Nkindi 17:1-28
17 I kipite buya kwikala na kipindi kya mukate mūmu kokwa kudi ndoe*+Kupita’ko njibo miyule masobo* ne lupotopoto ponka.+
2 Mwingidi wa bujinguludi ukabikadila mwana ulonga bya bumvu;Ukapyana bupyani pamo bwa aye mwanabo.
3 Kisuku kya kutōkeja nakyo i kya ndalama, nkelwa nayo i ya olo,+Ino Yehova ye ubandaulanga mityima.+
4 Muntu mubi utanga mutyima ku binenwa bibi,Kadi muntu ongojana utejanga ludimi lwa nshikani.+
5 Yewa ense uzawila mulanda utukanga Mulongi wandi,+Kadi yewa ense usangela kimpengele kya mukwabo kakabulwepo kupebwa mfuto.+
6 Bankana i kilukwa kya banunu,Kadi bashabantu* i ntumbo ya babo bana.
7 Binenwa byoloke* kebifwaninwangapo mulembakane.+
Le mulopwe* ukafwaninwa namani binenwa bya bubela!+
8 Kyabuntu kidi pamo bwa dibwe* dilēme kudi mwinē’kyo;+Konso kwaalamukila, kilengejanga bintu bimwendekele.+
9 Yewa ense ulekela* kujilula ukimbanga buswe,+Ino yewa unena’nka kunena myanda’ya ukalañanyanga balunda ba pa mutyima.+
10 Kufuna kuteñanga bininge muntu wa ñeni+Kupita’ko kukupila kivila misunsa katwa.+
11 Muntu mubi ukimbanga’nka butomboki,Ino mukendi mubimubi ukatumwa mwanda wa kumupa mfuto.+
12 I kipite buya kwisambakana na uluse obaselele twanaKupita’ko kwitana na kivila mu bulembakane bwakyo.+
13 Shi muntu ulubula kibi ku kiyampe,Kibi kekikatalukapo mu njibo yandi.+
14 Kushilula lūma i pamo bwa kujikula kibelo kya mema;*Kumeso kwa lupotopoto kushilula, taluka’po.+
15 Muntu ense ubingija mubi ne muntu ense uponeja mubinge+—Abo bonso babidi i ba munyanji kudi Yehova.
16 Le bidi na kamweno’ka shi kivila kidi na muswelo wa kwikala na tunanguIno kekidipo na mutyima wa kwikala nato?*+
17 Mulunda wa bine ulombolanga buswe kitatyi kyonso+Kadi i mwanenu mubutulwe mwanda wa bitatyi bya tusua.+
18 Muntu wampikwa ñeni* ukunkanga maboko ne kwitabijaKutūla kyeya ku meso a mulondakani nandi.+
19 Yewa usenswe kulwa usenswe kujilula.+
Muntu ense ulepeja kibelo kyandi witanga kupona.+
20 Yewa wa mutyima mukondame kebikamwendekelapo,*+Kadi yewa wisamba bya bongojani ukaponena mu musala.
21 Yewa ubutula mwana kivila ukevwana njia;Kadi shandya mwana wampikwa ñeni kadipo na nsangaji.+
22 Mutyima wa nsangaji i bwanga buyampe,*+Ino mushipiditu muvingakane utyepejanga bukomo bwa muntu.*+
23 Muntu mubi ukayata majika-kanwa kufula*Mwanda wa kunyengakanya dishinda dya boloke.+
24 Tunangu tudi’tu ku meso a muntu wa kusansanya,Ino meso a kivila alumbakananga kufika ne ku mfulo kwa ntanda.+
25 Mwana kivila uletelanga shandi njiaNe kusanshija* mutyima wa yewa wamubutwile.+
26 Kupa muntu moloke mfuto* ke kuyampepo,Kadi kukupila bantu ba bulēme ke byolokepo.
27 Muntu wa buyuki ukankajanga binenwa byandi,+Kadi muntu wa kusansanya ukekala talala.*+
28 Enka ne mulembakane ūbile talala ukamonwa bu wa tunangu,Ne yewa umumine milomo yandi, bu muntu wa kusansanya.
Kunshi kwa Dyani
^ Kishima pa kishima i, “bitapwa.”
^ Nansha’mba “talala nyā.”
^ Nansha’mba “bambutwile.”
^ Nansha’mba “bilumbuluke.”
^ Nansha’mba “wa bulēme.”
^ Nansha’mba “i dibwe dilengeja kwitabijibwa.”
^ Kishima pa kishima i, “upūta.”
^ Nansha’mba “pamo bwa kujikula mumba.” Kishima pa kishima i, “kutambija mema.”
^ Nansha’mba “ino akyo kwikala na ñeni mpika?”
^ Kishima pa kishima i, “wampikwa mutyima.”
^ Kishima pa kishima i, “kakamonepo biyampe.”
^ Nansha’mba “ūmijanga mikupa.”
^ Nansha’mba “buyampe pa kundapa.”
^ Kishima pa kishima i, “majika-kanwa mu kyadi.”
^ Kishima pa kishima i, “kuludija.”
^ Nansha’mba “Kufutyija muntu moloke.”
^ Kishima pa kishima i, “mushipiditu utalala.”
