Batyibi 9:1-57
9 Mwenda mafuku Abimeleke+ mwanā Yelubale waenda kudi banababo na inandi mu Shekema, webanena abo ne kisaka kyonso kya nkambo* wandi amba:
2 “Nemwisāshila, nenai baledi* bonso ba mu Shekema amba, ‘Le kiyampe komudi i kyepi, le i kubikalwa na bana bonso 70 ba Yelubale’ni,+ nansha i kubikalwa na muntu umo kete? Kadi vulukai amba ami ne kikupa kyenu ne ngitu yenu.’”*
3 Ebiya banababo na inandi bakasapwila baledi bonso ba Shekema uno mwanda wandi, kadi mityima yabo yalēmenena kulonda Abimeleke, mwanda banenene amba: “Aye i mwanetu.”
4 Penepo bamupa ne bibese 70 bya ndalama bya mu njibo* ya Bāla-Bedite,+ Abimeleke nandi wafuta’byo bana-balume badi bazeuluka kadi ba kibengo ba kwenda nandi.
5 Kupwa waenda ku njibo ya shandi ku Ofela+ waipaya banababo,+ bana ba Yelubale, bana-balume 70 pa dibwe dimo. Kwapanda enka Yotama, nkasampe bininge mu bana bana-balume ba Yelubale, mwanda wafyeme.
6 Ebiya baledi bonso ba Shekema ne Bete-Milo ense bebungila pamo, babikika Abimeleke+ kubwipi na mutyi mukatampe dya ku kikomo kyadi mu Shekema.
7 Pobasapwidile’byo Yotama, ponka na ponka wakemana pa nsongo ya Lūlu lwa Ngedizimi+ kaebela mabila na diwi ditunduke amba: “Ntejei, banwe baledi ba Shekema, Leza nandi ukemuteja.
8 “Kyaba kimo kwadi mityi yaendele kushinga māni mulopwe wa kwiibikala. Penepa yanena umpafu amba, ‘Witubikale.’+
9 Ino umpafu weinena’mba, ‘Le ndeke ami māni* engidijibwanga pa kutumbija Leza ne bantu, keñenda’ko kukapepela pangala pa mityi mikwabo?’
10 Kupwa mityi yanena kikuyu amba, ‘Iya witubikale.’
11 Ino kikuyu kyeinena’mba, ‘Le ndeke butobaji bwami ne bipa byami biyampe keñenda’ko kukapepela pangala pa mityi mikwabo?’
12 Ebiya mityi yanena muñanza amba, ‘Iya witubikale.’
13 Muñanza nao weitentulula’mba, ‘Le ndeke vinyu yami mipya isangaja Leza ne bantu keñenda’ko kukapepela pangala pa mityi mikwabo?’
14 Mfulo mfulō mityi mikwabo yonso yanena kayombo ka miba’mba, ‘Iya witubikale.’+
15 Penepo kayombo ka miba kanena mityi’ya amba, ‘Shi bine musa kunshinga māni bu mulopwe wa kwimubikala, iyai mufyame mu mwemba wami. Shi bitupu, mudilo utambe ku kayombo ka miba uloteje mityi ya sedele ya Lebanona.’
16 “Le pano mubalonga bintu na mutyima umo ne na bulēme pa kubikika Abimeleke,+ kadi le mubalonga biyampe kudi Yelubale ne ba mu njibo yandi, ne kadi le mubamulongela bintu mobimufwaninwe?
17 Padi pemulwila tata,+ watūdile būmi bwandi* mu kyaka mwanda wa kwimupandija mu makasa a Midyana.+
18 Inoko dyalelo mubatombokela ba mu njibo ya tata, mubaipaya bandi bana, bana-balume 70, pa dibwe dimo.+ Ino mubabikika’ko Abimeleke, mwanā umpika wandi mwana-mukaji,+ pa baledi ba Shekema mwanda’po’tu i mwanenu.
19 Bine, shi mubalongela Yelubale ne ba mu njibo yandi bintu na mutyima umo ne na bulēme dyalelo’di, nabya sangalai pa mwanda wa Abimeleke, nandi asangale pa mwanda wenu.
