Bilongwa bya Mafuku wa Bubidi 18:1-34
18 Yehoshafata wadi na bupeta ne ntumbo mingi,+ ino wasamba kipwano kya busongi na Ahaba.+
2 Ebiya mwenda myaka watūkila kudi Ahaba ku Samadia,+ Ahaba nandi wamutapila aye ne bantu baadi nabo kitapwa kya mikōko ne bañombe bangi. Wamusoñanya* akande kukalwa na Lamote-Ngileade.+
3 Ebiya Ahaba mulopwe wa Isalela wanena Yehoshafata mulopwe wa Yuda amba: “Le usa kwenda nami ku Lamote-Ngileade?” Nandi wamulondolola’mba: “Ami ngidi pamo bwa abe, bantu bami badi pamo bwa bantu bobe kadi tusa kukukwasha mu divita.”
4 Ino Yehoshafata wanena mulopwe wa Isalela amba: “Ipangula’po bidi munenena’po Yehova.”+
5 Penepo mulopwe wa Isalela wakongakenya pamo bapolofeto, bana-balume 400, kaebepangula’mba: “Le twende tukalwe na Lamote-Ngileade’ni nansha ndeke kwenda?” Nabo amba: “Kanda, Leza wa bine usa kumupāna mu kuboko kwa mulopwe.”
6 Ino Yehoshafata wanena’mba: “Le kuno kekudipo mupolofeto wa Yehova?+ Twipangulei kupityila kwadi nako.”+
7 Ponkapo mulopwe wa Isalela wanena Yehoshafata amba: “Kukidi muntu mukwabo+ kotubwanya kwipangwila Yehova; ino ami mushikilwe, mwanda kashā kanenene bupolofeto buyampe pa mwanda wami, poso’nka bubi nyeke.+ I Mikaya mwanā Imila.” Inoko, Yehoshafata wamunena’mba: “Mulopwe kafwaninwepo kunena nankyo.”
8 Penepa mulopwe wa Isalela waita mwingidi wa bulēme wa mu kipango wamunena’mba: “Kasele bukidi Mikaya mwanā Imila.”+
9 Ino mulopwe wa Isalela ne Yehoshafata mulopwe wa Yuda badi bashikete muntu ne muntu pa lupona lwandi, bavwele bivwalwa bya bulopwe; badi bashikete pa kipūdilo kya pa ntwelelo ya kibelo kya Samadia kadi bapolofeto bonso badi banena bupolofeto ku meso abo.
10 Ebiya Zedekia mwanā Kenaana welongela masengo a byuma kanena’mba: “Yehova wanena namino amba, ‘Usa kutunga* bene Shidea ano masengo enka ne byowibakuba.’”
11 Bapolofeto bakwabo bonso badi banena bupolofeto muswelo umo onka, amba: “Kanda ku Lamote-Ngileade, usa kunekenya;+ Yehova usa kumupāna mu kuboko kwa mulopwe.”
12 Ebiya mukendi waketyile Mikaya’wa wamunena’mba: “Tala! Bapolofeto bonso abanenena mulopwe biyampe. Nakwisāshila kinenwa kyobe nakyo kikale bwa binenwa byabo,+ kadi wisambe biyampe.”+
13 Ino Mikaya wanena’mba: “Bine ne Yehova byadi mūmi, byonso bisa kunombola Leza wami byo byonsa kwisamba.”+
14 Penepa watwela mudi mulopwe, mulopwe nandi wamwipangula’mba: “A Mikaya, le twende tukalwe na Lamote-Ngileade’ni nansha ndeke kwenda?” Ponkapo wamulondolola’mba: “Kanda, usa kunekenya; basa kupānwa mu kuboko kobe.”
15 Pa kino mulopwe wamunena’mba: “Le i misunsa inga yomfwaninwe kukutyipija amba uleke kwisamba nami kintu kyo-kyonso, poso’nka bubine mu dijina dya Yehova?”
16 Ebiya nandi wanena’mba: “Namone bene Isalela bonso bapalakana mu ngulu pamo bwa mikōko yampikwa mukumbi.+ Yehova wanena’mba: ‘Bano kebadipo na mfumwabo. Muntu ne muntu ajokele ku yandi njibo mu ndoe.’”
