Ezela 6:1-22
6 Po pasoñenye Mulopwe Dadiusa, nabo bakimba mu mikanda ya kala* mwadi mutūdilwe byabulēme mu Babiloni.
2 Basokola muvungo mu kibundi kya nsakwa ku Ekebatana mu ntanda ya bubikavu* ya Media, kadi padi palembwe uno mukanda wa kivulukilo amba:
3 “Mu mwaka mubajinji wa Mulopwe Kilusa, Mulopwe Kilusa wasoñenye pa mwanda wa njibo ya Leza idi mu Yelusalema+ amba: ‘Njibo yubakululwe ke kifuko kyabo kya kulambwila’po bitapwa, kadi byalwilo byayo bishimikwe; ikale na bula bwa maboko 60* mu bwimwa, ne maboko 60 mu bunkimbwa,+
4 na milongo isatu ya mabwe makatampe majokoloje pa kifuko’kya ne mulongo umo wa mityi;+ kadi lupeto lwa kufuta lukatamba ku njibo ya mulopwe.+
5 Kadi, bipungwa bya olo ne bya ndalama bya mu njibo ya Leza byobatambije kudi Nebukaneza mu tempelo yadi mu Yelusalema webiselela mu Babiloni,+ bijokejibwe, amba bebitūle pa kifuko kyabyo mu tempelo ya mu Yelusalema mu njibo ya Leza.’+
6 “Shi ke pano, abe Tatenai mbikavu wa ntanda ya Bukila bwa Munonga,* ne Shetale-Bozenai, ne bengidi nenu, bambikavu batyebatye ba ntanda ya Bukila bwa Munonga,+ sonsolokai’ko.
7 Kemwakekujai mu mwingilo wa yayo njibo ya Leza. Mbikavu wa Bayuda ne bakulumpe ba Bayuda basa kūbakulula yayo njibo ya Leza pa kifuko poyadi dibajinji.
8 Ne kadi, nasoñanya bine byomufwaninwe kulongela bano bakulumpe ba Bayuda mwanda wa bobakulule yayo njibo ya Leza amba: Mu kibīko kya byabulēme bya bulopwe,+ mu musonko ukongakanibwa mu ntanda ya Bukila bwa Munonga, bano bana-balume bapebwe’mo lupeto bukidibukidi mwanda wa bendelele pampikwa kwimika.+
9 Kadi byonso bisakibwa—bañombe bana+ ne mikōko milume+ ne twana twa mikōko+ twa byamulambu bisōkwe bya kulambula kudi Leza wa mūlu, ñano,+ mwepo,+ vinyu+ ne māni,+ monka mukanenena babitobo badi mu Yelusalema—bibapebwe difuku ne difuku ne kuleka’byo mpika,
10 amba balete nyeke byamulambu bisangaja Leza wa mūlu kadi balombele pa mwanda wa būmi bwa mulopwe ne bwa bandi bana.+
11 Nasoñanya kadi’mba shi muntu ense wajilula luno lubila, mutyi ukakulumunwa ku yandi njibo kadi aye ukatululwa ne kubambwa’ko,* kadi njibo yandi ikalamuka ke musalani* wa bonso pa mwanda wa kino kilubo.
12 Kadi Leza, mwine waikadije dijina dyandi kwine’kwa+ aponeje mulopwe ense ne muntu ense utulula kuboko mwanda wa kujilula uno musoñanya ne konakanya yoya njibo ya Leza idi mu Yelusalema. Ami Dadiusa, nasoñanya kino. Kilongwe bukidibukidi.”
13 Penepo Tatenai mbikavu wa ntanda ya Bukila bwa Munonga, ne Shetale-Bozenai,+ ne bengidi nabo, balonga bukidibukidi byonso byasoñenye Mulopwe Dadiusa.
14 Bakulumpe ba Bayuda baendelele kūbaka kadi baendelela kumeso,+ bakankamikilwe na bupolofeto bwa mupolofeto Hakai+ ne Zekadia+ munkanā Ido; bapwa kūbaka’yo na musoñanya wa Leza wa Isalela+ ne na musoñanya wa Kilusa+ ne Dadiusa+ ne Alatazelekishishi+ mulopwe wa Peleshia.
15 Bapwile njibo mu difuku dya busatu mu kweji wa Adala,* mu mwaka wa busamba wa bulopwe bwa Mulopwe Dadiusa.
16 Ebiya bene Isalela, babitobo, bene Levi+ ne bakwabo badi dibajinji bu misungi bafikidija* ino njibo ya Leza na nsangaji.
17 Kadi baletele bañombe 100, mikōko milume 200, twana twa mikōko 400, bya kufikidija nabyo ino njibo ya Leza, ne bambuji balume 12 ba kyamulambu kya bubi pa mwanda wa Isalela ense, mungya bungi bwa bisaka bya Isalela.+
18 Batūla ne babitobo mu bisumpi byabo ne bene Levi mu bibumbo byabo ba kwingila mingilo ya Leza mu Yelusalema,+ mungya bilembelwe mu mukanda wa Mosesa.+
19 Kadi boba badi dibajinji bu misungi basoba Pashika mu difuku dya 14 dya kweji mubajinji.+
20 Babitobo ne bene Levi, abo bonso betōkeja,+ ebiya abo bonso batōka tō; batapa kitapwa kya Pashika pa mwanda wa boba bonso badi dibajinji bu misungi, ne pa mwanda wa bakwabo babitobo ne pa mwanda wa abo bene.
21 Penepo bene Isalela batambile ku bu misungi badya’kyo pamo ne boba bonso belungile kobadi ne boba balekele disubi dya mizo ya ntanda kebatōta* Yehova Leza wa Isalela.+
22 Basoba ne Masobo a Mikate Yampikwa Kiyujo+ na nsangaji mu mafuku asamba-abidi, mwanda Yehova webasangeje kadi walengeje mulopwe wa Ashidia ebatōkelwe mutyima,+ penepa webakwasha* mu mwingilo wa njibo ya Leza wa bine, Leza wa Isalela.
Kunshi kwa Dyani
^ Kishima pa kishima i, “njibo ya bilembwa.”
^ Nansha’mba “buludiki bwa kipindi kya ntanda.”
^ Kintu kya mametele 26,7 (mayo 87,6). Tala Mbwejo B14.
^ Nansha’mba “Bukila bwa Ufalete.”
^ Bibwanika padi i, “kyala; mulwi wa tuvwi.”
^ Nansha’mba “kadi aye ukapopwa’ko.”
^ Tala Mbwejo B15.
^ Nansha’mba “bapāna.”
^ Kishima pa kishima i, “kebakimbe.”
^ Kishima pa kishima i, “wakomeja maboko abo.”