20 Ino shi bitupu, mudilo utambe kudi Abimeleke uloteje baledi ba Shekema ne Bete-Milo,+ kadi mudilo utambe kudi baledi ba Shekema ne Bete-Milo uloteje Abimeleke.”+
21 Penepa Yotama+ wanyema waenda ku Bēle, washikata kwine’kwa mwanda wa mwanabo Abimeleke.
22 Abimeleke wabikala* pa Isalela myaka isatu.
23 Ebiya Leza waleka kwikale* lwana pa bukata bwa Abimeleke ne baledi ba Shekema, kebalongela Abimeleke bintu na bundalandala.
24 Byadi namino amba butapani bobatapile bana bana-balume 70 ba Yelubale bujokejibwe kinongo, mwanda wa mashi abo alambikwe mwanabo Abimeleke ke-pantu webepaile,+ alambikwe ne baledi ba Shekema mwanda bamukweshe epaye banababo.
25 Ebiya baledi ba Shekema batūla bantu ba kumufyamina pa nsongo ya ngulu, kadi badi banyoñomona bintu bya bantu bonso badi bapityila dya kobadi mu dishinda. Mwenda mafuku basapwila’mo Abimeleke.
26 Kupwa Ngale mwanā Ebede ne banababo batyibuluka batwela mu Shekema,+ baledi ba Shekema nabo bamukulupila.
27 Batamba baenda mu ntanda kebakongakanya mañanza mu madimi abo a mañanza, beapondakanya, ebiya basoba masobo, kupwa baenda mu njibo ya leza wabo,+ badya batoma kebafinge Abimeleke.
28 Ebiya Ngale mwanā Ebede wanena’mba: “Le Abimeleke i ani, ne Shekema nandi i ani amba tumwingidile? Mwene i mwanā Yelubale,+ kadi mwene Zebula i mukwashi wandi? Ingidilai bantu ba Hamola, shandya Shekema! Ino kyotukengidila Abimeleke kine i kika?
29 Shi bano bantu badi’tu mu lupusa lwami, nadi wa kubikula Abimeleke.” Kupwa wanena Abimeleke amba: “Vudija kibumbo kyobe kya divita utambe tulwe.”
30 Zebula mfumu wa kibundi pa kwivwana binenwa bya Ngale mwanā Ebede, bulobo bwandi bwaaka.
31 Ponkapo watuma mu bufyafya* mikendi kudi Abimeleke amba: “Tala! Ngale mwanā Ebede ne banababo badi pano mu Shekema, kadi aba basoñanya bantu ba mu kibundi bakutombokele.
32 Shi ke pano kanda bufuku, abe ne bantu bobe, mukatengele mu ntanda.
33 Dyuba pa kutamba’tu lubanga, ufwaninwe kubūka lubanga futwi utambe kibundi bulwi; shi aye ne bantu bandi abakutambe’dyo, longa bukomo bobe bonso umunekenye.”*
34 Ebiya Abimeleke ne bantu bonso baadi nabo bataluka bufuku, batengela kubwipi na Shekema mu bibumbo biná.
35 Ngale mwanā Ebede pa kutamba waimana pa ntwelelo ya kibelo kya kibundi, Abimeleke ne bantu baadi nabo balupuka pobadi bafyeme.
36 Ngale pa kumona bantu, wanena Zebula amba: “Tala! Kudi bantu bāya batūka ku nsongo ya ngulu.” Ino Zebula wamusapwila’mba: “I minjiñininya ya ngulu yomona bu bantu.”
37 Kyaba pa kupita’po, Ngale wanena’mba: “Tala! Bantu aba batūka batamba pa bukata bwa ntanda, ne kibumbo kimo kīya dya mu dishinda dya mutyi mukatampe wa Meonenimi.”
38 Zebula wamutentulula’mba: “Pano kwianya kobe kudi kwepi kowadi wianya’mba, ‘Le Abimeleke i ani amba tumwingidile?’+ Mwene bano bo bantu bowapelele? Tambanga pano ukalwe nabo.”
