Musapudi 8:1-17
8 Le i ani udi pamo bwa muntu wa tunangu? Le i ani uyukile kupwa mwanda?* Tunangu twa muntu tumunikilanga mpala yandi ne kunekenya mpala yandi myūmu.
2 Nanena’mba: “Kōkela misoñanya+ ya mulopwe mwanda wa mutyipo owatyipile kudi Leza.+
3 Kokapēja kutaluka ku meso andi.+ Koketabila kintu kyonso kibi;+ mwanda aye ubwanya kulonga kyonso kyasaka,
4 mwanda kinenwa kya mulopwe kekishintangapo;+ le i ani ubwanya kumunena’mba, ‘Le i bika byolonga?’”
5 Yewa ulama mbila kakamonepo malwa,+ kadi mutyima wa tunangu ukayuka kitatyi kiyampe ne mwa kulongela.*+
6 Kudi kitatyi ne mwa kulongela*+ mu mwanda o-onso, ke-pantu makambakano a bantu i mangi.
7 Byokekudipo muntu uyukile bikalongeka, le i ani ubwanya kumulombola mobikalongekela?
8 Monka kemwikadilepo muntu na bukomo pa mushipiditu* nansha kubwanya kukankaja mushipiditu, mo monka kemwikadilepo muntu na bukomo pa difuku dya lufu.+ Monka kemupelwangapo muntu lupusa lwa kwenda mu kitatyi kya divita, mo monka ne bubi nabo kebukapandijapo* boba balongalonga’bo.
9 Namone bino byonso, kadi nate mutyima wami ku mwingilo onso wingilwa muno munshi mwa dyuba, kitatyi muntu kyabikala muntu mwanda wa kumusanshija.*+
10 Kadi namwene babi bajīkwa, boba badi batwela ne kutamba mu kifuko kijila, ino bebedilwe bukidi bonka mu kibundi mobadi balonga namino.+ Kino nakyo i kya bitupu.
11 Bilongwa bibi byokebityibīlwepo nsambu bukidibukidi,+ mutyima wa bantu ubasumininwa kulonga bibi.+
12 Nansha bibwanya kipya-mambo kulonga bubi misunsa katwa ne kwikala mūmi kitatyi kilampe, ino njingulwile amba boba batyina Leza wa bine bikebendekela biyampe, mwanda bamutyinanga.+
13 Ino mubi+ kebikamwendekelapo biyampe, kadi kakalepejapo mafuku andi adi pamo bwa munjiñininya,+ mwanda katyinangapo Leza.
14 Kudi kintu kya bitupu* kilongeka pano pa ntanda: Kudi bantu boloke bobalongela bintu bwa abo balongele bibi,+ kadi kudi bantu babi bobalongela bintu bwa abo balongele byoloke.+ Nanena’mba ne kino nakyo i kya bitupu.
15 Penepo natendela nsangaji,+ mwanda i kutupu kintu kipityile buya ku muntu muno munshi mwa dyuba kutabuka kudya ne kutoma ne kusangala; kino kikamulonda paingila bininge mu mafuku a būmi bwandi,+ amupa Leza wa bine muno munshi mwa dyuba.
16 Natele mutyima wami ku kwikala na tunangu ne ku kumona mingilo yonso ilongeka pano pa ntanda,+ enka ne kubulwa tulo dyuba ne bufuku.*
17 Penepo namona mwingilo onso wa Leza wa bine, kadi najingulula’mba bantu kebabwanyapo kwivwanija bilongeka muno munshi mwa dyuba.+ Nansha shi bantu balonge namani, kebabwanyapo kwiwivwanija. Nansha shi banene amba badi na tunangu twa kuyuka’o, kebabwanyapo kwiwivwanija binebine.+
Kunshi kwa Dyani
^ Nansha’mba “kushintulula mwanda.”
^ Nansha’mba “butyibi.”
^ Nansha’mba “butyibi.”
^ Nansha’mba “umpuya; luvula.”
^ Bibwanika padi i, “bubi bwabo kebubwanyapo kukūla babi.”
^ Nansha’mba “kumulonga kibi; kumumwesha malwa.”
^ Nansha’mba “kileta njia.”
^ Bibwanika padi i, “bantu kebamonangapo tulo dyuba nansha bufuku.”
