Mungya Bible, Davida mulopwe wa Isalela wāikele’ko mu myaka katwa ka 11 Yesu Kaile, kadi lutundu lwandi lwābikele mu bula bwa myaka tutwa na tutwa. Inoko bantu bamo ba kafutululo bapatanyanga’mba myanda ya Davida i ya kufwatakanya, kadi i mfumo mitumbe ifumikwa tamba kala. Le Mulopwe Davida i muntu wāikele’ko bine?

 Mu 1993, Avraham Biran mwifundi wa bintu bya kishiyekulu ne kisumpi kyandi basokwele kipindi kya dibwe mu Tel Dan, kungala kwa Isalela, kyadi na bilembwa bitelelwe’mo “Njibo ya Davida.” Bino bilembwa bya kala bya mu ludimi lwa Bayuda i bya tamba myaka katwa ka kitema Yesu Kaile. Na bubine i kipindi kya dibwe kya ku mulawalawa wāubakile bene Alami, pobādi beanya mwanda wa kunekenya kobānekenye bene Isalela.

 Kishinte kimo kya mu dibuku Bible History Daily kinena’mba: “Kudi bantu badi bapatanya bilembwa byadi bitelelwe’mo ‘Njibo ya Davida’ . . . Ino befundi bavule ba Bible ne befundi ba bintu bya kishiyekulu baitabije amba kipindi kya dibwe kya mu Tel Dan i bukamoni bubajinji bulombola patōkelela’mba Mulopwe Davida utelelwe mu Bible i muyukane mu mānga, kadi kino i kintu kya mvubu mpata mu bintu bīsambila pa Bible bisokwelwe bine byalupwilwe mu dipepala Biblical Archaeology Review.”