1. Mwanda waka bibwanya kwitukomena kukōkela?

 LELO bikukomenanga kyaba kimo kukōkela? Kino kyo kyāfikīle ne Mulopwe Davida, o mwanda wālombele Leza amba: “Sañamuna munda mwami mutyima wa kukukōkela.” (Ñim. 51:12) Davida wādi usenswe Yehova. Nansha nankyo, kitatyi kimo byāmukomēne kukōkela. Ne batwe netu kyaba kimo bibwanya kwitukomena. Mwanda waka? Dibajinji, twi bapyane mutyima wa kuleka kukōkela. Dya bubidi, Satana uloñanga nyeke bukomo bwa kwitulengeja tutomboke pamo bwa aye. (2 Ko. 11:3) Dya busatu, twi bajokolokwe mu ino ntanda na bantu ba mwikadila wa butomboki, “mushipiditu wingila pano mu bana bampikwa kikōkeji.” (Ef. 2:2) Nanshi tufwaninwe kulonga bukomo bwa kulwa na kubulwa kubwaninina kwetu, na Dyabola, ne na ino ntanda amba tukōkele Yehova ne boba bapēle lupusa.

2. Le ‘kukōkela bukidi bonka’ kushintulula bika? (Yakoba 3:17)

² Tanga Yakoba 3:17. Yakoba wālembele ku bukomo bwa mushipiditu amba, bantu ba tunangu ‘bakōkelanga bukidi bonka.’ Kino kishintulula’mba, tufwaninwe kusangela kukōkela na mutyima umo boba bapēlwe lupusa kampanda na Yehova. Shako, Yehova kasakengapo tukōkele muntu witunena tutyumune misoñanya yandi.—Bil. 4:​18-20.

3. Mwanda waka i kya mvubu ku meso a Yehova kukōkela boba badi na lupusa potudi?

³ Tubwanya kupēlelwa kukōkela Yehova kutabuka’ko kukōkela bantu. I byendele’mo, mwanda Yehova wituludikanga nyeke mu muswelo mubwaninine. (Ñim. 19:7) Inoko bantu badi na lupusa i ba kubulwa kubwaninina. Nansha nankyo, Tata wetu wa mūlu i mupe bambutwile, baludiki ba ino ntanda, ne bakulumpe lupusa kampanda. (Nki. 6:20; 1 Ts. 5:12; 1 Pe. 2:​13, 14) Kitatyi kyotwibakōkela, i Yehova otukōkela.  Tutalei muswelo otubwanya kukōkela bantu bapēlwe lupusa na Yehova, nansha kitatyi kimo byotubwanya kukolelwa kwitabija bwendeji bwabo ne kwibulonda.

4. Mwanda waka bana bavule kebakōkelangapo bambutwile babo?

⁴ Bankasampe Batumoni, i bajokolokwe na bankasampe bakwabo “bampikwa kukōkela bambutwile.” (2 Tm. 3:​1, 2) Mwanda waka bankasampe bavule kebakōkelangapo? Mwanda bambutwile bamo baloñanga bishile na byobasapwila babo bana kulonga. O mwanda babo bana bebamonanga bu banzazangi. Bana bakwabo bamonanga madingi a bambutwile babo bu a kala bininge, ampikwa kamweno, kadi a kasuminiji. Shi wi nkasampe, le nobe kodi mwiivwane uno muswelo? Bavule bakolelwanga kulonda musoñanya wa Yehova wa amba: “Kōkelai bambutwile benu mu bumo na Mfumwetu, mwanda kino’ki i kyoloke.” (Ef. 6:1) Le i bika bikakukwasha wibakōkele?

