Bisonekwa bya Kingidiki bya Bwine Kidishitu bitelanga divule Banabasa ne mutumibwa Polo. Bano bana-balume bādi batadi bendakana, bādi bapempula bipwilo bibajinjibajinji. Mwanda waka? Bādi batele mutyima binebine ku būmi bwa ku mushipiditu bwa banababo mu kipwilo. Polo wānenene amba wādi usaka ‘kujoka bidi akapempule banababo’ ne kumona mobekadile. Wādi wenda makilometele tutwa na tutwa mwanda wa kukebakankamika. (Bilongwa 15:36) Uno o mutyima udi na batadi bendakana dyalelo.

Bailanga kwitukankamika. Mutadi ne mutadi wa kipindi upempulanga bipwilo kubwipi kwa 20, misunsa ibidi pa mwaka, na kulonga yenga umo pa kipwilo ne kipwilo. Tukokeja kumwena mpata mu bwino bwa bano batutu ne mu bwa bakaji babo, shi ekale i basonge. Beelelanga’ko kuyuka banuke ne batame bene kumo, kadi badi na mutyima wa kwitutwala mu busapudi ne mu kufundija bantu Bible. Bano batadi baloñanga bupempudi bwa bukumbi pamo na bakulumpe, kadi betukankamikanga na kunena mīsambo ikankamika ku kupwila ne ku bitango.—Bilongwa 15:35.

Batanga bantu bonso mutyima. Batadi ba bipindi bakambakenanga bininge būmi bwa ku mushipiditu bwa bipwilo. Bekalanga bebunga pamo na bakulumpe ne bengidi ba mingilo mwanda wa kumona muswelo wendelela kipwilo ne kwibapa madingi a mwa kuvuijija biselwa byabo. Bakwashanga bapania babwanye kusapula senene, kadi basangelanga kwiyuka na bapya bebwejeje’ko ne kuyuka mobendelela ku mushipiditu. Bano batutu bonso bepānanga na mutyima tō bwa ‘bengidi netu mwanda wa kamweno ketu.’ (2 Kodinda 8:23) Bine, tufwaninwe kwiula lwitabijo lwabo ne kwipāna kobepēne kudi Leza.—Bahebelu 13:7.

• Mwanda waka batadi ba bipindi bapempulanga bipwilo?

• I muswelo’ka okamwena mu bupempudi bwabo?