39 Penepo Ngale watamba koku utangidile baledi ba Shekema kumeso, walwa na Abimeleke.
40 Abimeleke wamulonda, ino Ngale wamunyema, bavule bapona batapwe kutūla ne ku ntwelelo ya kibelo kya kibundi.
41 Abimeleke washikata’nka mu Aluma, Zebula+ nandi wapanga Ngale ne banababo mu Shekema.
42 Difuku dilonda’ko bantu baenda mu ntanda, kupwa basapwila Abimeleke uno mwanda.
43 Ebiya wasela bantu, webabanya mu bibumbo bisatu watengela mu ntanda. Aye pa kumona bantu batamba mu kibundi, webatamba’dyo ne kutukija webatukija.
44 Abimeleke ne bibumbo byaadi nabyo baenda kumeso, baimana pa ntwelelo ya kibelo kya kibundi, koku bibumbo bibidi bitamba’dyo bonso badi mu ntanda, byebatukija.
45 Abimeleke walwa kibundi bulwi difuku dyonso dituntulu, ebiya wekikwata. Waipaya bantu badi’mo, kupwa wabundula kibundi+ wakusa’mo mwepo.
46 Baledi bonso ba kiteba kya Shekema pa kwivwana uno mwanda, ponkapo baenda mu kyumba kya panshi* kya njibo* ya Ele-Bedite.+
47 Pobasapwidile’tu Abimeleke amba baledi bonso ba kiteba kya Shekema abebungila pamo,
48 Abimeleke ne bantu bonso baadi nabo bakanda ku Lūlu lwa Zalemone. Abimeleke wasela kasolwa mu kuboko kwandi, waketa musambo wa mutyi wetwika’o pa kipuji, kupwa wanena bantu baadi nabo amba: “Byomwamona nonga’bi, nenu longelai monka bukidibukidi!”
49 Ebiya bantu bonso nabo baketa misambo kebalonda Abimeleke. Kupwa baala misambo ku kyumba kya panshi ne kusōka basōka kyumba’kya na mudilo. Ponkapo bantu bonso ba ku kiteba kya Shekema nabo bafwa, kintu kya bana-balume ne bana-bakaji 1 000.
50 Kupwa Abimeleke waenda ku Tebeze; watūdila Tebeze nkambi, wekikwata.
51 Kwadi kiteba kikomo mu bukata mwa kibundi, ebiya bana-balume ne bana-bakaji bonso ne baledi bonso ba kibundi banyemena’mo. Beshityila’mo, bakanda mu musaka wa kiteba’kya.
52 Abimeleke waenda ku kiteba’kya wekitamba bulwi. Wafwena ku kibelo kya kiteba mwanda wa kwikisōka.
53 Kupwa mwana-mukaji umo waponejeja Abimeleke dibwe dya mpelo ku mutwe dyamupondakanya kabamba.+
54 Waita bukidi bonka mwingidi wadi uselele byabulwi byandi kamunena’mba: “Somona kipete kyobe ungipaye, kutyina bakanena’mba, ‘Mwana-mukaji wamwipaya.’” Penepo mwingidi wandi wamusabakanya ne kufwa wafwa.
55 Bana-balume ba Isalela pa kumona’mba Abimeleke wafu, bonso bajokela kwabo.
56 Enka nenki Leza walubwila Abimeleke bibi byaalongele shandi pa kwipaya banababo 70.+
57 Kadi Leza wajokeja bibi byonso bya bana-balume ba Shekema pa mitwe ya abo bene. Penepa mafingo a Yotama+ mwanā Yelubale+ ebafikila.
Kunshi kwa Dyani
^ Kishima pa kishima i, “kisaka kya njibo ya shandya inandi.”
^ Bibwanika padi i, “benē ntanda.”
^ Nansha’mba “mubutule wa ku mashi enu.”
^ Nansha’mba “tempelo.”
^ Nansha’mba “bipa bingi.”
^ Nansha’mba “muya wandi.”
^ Nansha’mba “webikika bu mfumu.”
^ Kishima pa kishima i, “watuma mushipiditu mubi.”
^ Nansha’mba “na budyumuku.”
^ Nansha’mba “mulonge byonso bibwanya kuboko kobe kulonga.”
^ Nansha’mba “kifuko kikomejibwe.”
^ Nansha’mba “tempelo.”