5. Mungya Luka 2:​46-52, mwanda waka kikōkeji kya Yesu ku bambutwile bandi i kya kutendelwa?

⁵ Ubwanya kuboila ñeni ku kimfwa kiyampe kya muntu wākōkele—ke Yesu kadi. (1 Pe. 2:​21-24) Wādi muntu mubwaninine inoko na bambutwile bampikwa kubwaninina. Nansha nankyo, Yesu wālēmekele bambutwile bandi nansha kitatyi kimo byobālongele bilubo ne kutunya kumwivwana. (Div. 20:12) Tubandaulei’ko byālongekele pādi Yesu na myaka 12. (Tanga Luka 2:​46-52.) Bambutwile bandi bāmushile mu Yelusalema. Ba Yosefa ne Madia bādi na kiselwa kya kukimba kuyuka shi babo bana bonso badi mu kibumbo kijokela ku mobo pa kupwa kwa masobo. Pobāsokwele Yesu, Madia wāmutopekele pa makambakano awēbaletēle! Yesu wādi ubwanya kunena’mba kebadipo na bubinga bwa kumutopeka. Ino wālondolwele bambutwile bandi kilondololwa’tu kīpi kadi kya bulēme. Inoko ba Yosefa ne Madia, “kebaivwanijepo byaadi wibalombola.” Nansha nankyo, Yesu wādi “mwibakōkele nyeke.”

6-7. I bika bibwanya kukwasha bankasampe bakōkele babo bambutwile?

⁶ A bankasampe, lelo mukolelwanga kukōkela bambutwile benu kitatyi kyobalonga bilubo nansha kyokebemwivwanapo? Le i bika bibwanya kwimukwasha? Kintu kibajinji, langulukilai pa muswelo wiivwananga Yehova. Bible unena’mba kitatyi kyomukōkela bambutwile benu, “kino’ki kisangajanga Mfumwetu.” (Kol. 3:20) Yehova uyukile amba kitatyi kimo bambutwile benu kebemwivwanijangapo, ne amba kitatyi kimo bemutūdilanga bijila kebimupē lelangapo kukōkela. Inoko kitatyi kyomutonga kwibakōkela nansha shi bidi namani, bimusangajanga.

⁷ Kintu kya bubidi, langulukilai pa mwiivwanina bambutwile benu. Kitatyi kyomwibakōkela, mwibasangajanga ne kwibalengeja bemukulupile. (Nki. 23:​22-25) Kadi kino kikemulengeja mupwane nabo bininge. Tutu Alexandre wa mu Belejike unena’mba: “Ponashilwile kukōkela byadi binsapwila bambutwile kulonga, napwene nabo bininge. Kino kyetulengeje twikale mu nsangaji.” b Kintu kya busatu, langulukilai pa kikōkeji kyenu ku bambutwile dyalelo mokikemukwashisha mafuku a kumeso. Paulo, ushikatanga mu Brezile unena’mba: “Kwifunda kukōkela bambutwile kwankweshe nkōkele Yehova ne bantu bapēle lupusa.” Kinenwa kya Leza kilombola bubinga bukatampe bofwaninwe kukōkela  bambutwile bobe. Kinena’mba: “Amba bikwendekele biyampe kadi wikale mafuku mangi pano pa ntanda.”—Ef. 6:​2, 3.

8. Mwanda waka bankasampe bavule i batonge kukōkela bambutwile babo?

⁸ Bankasampe bavule i bamone muswelo webendekēle bintu pobakōkele bambutwile. Luiza, nandi ushikatanga mu Brezile, byadi bimukomena dibajinji kwivwanija kine kyobamupelēle kwikala na telefone mu kitatyi kampanda. Wadi ulanga’mba bantu bavule ba yandi myaka badi na telefone. Kupwa wajingulula’mba na bubine bambutwile bandi badi bakimba kumukinga. Pano unena’mba, “Nkimonengapo kukōkela bambutwile pamo bwa kikotyi kilēma kyobamvwikile, ino i pamo bwa mushipi ubwanya kupandija būmi bwami.” Elizabeth, kaka nkasampe wa mu États-Unis ukikolelwanga kukōkela bambutwile bandi kitatyi kimo. Ushintulula’mba: “Shi nkivwanijepo senene kine kyatūdila’ko bambutwile kijila kampanda, mvulukanga bijila byabo mobyankingile mafuku kunyuma.” Monica, ushikatanga mu Armeni unena’mba, bintu byadi bimwendekela nyeke biyampe kitatyi kyaadi ukōkela bambutwile bandi kupita’ko kitatyi kyakadipo wibakōkela.

