Nkindi 24:1-34
24 Kokyabila bantu babi,Kadi kokabila mpata kupwana nabo,+
2 Mwanda mutyima wabo ulangulukilanga pa lūma,Kadi milomo yabo īsambanga bintu bikambakanya.
3 Na tunangu njibo* yubakwanga,+Kadi na kusansanya ikomejibwanga pototo.
4 Na buyuki byumba byayo i biyuleBintu bilēme bya miswelo yonso ne byabulēme bisangaja.+
5 Muntu wa tunangu i mukomo,+Kadi na buyuki muntu uvudijanga bukomo bwandi.
6 Na bwendeji bwa bwino* ukalwa divita dyobe,+Kadi mu badingidi bavule mudi bushindañani.*+
7 Kivila kekipetelwangapo pa tunangu twa bine;+Kekidipo na kya kunena mu kibelo kya kibundi.
8 Yewa ense ukuta kitumba kibiUketwa bu mfumwandya nkuku.+
9 Nkuku ya bulembakane* i bubi,Kadi bantu bashikilwe wa kibengo.+
10 Shi utyumukwe mutyima mu difuku dya tusua,*Bukomo bobe bukatyepa.
11 Kūla boba baselelwa ku lufu,Kadi koka boba balundukila ku kutapwa.+
12 Shi unene amba, “Ino batwe ketwadipo tuyukile kino,”
Le Yewa ubandaulanga mityima* kajingulwile’kyopo?+
Bine, Yewa ukutalanga* ukayukaKadi ukalubwila muntu ne muntu mwendele mingilo yandi.+
13 Wami mwana, dyá būki mwanda i buyampe;Būki bwa ku kisá butobalanga kudya.
14 Mo monka, yuka’mba tunangu i tuyampe kodi.*+
Shi witusokole, ukekala na būmi bwa kumesoKadi lukulupilo lobe kelukatalulwapo.+
15 Kokajikila na mutyima mubi kubwipi na njibo ya moloke;Kokyonakanya kifuko kyandi pa kukōkolokwa.
16 Mwanda moloke ubwanya kupona misunsa isamba-ibidi, kadi ukabūka monka,+Ino mubi ukakukajibwa na kyamalwa.+
17 Shi walwana nobe wapone, kokasepelela,Kadi shi wakukala, mutyima obe kewakasangala;+
18 Shi bitupu, Yehova ukamona ne kufītwa,Kadi ukatalula bulobo bwandi pādi.*+
19 Kokafītwa mutyima* mwanda wa bantu babi;Kokyabila bantu babi,
20 Mwanda i kutupu mubi nansha umo ukekala na būmi bwa kumeso;+Kinanu kya babi kikabula.+
21 A wami mwana, tyina Yehova ne mulopwe.+
Kadi kokapwana na bantomboki,*+
22 Mwanda kimpengele kyabo kikāya mu kitulumukila.+
I ani le uyukile musala ukebaletela bano bonso babidi?*+
23 Bino binenwa nabyo i bya bantu ba tunangu:
Mboloji mu butyibi ke miyampepo.+
24 Yewa ense unena mubi amba, “Wi moloke,”+
Ukafingwa na bantu ne kutulujibwa na mizo.
25 Ino bikekala biyampe ku boba bamudingila;+Madyese a bintu biyampe akāya pobadi.+
26 Bantu bakafifya milomo ya yewa ulondolola kwampikwa budimbidimbi.*+
27 Longolola mwingilo obe wa panja, kadi teakanya bintu byonso mu budimi;Kupwa ubaka njibo* yobe.
28 Kokatūdila mulondakani nobe bukamoni bubi mwanda ke mwanda.+
Kokengidija milomo yobe mwanda wa kongola bakwenu.+
29 Kokanena’mba: “Nsa kumulonga enka mwawaunongela;Nsa kumulubwila byaalongele.”*+
30 Napityīle ku budimi bwa muzoze,+Ku budimi bwa mañanza bwa muntu wampikwa ñeni.*
31 Namwene amba bwadi butumpe biyombo bityani;Pa nshi padi payule lusungesunge,Kadi lubumbu lwabo lwa mabwe lwadi lupone.+
32 Namwene kino nekilama ku mutyima;Nemwenine’kyo penepa naboila’ko ino ñeni amba:*
33 Kulāla’ko bityetye, kukunuka’ko bityetye,Kukōkolokwa bityetye, makasa mu kyadi,
34 Kadi bulanda bobe bukāya pamo bwa kabwalāla,Ne bufudile bobe pamo bwa muntu uvwele byabulwi.+
Kunshi kwa Dyani
^ Nansha’mba “ba mu njibo.”
^ Nansha’mba “bwendeji bwa tunangu.”
^ Nansha’mba “kunekenya; lupandilo.”
^ Nansha’mba “Nkuku ya mulembakane.”
^ Nansha’mba “mu bitatyi bya makambakano.”
^ Nansha’mba “milangwe.”
^ Nansha’mba “utalanga muya obe.”
^ Nansha’mba “tutobalanga ku obe muya.”
^ Ko kunena’mba, walwana.
^ Nansha’mba “Kokajingwa mutyima.”
^ Nansha’mba “boba bashintashinta.”
^ Ko kunena’mba, Yehova ne mulopwe.
^ Bibwanika padi i, “Kulondolola mobyolokele kudi pamo bwa kufifya.”
^ Nansha’mba “ba mu njibo.”
^ Nansha’mba “Tusa kwisokola nandi.”
^ Kishima pa kishima i, “wampikwa mutyima.”
^ Kishima pa kishima i, “namwenine’mo bulemununi amba:”
