Divilu 6:1-30
6 Ebiya Yehova wanena Mosesa amba: “Pano usa kumona byonsa kulonga Felo.+ Kuboko kwa bukomo kusa kumuningila ebaleke bende, kadi kuboko kwa bukomo kusa kumuningila ebatambije mu yandi ntanda.”+
2 Penepo Leza wanena Mosesa amba: “Amiwa ne Yehova.
3 Nadi mwekelanga Abalahama, Izake, ne Yakoba bu Leza Mwinē Bukomo Bonso,+ ino pa mwanda wa dijina dyami Yehova+ nkyeyukenyepo kobadi.+
4 Kadi nasambile nabo kipwano kya kwibapa ntanda ya Kenani, ntanda yobaikele’mo bu beni.+
5 Ino naivwana kubinza kwa bantu ba Isalela, bamuninwe bupika na bene Edipito, kadi navuluka kipwano kyami.+
6 “Shi ke pano, lombola bene Isalela amba: ‘Amiwa ne Yehova, kadi nkemutūlanga biselwa bilēma bya bene Edipito ne kwimunyongolola ku bupika bwabo,+ kadi bine nkemukūlanga na kuboko kōlole* ne na butyibi bukatampe.+
7 Nkemutambulanga bu bantu bami, kadi nkekalanga Leza wenu,+ nenu mukayuka bine amba amiwa ne Yehova Leza wenu mwine wimutūla biselwa bilēma bya Edipito.
8 Ne kadi nkemutwejanga mu ntanda yonatyipile mutyipo* amba nkapa’yo Abalahama, Izake, ne Yakoba; nkemupa’yo bu kintu kyenu.+ Amiwa ne Yehova.’”+
9 Kupwa Mosesa wakasapwila bene Isalela uno musapu, ino abo kebaivwenepo Mosesa pa mwanda wa kwabo kutyumukwa mutyima ne pa mwanda wa bupika bwa malwa.+
10 Ebiya Yehova wanena Mosesa amba:
11 “Twela ulombole Felo, mulopwe wa Edipito, amba ufwaninwe kuleka bene Isalela batambe mu yandi ntanda.”
12 Ino, Mosesa walondolola Yehova amba: “Tala! Bene Isalela kebangivwenepo;+ lelo penepo Felo ukangivwana namani, byonkinenangapo biyampe?”*+
13 Yehova wasapwila monka Mosesa ne Alone misoñanya ya kulombola bene Isalela ne Felo, mulopwe wa Edipito, mwanda wa kulupula bene Isalela mu ntanda ya Edipito.
14 Bano’ba yo mitwe ya njibo ya bashabo: Bana ba Lubeni bana-balume, umbedi+ wa Isalela, i Hanoki, Palu, Hezelone, ne Kalami.+ Bino’bi byo bisaka bya Lubeni.
15 Bana ba Shimioni bana-balume i Yemwele, Yamine, Ohadi, Yakine, Zohala, ne Shaulu, mwanā mwana-mukaji umo mwine Kenani.+ Bino’bi byo bisaka bya Shimioni.
16 Ano’a o majina a bana ba Levi+ bana-balume, mwendele musuku wa bisaka byabo: Ngelashona, Kohata, ne Meladi.+ Myaka ya būmi bwa Levi yādi myaka 137.
17 Bana ba Ngelashona bana-balume i Lebini ne Shimei, mwendele bisaka byabo.+
18 Bana ba Kohata bana-balume i Amalama, Izala, Hebelona, ne Uziele.+ Myaka ya būmi bwa Kohata yādi myaka 133.
19 Bana ba Meladi bana-balume i Maheli ne Mushi.
Bino’bi byo bisaka bya bene Levi, mwendele musuku wa bisaka byabo.+
20 Ino Amalama wasonga Yokebedi, mwanabo na shandi ke wandi mukaji.+ Wamubutwila Alone ne Mosesa.+ Myaka ya būmi bwa Amalama yādi myaka 137.
21 Bana ba Izala bana-balume i Kola,+ Nefeke, ne Zikidi.
22 Bana ba Uziele bana-balume i Mishaele, Edizafana,+ ne Shitidi.
23 Ino Alone wasongele Edisheba, mwanā Aminadaba, kaka wa Nashona+ ke wandi mukaji. Wamubutwila Nadaba, Abihu, Eleaza ne Itamala.+
24 Bana ba Kola bana-balume i Ashile, Elekana, ne Abiasafa.+ Bino’bi byo bisaka bya bene Kola.+
25 Eleaza+ mwanā Alone, wasonga mwanā Putiela umo ke mukaji wandi. Wamubutwila Finease.+
Bano’ba yo mitwe ya mobo a bashandya bene Levi mwendele bisaka byabo.+
26 Uno’u ye Alone ne Mosesa bene bobanenene kudi Yehova amba: “Katambijei bantu ba Isalela mu ntanda ya Edipito, kibumbo kibumbo.”*+
27 I abo bakesambile na Felo, mulopwe wa Edipito, amba atambije bantu ba Isalela mu Edipito. I aye uno Mosesa ne Alone.+
28 Mu dyodya difuku dyesambile Yehova na Mosesa mu ntanda ya Edipito,
29 Yehova walombwele Mosesa amba: “Amiwa ne Yehova. Kasapwile Felo, mulopwe wa Edipito, byonso byonakusapwila’bi.”
30 Penepo Mosesa wanena ku meso a Yehova amba: “Tala’po! Nkinenangapo biyampe,* le penepo Felo ukangivwana namani?”+
Kunshi kwa Dyani
^ Nansha’mba “kwa bukomo.”
^ Kishima pa kishima i, “naolwele kuboko kwami.”
^ Kishima pa kishima i, “Ami ne wampikwa kutwejibwa kwisao ku milomo.”
^ Kishima pa kishima i, “mwendele bibumbo byabo bya divita.”
^ Kishima pa kishima i, “Ami ne wampikwa kutwejibwa kwisao ku milomo.”