9. Le bantu bavule bamonanga namani kukōkela bijila?

⁹ Bantu bavule betabije amba tusakilwa ba lupusa, kadi tufwaninwe kukōkela nansha’tu bijila kampanda bitūla’ko bano “ba lupusa batabukile bukatampe.” (Loma 13:1) Inoko bano bantu bamo bonka babwanya kwikaka kukōkela bijila byokebasakepo nansha byobamona bu byampikwa kwendela’mo. Kimfwa, twisambilei’ko pa kufuta bitanshi. Bantu bavule ba mu ntanda imo ya mu Bulaya balañanga’mba “ke biyampepo kufuta bitanshi byomona’mba ke byendele’mopo.” O mwanda bekadi ba mu ino ntanda kebafutangapo bitanshi byonso bibalomba ba lupusa.

10. Mwanda waka tukōkelanga enka ne bijila byoketusenswepo?

¹⁰ Bible ulombola’mba maludiki a bantu i a kasusu, adi munshi mwa bwendeji bwa Satana, kadi panopano ponka asa konakanibwa. (Ñim. 110:​5, 6; Mus. 8:9; Luka 4:​5, 6) Kadi witusapwila’mba: “Yewa ense ulwa na lupusa walu na mpangiko ya Leza.” Pano Yehova i muleke ba lupusa batabukile bukatampe baludike mwanda wa kutūla’ko ndudi, kadi witusakilanga twibakōkele mu ludingo kampanda. O mwanda usakanga tulongele “bonso byobya bibafwaninwe,” kubadila’mo bitanshi, bulēme, ne kikōkeji. (Loma 13:​1-7) Kyaba kimo tubwanya kumona kijila kampanda bu i kyampikwa kwendela’mo, kikomo kukōkela, nansha kilomba lupeto luvule. Inoko tukōkelanga Yehova, kadi witusapwila tukōkele bano ba lupusa ponso pobetulomba kulonga bintu kebityumunapo misoñanya yandi.—Bil. 5:29.

11-12. Mungya Luka 2:​1-6, le i bika byālongele ba Yosefa ne Madia mwanda wa kukōkela kijila kyādi kimweka bu kikomo, ne i bika byālupukile’ko? (Tala ne bifwatulo.)

 ¹¹ Tubwanya kuboila ñeni ku kimfwa kya ba Yosefa ne Madia, bākōkele bukidi bonka ba lupusa batabukile bukatampe nansha byobyādi bikomo. (Tanga Luka 2:​1-6.) Madia paādi na dīmi dya kintu kya myeji kitema, kikōkeji kyandi ne kya Yosefa kyātūdilwe pa ditompo. Akutusa, wādi ubikele mu Umbikalo wa Loma, wātūdile’ko kijila kya amba muntu yense ende ku kibundi kyabo mwanda wa kwilembeja. Ba Yosefa ne Madia bādi banenwe kwenda ku Betelema, lwendo lwa makilometele 150 lwa kukanda ne kutūka mikuna. Luno lwendo kelwādipo lupēla, nakampata kudi Madia. Bano ba mulume ne mukaji bādi babwanya kusela mutyima kūlu pa bukomo bwa ngitu bwa Madia ne bwa mwana wādi mu dīmi. Le byādi bya kwikala namani shi bisanso bya lubutulo byāmukwatyile mwishinda? Wādi na dīmi dya mwana ukekala mwenda mafuku bu Meshiasa. Le kino kyēbalengeje baleke kukōkela kijila kya ba lupusa?

¹² Ba Yosefa ne Madia kebālekelepo ano malangalanga onso ebalengeje baleke kukōkela kino kijila. Yehova wēbesele pa kikōkeji kyabo. Madia wāfikile biyampe ku Betelema, wābutula mwana wa bukomo bwa ngitu buyampe, wākwasha enka ne kukufikidila kwa bupolofeto bwa mu Bible!—Mika 5:2.

