Kusokwelwa Kudi Yoano 17:1-18
17 Mwikeulu umo pa boba basamba-babidi badi na ngeso isamba-ibidi+ waiya kaunena’mba: “Iya, nsa kukulombola butyibi busa kutyibilwa ndumba mukatampe ushikete pa mema mangimangi,+
2 yewa walongele busekese*+ na balopwe ba pano pa ntanda, kadi bekadi ba pano pa ntanda bakolelwe vinyu ya busekese*+ bwandi.”
3 Kadi waunselela mu bukomo bwa mushipiditu mu ntanda mutuputupu. Penepo namona mwana-mukaji umo ushikete pa kinyema kya ntanda kya musombelo utyila pyā kyadi kiyule majina a mutonko, kya mitwe isamba-ibidi ne masengo dikumi.
4 Mwana-mukaji’wa wadi uvwele bityilakana+ ne bityila pyā, kadi wadi mwineñenye na olo ne mabwe malēme ne malungo,+ mu kuboko kwandi namo mwadi kitomeno kya olo kiyule bintu bya mukenye ne bintu bya disubi bya busekese* bwandi.
5 Pa mpala yandi napo padi palembe dijina, kifyame, amba: “Babiloni Mukatampe, inandya bandumba+ ne bintu bya mukenye bya pano pa ntanda.”+
6 Kadi namona’mba mwana-mukaji’wa wadi mukolwe mashi a bajila ne mashi a batumoni ba Yesu.+
Bine, ami pa kumumona natulumuka bininge.
7 Penepo mwikeulu waunena’mba: “Mwanda waka ubatulumuka? Nsa kukulombola kifyame kya uno mwana-mukaji+ ne kya kinyema kya ntanda kya mitwe isamba-ibidi ne masengo dikumi kine kimuselele’kya:+
8 Kinyema kya ntanda kyowamona’kya kyadi’ko, ino ke kutupu’kyo, kadi kisa kukanda kutamba mu lupongo,+ kupwa kekyenda ku konakanibwa. Kadi bekadi ba pano pa ntanda—ba majina abo ampikwa kulembwa mu muvungo wa būmi+ tamba ku ñanjilo ya ino ntanda—bakatulumuka pa kumona kinyema kya ntanda kyadi’ko, ino ke kutupu’kyo, ino kadi kisa kwikala’ko monka.
9 “Pano palomba ñeni* idi na tunangu: Mitwe isamba-ibidi+ yelekeja ngulu isamba-ibidi, pene patentamine mwana-mukaji pangala.
10 Kadi kudi balopwe basamba-babidi: Batano ke bapone, umo ukidi’ko, kadi mukwabo kafikile; ino pasa kufika, usa kwikala’ko kakitatyi katyetye.
11 Kadi kinyema kya ntanda kyadi’ko’kya ino ke kutupu’kyo,+ nakyo i mulopwe wa mwānda, akyo’ko kitambanga ku boba basamba-babidi, kadi kyendanga ku konakanibwa.
12 “Masengo dikumi owamona’a elekeja balopwe dikumi kebatambwile bulopwe, inoko abatambula lupusa bu balopwe mu nsá imo pamo na kinyema kya ntanda.
13 Bano’ba badi na mulangwe umo, o mwanda bapa kinyema kya ntanda bukomo ne lupusa lwabo.
14 Bano’ba bakalwa na Kana ka Mukōko,+ ino byadi Mfumwandya bamfumu ne Mulopwe wa balopwe,+ Kana ka Mukōko kakebanekenya.+ Kadi, boba badi nandi betyilwe, batongwe kadi bakōkele nabo bakebanekenya.”+
15 Waunombola’mba: “Mema owamona’a, pene pashikete ndumba, elekeja bantu ne bibumbo ne mizo ne ndimi.+
16 Kadi masengo dikumi+ owamona’a, ne kinyema kya ntanda,+ bano’ba bakashikwa ndumba,+ bakamusala ne kumuvūla mutaka, kadi bakadya mwita wandi ne kumusōka na mudilo fututu.+
17 Mwanda Leza watūla’kyo mu mityima yabo kufikidija mulangwe wandi,+ bine, kufikidija mulangwe wabo umo pa kupa kinyema kya ntanda+ bulopwe bwabo, enka ne bikafikidila binenwa bya Leza.
18 Kadi mwana-mukaji+ owamona’wa welekeja kibundi kikatampe kibikele pa balopwe ba pano pa ntanda.”
Kunshi kwa Dyani
^ Tala Nshintulwilo ya Bishima.
^ Mu Kingidiki i, porneia. Tala Nshintulwilo ya Bishima.
^ Mu Kingidiki i, porneia. Tala Nshintulwilo ya Bishima.
^ Nansha’mba “lūku.”
