KIFUNDWA 6
I Lukulupilo’ka Lotudi Nalo pa Bafwile?
1. Le myanda miyampe itala bafwile i myanda’ka?
Kitatyi kyāfikile Yesu ku Betani kubwipi na Yelusalema, mulunda nandi Lazalasa wādi ke mufwe kepadi mafuku aná. Yesu wāenda ku kibundu pamo na ba Mata ne Madia, bakaka ba ufwile’wa. Na pano kala, kibumbo kibebunge. Fwatakanya’po nsangaji yāivwene ba Mata ne Madia pa kumona Yesu usangula Lazalasa ke mūmi!—Tanga Yoano 11:21-24, 38-44.
Mata wādi kala uyukile myanda miyampe itala boba bafwile. Wēfundile mu Kinenwa kya Leza amba Yehova ukasangula bafwe bakekale monka na būmi pano pa ntanda.—Tanga Yoba 14:14, 15.
2. Lelo bafwe badi namani?
Leza wānenene Adama amba: “Wi luvumbi kadi ukajokelanga ku luvumbi.”—NGALWILO 3:19.
Bantu i bapangwe ku luvumbi. (Ngalwilo 2:7; 3:19) Ketudipo mishipiditu ikele na umbidi wa misunya. Twi bipangwa bya ku ngitu, o mwanda potufwa, kekudipo kintu kishalanga na būmi. Shi tubafu, bongolo bwetu nabo bubafu, ne mifwatakanyo yetu nayo yaoneka. O mwanda, Lazalasa kānenenepo kintu nansha kimo kya mwaādi wikadile ku lufu, mwanda bafwe kebayukangapo kintu.—Tanga Ñimbo ya Mitōto 146:4; Musapudi 9:5, 6, 10.
Shi bantu abafu, le Leza wibasusulanga mu kalunganyembo ka mudilo? Bible byanena’mba bafwe kebayukilepo kintu, nanshi kalunganyembo ka mudilo i lufundijo lwa bubela lufutulwija Leza. Mulangwe’tu bidi wa kususula bantu mu kalunganyembo ka mudilo i wa munyanji kudi Leza.—Tanga Yelemia 7:31.
Tala video Lelo Bafwe Badi mu Ngikadilo’ka?
3. Le bafwe bakokeja kwituneneja?
Muntu mufwe kabwanyapo kunena nansha kwivwana. (Ñimbo ya Mitōto 115:17) Inoko kudi bamwikeulu bamo babi, kadi babwanya kuneneja bantu na kwitūla pa kyaba kya bafwe. (2 Petelo 2:4) Yehova i mupeleje kwipangula bafwe.—Tanga Kupituluka 18:10, 11.
4. I bāni bakasangulwa?
Midiyo ne midiyo ya bantu bafwile mu bibundu bakajokela ku būmi pano pa ntanda. Nansha ke bantu bamo kebadipo bayukile Leza ne badi balonga bibi bakasangulwa.—Tanga Luka 23:43; Bilongwa 24:15.
Boba bakasangulwa bakamona muswelo wa kwifunda kuyuka mwine mwikadile Leza ne kutamija lwitabijo mudi Yesu na kumukōkela. (Kusokwelwa 20:11-13) Boba bakasangulwa ne kulonga byoloke bakekala na būmi bwa nyeke pano pa ntanda.—Tanga Yoano 5:28, 29.
5. Le lusangukilo lwitufundija bika padi Yehova?
Leza wālengeje twikale na lukulupilo pa bafwile na kutuma Mwana wandi etufwile. O mwanda lusangukilo lwitufundija buswe bwa Yehova ne kanye kandi ka ku buntu bitupu. Kitatyi kikasangulwa bafwe, le i ani okasaka nakampata kumona?—Tanga Yoano 3:16; Loma 6:23.