13. Le kikōkeji kyetu kibwanya kwikala na lupusa’ka pa banabetu?

¹³ Kitatyi kyotukōkela ba lupusa batabukile bukatampe, tumwenanga’mo batwe pamo ne bantu bakwabo. Muswelo’ka? Dibajinji, ketupēbwangapo mfuto ipēbwanga boba bapela kukōkela bijila. (Loma 13:4) Kikōkeji kyetu kibwanya kulengeja ba lupusa bekale na mumweno muyampe pa Batumoni ba Yehova bonso. Kimfwa, pano kepadi myaka mivule mu Nijeria, basola batwelele mu Njibo ya Bulopwe kitatyi kyadi kipwidila’mo banabetu mwanda wa kukimba’mo boba badi bapela kufuta bitanshi. Inoko mukulu wabo wanena basola batambe, na kwibasapwila’mba: “Batumoni ba Yehova bafutanga  nyeke bitanshi.” Nanshi kitatyi kyonso kyokōkela bijila, ulongelanga bantu ba Yehova dijina diyampe—bine bibwanya difuku dimo kukukinga abe pamo ne banabetu mu lwitabijo.—Mat. 5:16.

14. Le i bika byakweshe kaka umo ‘akōkele bukidi bonka’ ba lupusa batabukile bukatampe?

¹⁴ Nansha nankyo, padi ketusakengapo nyeke kukōkela “ba lupusa batabukile bukatampe.” Joanna kaka wa mu États-Unis unena’mba, “Byadi binkomena bininge kukōkela. Mwanda bantu bamo mu kyetu kisaka basusukile bininge pa mwanda wa bukondame bwa ba lupusa.” Inoko Joanna walongele bukomo bwa kushinta milangwe yandi. Dibajinji, walekele kutanga myanda itūlwa pa malezo a mīsambo mine yadi imulengeja ekale na mumweno mubi pa ba lupusa. (Nki. 20:3) Dya bubidi, walombele Yehova amukwashe mwanda wa amukulupile pa kyaba kya kukulupila mu kushinta kwa umbikalo wa bantu. (Ñim. 9:​9, 10) Dya busatu, watangile bishinte bya mu mabuku etu bīsambila pa kuleka kwikuja mu bya ino ntanda. (Yoa. 17:16) Pano Joanna unena’mba, kulēmeka ne kukōkela ba lupusa i kumulengeje atūkije mutyima ne kwikala na nsangaji.

15. Mwanda waka bibwanya kwitukolela kukōkela bulombodi butamba ku bulongolodi bwa Yehova?

¹⁵ Yehova witunena ‘tukōkele boba betutangidile kumeso’ mu kipwilo. (Bah. 13:17) Nansha Mwendeji wetu, Yesu, byadi mubwaninine, boba baingidija mwanda wa kwitutangidila pano pa ntanda ke babwanininepo. Tubwanya kukolelwa kwibakōkela, nakampata shi betulomba kulonga bintu byoketusakilepo kulonga. Ne mutumibwa Petelo nandi bāmupele bulombodi bwākasakilepo kukōkela dibajinji. Pāmulombwele mwikeulu kudya banyema ba disubi mungya Bijila bya Mosesa, Petelo wāpelele—ke musunsapo’tu umo, ino misunsa isatu! (Bil. 10:​9-16) Mwanda waka? Kāivwanijepo buno bulombodi bupya mwanda bwādi bwishile na byaādi ulonga mafuku kunyuma. Shi Petelo wākolēlwe kukōkela bulombodi butamba kudi mwikeulu mubwaninine, nanshi ke kya kutulumukapo shi tukolelwa kulonda bulombodi butamba ku bana-balume ba kubulwa kubwaninina!

