu i Mwanā Leza,+ nabya Leza udi nyeke mu bumo na yao muntu, aye nandi mu bumo na Leza.+
16 Kadi tubayuka ne kwitabija buswe bwitusenswe Leza.+
Leza i buswe,+ kadi yewa udi nyeke mu buswe udi nyeke mu bumo na Leza, ne Leza nandi udi nyeke mu bumo nandi.+
17 Enka nenki, e mwafikijibwa buswe ku bubwaninine motudi, amba twisambe pampikwa kafinda*+ mu difuku dya butyibi, mwanda monka mwaikadile aye, e motwikadile ne batwe mu ino ntanda.
18 Mu buswe kemudipo moyo,+ ino buswe bubwaninine bufundwilanga* moyo kulampe, mwanda moyo witujikakanyanga. I bine, yewa udi na moyo kafikijibwe ku bubwaninine mu buswe.+
19 Batwe tusenswe, mwanda aye wetusenswe dibajinji.+
20 Shi muntu unena’mba, “Nsenswe Leza,” inoko ushikilwe mwanabo, yao i mbepai.+ Mwanda yewa kasenswepo mwanabo,+ mwine wamwene, kakokejapo kusanswa Leza, mwine wakamwenepo.+
21 Kadi twatambwile ino mbila kwadi, amba yewa yense usenswe Leza ufwaninwe ne kusanswa mwanabo.+
Kunshi kwa Dyani
^ Kishima pa kishima i, “mishipiditu.”
^ Kishima pa kishima i, “mishipiditu yonso.”
^ Nansha’mba “kitapwa kya kupūta bubi; kya kutūkija nakyo mutyima.”
^ Nansha’mba “twikale na kikulupiji.”
^ Nansha’mba “bupangilanga.”
