Isaya 26:1-21
26 Mu dyodya difuku luno lwimbo lukembwa+ mu ntanda ya Yuda+ amba:
“Tudi na kibundi kikomo.+
Walonga lupandilo ke mumbu yakyo ne mabunda akyo.+
2 Shitulai bibelo+ amba muzo moloke utwele,Muzo ulamine mwiendelejo wa kikōkeji.
3 Abe ukalama boba bakwisumbidile* bya binebine;Ukebapa ndoe ya endaenda,+Mwanda i abe obakulupile.+
4 Kulupilai mudi Yehova nyeke,+Mwanda Yah* Yehova i Dibwe dya nyeke.+
5 Mwanda watūkija panshi boba bekele patunduke, kibundi kya peulu.
Wekitūkija,Wekitūkija panshi;Wekyela mu luvumbi.
6 Kulu kukekityampa,Maulu a boba bamweshibwa malwa, matabula a bantu bapēlulwe.”
7 Kashinda ka moloke i kōloke swā.*
Byodi moloke,Ukaseneja dishinda dya moloke.
8 Potulonda kashinda ka butyibi bobe, abe Yehova,Lukulupilo lwetu ludi mudi abe.
Batwe* twabilanga bininge dijina dyobe ne kivulukilo kyobe.*
9 Bufuku nkwabilanga bininge ami ense,*Bine, mushipiditu wami ukukimbanga;+Mwanda kitatyi kyotyibila ntanda mambo,Bekadi ba pa ntanda befundanga boloke.+
10 Nansha shi mubi abamutōkelwa mutyima,Kakefundepo boloke.+
Nansha ke mu ntanda ya boloke, aye ukalonga bibi,+Kadi kakamonepo bukatampe bwa Yehova.+
11 A Yehova, kuboko kobe i kutulule, inoko kebekumwenepo.+
Bakamona bupyasakane bobe pa bantu bobe ne kufwijibwa bumvu.
Bine, mudilo wa bakinkwa nobe ukebaloteja.
12 A Yehova, abe uketupa ndoe,+Mwanda bintu byonso byotulongeleUbetuvuila’byo.
13 A Yehova Leza wetu, kutalula’mo abe, bamfumu bakwabo betubikele,+Ino batwe tutelanga enka dijina dyobe kete.+
14 I bafwe, kebakekalapo bōmi.
I bampikwa bukomo mu lufu, kebakemanapo.+
Mwanda ubebate mutyimaWa kwibatukija fututu ne kwibonakanya’mba baleke kwibatela monka.
15 A Yehova, ubabaija muzo,Ubabaija muzo;Ubetumbija abe mwine.+
Ubatandabula bininge mikalo yonso ya ntanda.+
16 A Yehova, abo bavundamukile kodi mu kitatyi kya tusua;Bapungulwile milombelo yabo ya misongwe kitatyi kyowebalemunwine.+
17 Enka mwikadilanga mwana-mukaji wa dīmi usaka kubutulaNa bisanso ne kudila misanshi,Ye motwikadile ne batwe pa mwanda obe, a Yehova.
18 Twaimite, twadi na bisanso,Ino tudi enka na batwe babutula luvula.
Ketuletēlepo ntanda lupandilo,Kadi i kutupu nansha umo ubutwilwe amba ekale mu ntanda.
19 “Bafwe bobe bakekala bōmi.
Ngitu mifwe ya bantu bami* ikemana.+
Langukai mwele nsadi ya tusepo,Banwe bekele mu luvumbi!+
Mwanda lumé lwenu ludi pamo bwa lumé lwa lubanga,*Ntanda nayo ikajokeja ku būmi boba bampikwa bukomo mu lufu.*
20 A bantu bami, endai, katwelei mu byumba byenu bya munda,Kadi shitai bibelo byenu.+
Fyamai kitatyi kityetyeKufika ne bipita bukalabale.*+
21 Mwanda talai! Yehova yao wiya utamba ku kifuko kyandiKwita bekadi ba ntanda beshintulwile pa mwanda wa kilubo kyabo,Ntanda ikalombola patōka mashi oimwangileKadi keikapūtapo monka batapwe bayo.”
Kunshi kwa Dyani
^ Bibwanika padi i, “boba ba milangwe keijinapo.”
^ “Yah” i dijina Yehova mu kīpi.
^ Nansha’mba “kadingakane.”
^ Nansha’mba “Na muya wetu.”
^ Ko kunena’mba, amba Leza ne dijina dyandi avulukwe, ayukanibwe.
^ Nansha’mba “na muya wami.”
^ Kishima pa kishima i, “Ngitu mifwe yami.”
^ Bibwanika padi i, “lumé lwa biyombo (ngimove).”
^ Nansha’mba “ikabutula boba bampikwa bukomo mu lufu.”
^ Nansha’mba “kutulujibwa.”
