Kudi Bene Fidipai 4:1-23
4 Shi ke pano, a banabetu bonsenswe ne bongabila bininge kwimona nabo, nsangaji ne kilukwa kyami,+ imanijai pototo+ uno muswelo mudi Mfumwetu, banwe baswedibwe bami.
2 Nesāshila Evodia kadi nesāshila ne Shintake amba bekale na ñeni imo yonka mudi Mfumwetu.+
3 Bine, nakulombe ne abe mwine, byodi mwingidi nami wa bine,* ukwashe nyeke bano bana-bakaji badi batakamene* pamo nami pa mwanda wa myanda miyampe pamo ne Kelema ne bengidi nami bakwabokwabo, badi na majina abo mu mukanda wa būmi.+
4 Sangalai mafuku onso mudi Mfumwetu. Kadi nkanena monka’mba, Sangalai!+
5 Mutyima wenu unekena+ uyukane ku bantu bonso. Mfumwetu kadi pabwipi.
6 Kemwakizumbijai mityima pa kintu nansha kimo,+ inoko mu byonso, yukijai Leza byomulomba mu milombelo ne kuzenza pamo ne kufwija’ko;+
7 kadi ndoe+ ya Leza itabukile ñeni yonso ikalama mityima yenu+ ne mifwatakanyo* yenu kupityila kudi Kidishitu Yesu.
8 Shi ke pano, banwe banabetu, bintu byonso bya bine, byonso bilēmekwa, byonso byoloke, byonso byampikwa disubi,* byonso bya kusanshibwa, byonso binenenwa biyampe, byonso bya mwikadilo muyampe, ne byonso bya kutendelwa, endelelai kufwatakanya* bino bintu.+
9 Bintu byomwafundile, mwebitabija, mwebivwana ne kwibimona kudi ami, longai’byo nyeke,+ nabya Leza wa ndoe ukekalanga nenu.
10 Nasangala bikatampe mudi Mfumwetu mwanda pano’ko mubaanza monka kunta mutyima.+ Nansha byomwadi muntele mutyima, mwabudilwe kyaba kya kulombola’kyo.
11 Ke kunenapo amba nesambe namino mwanda nafudilwa, aa, mwanda ami ne mwifunde kuloelelwa* byondi nabyo, nansha shi ngikale mu ngikadilo’ka.+
12 Ndyukile mwa kwikadila na tubintu tutyutyu,+ kadi ndyukile mwa kwikadila na bintu bivule. Mu byonso ne mu ngikadilo yonso ne mwifunde kintu kekiyukilepo bavule kya mwa kwikutyila ne mwa kwikadila na nzala, mwa kwikadila na bintu bivule ne mwa kulongela shi nkidipo nabyo.
13 Mu byonsololo ngidi na bukomo kupityila kudi yewa unkomeja.+
14 Inoko, banwe mwalongele biyampe pomwaunkweshe mu byamalwa byami.
15 I bine, banwe bene Fidipai, muyukile kadi amba pomwefundile dibajinji myanda miyampe, ami ponatalukile ku Masedonya, i kutupu kipwilo kyaunkweshe nansha kyaitabije bukwashi bwami, poso enka banwe kete;+
16 mwanda, ponadi mu Tesalonika, mwauntumīne musunsa mubajinji ne wa bubidi mwine byonadi mbudilwe.
17 Ke kunenapo amba nkimbanga kyabuntu, aa, ino amiwa nsakanga bipa bya kwimuvudijija kamweno kenu.
18 Inoko, ngidi na bintu byonso byonsaka kadi bipite’nka ne kupita. Navudilwa bintu pano ponatambula byomwantumīne na Epafolodetusa,+ mwenye mulumbuluke,+ kitapwa kitabijibwe, kisangaja Leza.
19 Leza wami nandi ukemuvudijija byonso byomusaka+ mwendele bupeta bwandi mu ntumbo kupityila kudi Kidishitu Yesu.
20 Pano Leza Tata wetu atumbijibwe ntumbo nyeke ne nyekeke. Amena.
21 Ñimwinei bajila bonsololo badi mu bumo na Kidishitu Yesu. Banabetu badi pamo nami nabo abemwimuna.
22 Bajila bonsololo, kutabukidila ba mu njibo ya Kesala,+ abemwimuna.
23 Kanye ka ku buntu bitupu ka Mfumwetu Yesu Kidishitu kekale na mushipiditu omulombola.
Kunshi kwa Dyani
^ Kishima pa kishima i “mukwetu wa mu lupungu lumo wa binebine.”
^ Nansha’mba “balonga bukomo bininge.”
^ Nansha’mba “ñeni; milangwe.”
^ Nansha’mba “kulanga; kulangulukila pa.”
^ Nansha’mba “bitōka.”
^ Nansha’mba “kusangela.”