17 Kupwa mulopwe wa Isalela wanena Yehoshafata amba: “Mwene nakusapwilanga’mba: ‘Kasapo kunena bupolofeto buyampe pa mwanda wami poso’nka bubi’?”+
18 Ebiya Mikaya wanena’mba: “Shi ke pano, ivwana byanena Yehova: Namonenga Yehova ushikete pa lupona lwandi+ kadi bibumbo byonso bya mūlu+ bimene ku lundyo ne ku lunkuso lwandi.+
19 Penepo Yehova wanena’mba, ‘I ani le ukongola Ahaba mulopwe wa Isalela, amba akande akaponene ku Lamote-Ngileade?’ Yeu wanena nenki, mukwabo nandi wanena nenki.
20 Kupwa mushipiditu*+ umo wafwena waimana ku meso a Yehova keunena’mba, ‘Ami nsa kumongola.’ Yehova wewipangula’mba, ‘Usa kumongola namani?’
21 Walondolola’mba, ‘Nsa kutamba ngikale mushipiditu wa kyongo mu kyakanwa kya bapolofeto bandi bonso.’ Penepa nandi amba, ‘Usa kumongola, ne kadi usa kubwanya. Tamba ulonge’nka nankyo.’
22 Pano Yehova watūla mushipiditu wa kyongo mu kyakanwa kya bano bapolofeto bobe bonso,+ ino Yehova i munene kukuletela kyamalwa.”
23 Penepo Zedekia+ mwanā Kenaana wafwena, wakupila Mikaya+ ku ditama+ kanena’mba; “Le mushipiditu wa Yehova wadi ubaumpite dishinda’ka kewisambe nobe?”+
24 Mikaya nandi walondolola’mba: “Tala! Usa kuyuka i dishinda’ka difuku dyosa kutwela kufyama mu kyumba kya munda bininge.”
25 Kupwa mulopwe wa Isalela wanena’mba: “Selai Mikaya mukape’ye Amona mukata wa kibundi ne Yoashe mwanā mulopwe.
26 Mwibasapwilei amba, ‘Mulopwe wanena namino amba: “Elai uno muntu mu kifungo,+ mupei mikate mityetye ne mema matyetye enka ne byonsa kujoka mu ndoe.”’”
27 Ino Mikaya wanena’mba: “Shi ujoke mu ndoe, nankyo Yehova kesambilepo nami.”+ Kupwa wabweja’ko amba: “Tai’ko mutyima banwe bantu bonso.”
28 Penepa mulopwe wa Isalela ne Yehoshafata mulopwe wa Yuda bakanda ku Lamote-Ngileade.+
29 Ebiya mulopwe wa Isalela wanena Yehoshafata amba: “Nsa kwiinanya ntwele mu bulwi, ino abe vwala bivwalwa byobe bya bulopwe.” Penepo mulopwe wa Isalela weinanya, ebiya batwela mu bulwi.
30 Ino mulopwe wa Shidea wasoñenye bakata ba makalo andi amba: “Kemwakalwai na muntu nansha umo ekale mutyetye nansha mukatampe, poso’nka na mulopwe wa Isalela kete.”
31 Bakata ba makalo pa kumona’tu Yehoshafata, kebeneneja’mba: “I mulopwe wa Isalela.” Penepa baalamuka kebalu nandi; ino Yehoshafata kaabija bamukwashe,+ Yehova nandi wamukwasha, ponkapo Leza webasonsolola kwadi.
32 Bakata ba makalo pa kumona’mba ke mulopwepo wa Isalela, ponkapo baleka kumulonda.
33 Ino muntu umo waela muketo kyeleele,* watapa mulopwe wa Isalela pa bukata bwa nungilo ya kotyi wandi wa byuma. Penepa mulopwe wanena yewa wendejanga dyandi dikalo amba: “Alamuka untambije mu bulwi,* mwanda natapwe bibibibi.”+
34 Bulwi bwanana difuku dyonso dituntulu, kadi mulopwe wa Isalela wadi unenwe’nka kwimikwa mu dikalo koku utadidile bene Shidea kufika ne kyolwa, ebiya wafwa pa kupona kwa dyuba.+
Kunshi kwa Dyani
^ Nansha’mba “Wamunekenya.”
^ Nansha’mba “kutonona.”
^ Nansha’mba “mwikeulu.”
^ Nansha’mba “kuyuka mpika.”
^ Kishima pa kishima i, “nkambi.”