16. Nansha mutumibwa Polo byaādi ubwanya kumona bulombodi bobāmupele bu bwampikwa kwendela’mo, le i bika byaālongele? (Bilongwa 21:​23, 24, 26)

¹⁶ Mutumibwa Polo ‘wākōkele bukidi bonka’ nansha ke paāpelwe bulombodi bwaāmwene padi bu bwampikwa kwendela’mo. Bene Kidishitu Bayuda bāivwene lupupuluji padi Polo—lupupuluji lwa amba wādi usapwila bantu “bapondokele Mosesa” ne kuleka kukōkela Bijila bya Mosesa. (Bil. 21:21) Bana-balume banunu bene Kidishitu ba mu Yelusalema bāsoñenye Polo asele bana-balume baná, ende nabo ku tempelo esubule mungya bijila mwanda wa kulombola’mba ulamine Mukanda wa Bijila. Inoko Polo wādi uyukile amba bene Kidishitu kebākidipo munshi mwa Mukanda wa Bijila. Kadi kekudipo kintu kibi kyaālongele. Nansha nankyo, Polo wākōkele kiponka na ponka. “Dya kesha, Polo wasela bana-balume’ba wakesubula nabo pamo mungya bijila.” (Tanga Bilongwa 21:​23, 24, 26.) Kikōkeji kya Polo kyālengeje balame bumo mu bukata mwabo.—Loma 14:​19, 21.

17. Le i ñeni’ka yowaboila ku kimfwa kya kaka Stephanie?

¹⁷ Kaka umo witwa bu Stephanie, wakolēlwe kitatyi kimo kwitabija butyibi bwakwete batutu batangidile kumeso mu yabo ntanda. Aye ne wandi mulume badi bengidila Yehova na nsangaji mu kisumpi kya ludimi lweni. Kupwa bilo ya musambo yaimika kino kisumpi,  ne kwibaluja mu kipwilo kya lwabo ludimi. Stephanie unena’mba, “Kebyansangejepo, nkyaitabijepo amba mu kipwilo kya lwetu ludimi mwadi musakilwa bukwashi.” Nansha nankyo, wakwete butyibi bwa kukwatakanya buno bulombodi bupya. Unena’mba, “Kitatyi pa kupita’po, najingulwile amba buno butyibi bwadi bwa tunangu. Twaikele bambutwile ba ku mushipiditu ba bantu bavule mu kyetu kipwilo bene kebadipo na bisaka mu bubine. Nefundanga na kaka washilwile panopano kusapula monka. Kadi pano ngidi na kitatyi kivule kya kwifunda pa kasuku.” Ubweja’ko amba, “Ngidi na mutyima wa mundamunda utōka pa kuyuka’mba nalongele byonso byombwanya mwanda wa kukōkela.”

18. Le tumwenanga namani mu kwikala na kikōkeji?

¹⁸ Tubwanya kwifunda kwikala na kikōkeji. Yesu “wefundile kikōkeji,” ke ku ngikadilopo miyampe, inoko i “ku masusu awasusukile.” (Bah. 5:8) Pamo bwa Yesu, netu twifundanga divule kikōkeji mu ngikadilo mikomo. Kimfwa, pashilwileshilwe’tu kipupo kya Corona, pobetunenene kuleka kupwidila ku Mobo a Bulopwe, ne kuleka kusapula ku njibo ne njibo, le byakukomene kukōkela? Inoko kikōkeji kyobe kyakukingile, kyalamine bumo mu kipwilo, kadi kyasangeje Yehova. Pano batwe bonso twi bateakanibwe senene mwanda wa kukōkela bulombodi bo-bonso botukatambula pa kyamalwa kikatampe. Kwibukōkela kukapandija būmi bwetu!—Yoba 36:11.

19. Mwanda waka usaka kwikala na kikōkeji?

¹⁹ Tubefunde amba kikōkeji kituletelanga madyese mavule. Inoko tutoñanga dibajinji kukōkela Yehova mwanda tumusenswe kadi tukimbanga kumusangaja. (1 Yo. 5:3) Ketubwanyapo kwalwija Yehova byonso byaetulongēle. (Ñim. 116:12) Inoko tubwanya kumukōkela ne kukōkela boba bapēle lupusa potudi. Shi tukōkele, tukalombola’mba twi ba tunangu. Kadi kwikala ba tunangu kusangajanga mutyima wa Yehova.—Nki. 27:11.