Divilu 19:1-25
19 Mu kweji wa busatu, bene Isalela pa kupwa kutamba mu ntanda ya Edipito, mu difuku dimo dyonka, baiya mu ntanda mutuputupu ya Shinai.
2 Batamba ku Lefidimi+ baiya mu ntanda mutuputupu ya Shinai, batūla nkambi mu ntanda mutuputupu. Isalela watūla nkambi kwine’kwa kampalampala na lūlu.+
3 Penepo Mosesa wakanda kudi Leza wa bine, Yehova nandi wamwita ku lūlu+ kanena’mba: “Kalombole njibo ya Yakoba ne kusapwila bene Isalela namino amba,
4 ‘Banwe bene mwemwenine byonalongele bene Edipito,+ mwanda wa kwimusela pa mapapa a mukebo ne kwimuleta kondi.+
5 Shi mukōkele binebine diwi dyami ne kulama kipwano kyami, nankyo bine mukekalanga kintu kyami kya pa bula* mu bantu bonso,+ mwanda ntanda yonso i yami.+
6 Mukangikadilanga bu bulopwe bwa babitobo kadi muzo ujila.’+ Bino e byokalombola bene Isalela.”
7 Penepa Mosesa waenda, waityija bakulumpe ba bantu ne kwibasapwila byonso byamusoñenye Yehova.+
8 Bantu bonso nabo balondolola kiundaunda’mba: “Byonso byanena Yehova, twitabije kwibilonga.”+ Ponkapo Mosesa wakalombola Yehova byalondolwele bantu.
9 Ebiya Yehova wanena Mosesa amba: “Tala! Yao ngiya kodi mu dikumbi difīta, mwanda wa bantu bevwane ponesamba nobe, amba bakwitabije ne abe mafuku onso.” Penepa Mosesa wasapwila Yehova byanenene bantu.
10 Penepo Yehova wanena Mosesa amba: “Enda kudi bantu ukebapandule dyalelo ne kesha, kadi bafwaninwe kukenda bivwalwa byabo.
11 Kadi bafwaninwe kwiteakanya ku difuku dya busatu, mwanda mu difuku dya busatu Yehova ukatūkila pa Lūlu lwa Shinai ku meso a bantu bonso.
12 Abe ufwaninwe kutūdila bantu mikalo ku lūlu lonso ne kwibalombola’mba, ‘Dyumukai kukanda ku lūlu nansha kutenga kufulakufula kwalo. Muntu ense ukatenga ku lūlu ukepaibwa binebine.
13 I kutupu kuboko nansha kumo kukamutenga, ino ukaswa mabwe nansha kutapwa.* Nansha nyema nansha muntu, kakekalapo mūmi.’+ Ino pa kuvuma kwa lusengo lwa mukōko mulume,+ bakakanda ku lūlu.”
14 Penepo Mosesa watūka ku lūlu waenda kudi bantu, washilula kwibapandula, nabo bakenda bivwalwa byabo.+
15 Walombola bantu amba: “Mwilongololei ku difuku dya busatu. Kemufwaninwepo kulāla na benu bakaji.”*
16 Penepa mu difuku dya busatu lubanga, kwadi mikungulo ne mapeni, kwadi ne dikumbi dityite+ pa lūlu ne kuvuma kwa lusengo kukatampe bininge, kadi bantu bonso mu nkambi baanza kuzakala.+
17 Ebiya Mosesa watambija bantu panja pa nkambi kebenda kuketana na Leza wa bine, baimana munshi mwa lūlu.
18 Lūlu lonso lwa Shinai lwadi lufituka mwishi, mwanda Yehova watūkīle’po mu mudilo;+ mwishi walo wadi ukanda pamo bwa mwishi wa fūlu, kadi lūlu lonso lwadi luzakala bya mwiko.+
19 Kuvuma kwa lusengo pokwadi kwenda kubaya, Mosesa wesamba, ne diwi dya Leza wa bine nadyo dyamulondolola.
20 Penepo Yehova watūkila pa Lūlu lwa Shinai, pa nsongo ya lūlu. Ebiya Yehova waityila Mosesa pa nsongo ya lūlu, Mosesa nandi wakanda.+
21 Penepa Yehova wanena Mosesa amba: “Tūka, kadyumune bantu amba kebakatompa kutabuka mikalo kebakatale Yehova, kutyina’mba bantu bavule bakafwa.
22 Kadi babitobo bāyanga nyeke kubwipi na Yehova, bepandule kutyina’mba Yehova wakebakupila.”*+
23 Penepo Mosesa watentulula Yehova amba: “Bantu kebabwanyapo kukanda ku Lūlu lwa Shinai, mwanda wetudyumwine kala’mba, ‘Tūlai mikalo ku lūlu lonso, lwikale lukola.”+
24 Ino Yehova wamunena’mba: “Enda, tūka, kupwa ujoke kuno, abe pamo ne Alone, ino kokaleka babitobo ne bantu batabuke mikalo kebakanda kudi Yehova, kutyina’mba wakebakupila.”+
25 Penepo Mosesa watūkila kudi bantu, webasapwila.
Kunshi kwa Dyani
^ Nansha’mba “kintu kya bulēme.”
^ Padi i kutapwa na muketo.
^ Kishima pa kishima i, “Kemwakifwenai mwana-mukaji.”
^ Kishima pa kishima i, “wakemupamukila.”
