BINE KINO I KYEPELO KYA KUTENDELWA’PO KASHĀ! Mupangi wetu i mulaye kwitupa būmi bwa nyeke, enka pano pa ntanda’pa. Inoko, bavule bamonanga’mba i bikomo kukulupila kino. Banenanga’mba, ‘Muntu ense i wa lufu. Būmi ne lufu bidi mu kipangila kyetu.’ Bakwabo nabo bamona’mba bibwanika kukekala’ko nyeke ne nyeke, ino ke pano pa ntandapo. Banenanga’mba ukekala’ko nyeke ne nyeke enka shi ubafu ne kwenda mūlu. Le ulanga’po namani?

Kumeso kwa kulondolola, tukulomba ulangulukile bidi pa malondololo aleta Bible ku bino bipangujo bisatu: Le muswelo upangilwe muntu ulombola bika pa bula bwa kitatyi kyaadi wa kwikala’ko? Le i mpango’ka imbajinjibajinji ya Leza itala ntanda ne bantu? Le lufu lwātwelele namani mu muzo wa muntu?

Na bubine, mu bipangwa byonso byūmi bipangilwe na Leza pano pa ntanda, bantu i bapangwe mu muswelo wa pa bula. Namani? Bible unena’mba bantu kete bo bāpangilwe mu “bu-kyelekejo” ne “kīfwa” kya Leza (Ngalwilo 1:26, 27) Le ko kunena namani? Ko kunena’mba bantu bāpangilwe na ngikadila iifwene na ya Leza, pamo bwa buswe ne boloke.

Kadi, bantu i bapebwe bukomo bwa kulanga, enka ne bukomo bwa kuyuka kiyampe ne kibi ne kwikala na mutyima wa kupwana na Leza. O mwanda tutendelanga bukatakata bwa diulu ne ntanda, ne buyampe bwa bupangi, pamo bwa mumwekelo muyampe wa bintu, minjiki, ne binenwa bya kusasula. Kya mvubu nakampata, bantu badi na kyepelo kya pa bula kya kutōta Umpangi wabo. Ino ngikadila yo ilengeje bantu beshile bininge na bipangwa bikwabo byonso byūmi bya pano pa ntanda.

Ino langulukila bidi pa kino: Lelo Leza wādi wa kupa bantu ino ngikadila ya kutendelwa, ne bwino bwa kwiitamija ne kwiilumbulula, shi kwadi amba i ba kwikala’ko’tu mu myaka mityetye kete? Bubine i buno amba Leza wētupele ino ngikadila ya pa bula ne bwino mwanda wa twikale na būmi bwa nyeke ne nyeke pano pa ntanda.

Bantu bamo banenanga’mba Leza kāpangilepo bantu mwanda wa bekale’ko nyeke pano pa ntanda. Balañanga’mba ntanda yāpangilwe mwanda wa kwikala’po mafuku matyetye, bu kifuko kya kutompela’po bantu mwanda wa kuyuka yewa ufwaninwe kukekala nyeke mūlu na Leza. Inoko shi bino byadi bya bine, mwene byadi bya kumwekeja’mba Leza ye aye  ulengeja bubi ne bibi byonso biyudile pa ino ntanda? Bino byadi bya kwitupa na mwikadilo wa Leza. Bible wisambila padi amba: “Mwanda mashinda andi onso i moloke swā! I Leza wa binebine ne wampikwa bukondame, Aye i moloke ne mululame.”​—Kupituluka 32:4.

Bible ulombola patōkelela mpango imbajinjibajinji ya Leza itala ino ntanda na bino binenwa bya’mba: “Madiulu i madiulu a Yehova; ino panopanshi wapene kudi bāna ba bantu.” (Ñimbo ya Mitōto 115:16) Na bubine, Leza wāpangile ntanda ikale kīkalo kilumbuluke, kya nyeke kya bantu, ne kuyuja’po bintu byonso byotusakilwa mwanda wa būmi bwetu bwikale buyampe kadi bwampikwa mfulo.​—Ngalwilo 2:8, 9.

“Madiulu i madiulu a Yehova; ino panopanshi wapene kudi bāna ba bantu.”​—Ñimbo ya Mitōto 115:16

Kadi Bible ulombola patōkelela mpango ya Leza pa bantu. Wāpele ba mulume ne mukaji babajinji mwingilo wa ‘kuyuja pano panshi ne kwipanekenya, ne kubikala bulopwe pa bintu byonso byūmi bilandala pano panshi.’ (Ngalwilo 1:28) Bine, bāpelwe dyese dikatampe’po kashā dya kulama ne kwalamuna ntanda yonso ke Paladisa! Na bubine, ba Adama ne Eva ne lutundu lwabo badi ba kwikala na būmi bwa nyeke pano pa ntanda, ino ke mūlupo.

Penepa, mwanda waka tufwanga? Bible ulombola’mba kipangwa kimo kya Leza kya ku mushipiditu, kyāyukene mwenda mafuku bu Satana Dyabola ntomboki, kyālwile na mpango ya Leza mu budimi bwa Edena. Namani?

Satana wāongwele bambutwile betu babajinji, ba Adama ne Eva belunge nandi mu butomboki bwaātombokele Leza. Satana pa kwibalombola’mba Leza i mwibafye kintu kiyampe​—ke lupusa lwa kwitongela abo bene kiyampe ne kibi kadi​—penepo belunga kudi Satana ne kutombokela Leza. Byafula kwepi? Bāfwile mwenda mafuku enka na mwēbadyumwinine’kyo Leza. Bājimija kyabuntu kya kwikala’ko nyeke mu Paladisa pano pa ntanda.​—Ngalwilo 2:17; 3:1-6; 5:5.

Butomboki bwa ba Adama ne Eva bwāikele na lupusa pa bantu bonso kufika ne dyalelo. Kinenwa kya Leza kinena’mba: “Monka mwātwelele bubi mu ino ntanda kupityila ku muntu umo ne lufu kupityila ku bubi, ne lufu nalo lwasambakana ku bantu bonso.” (Loma 5:12) Nanshi tufwanga mwanda twi bapyane bubi ne lufu ku bambutwile betu babajinji, ke ‘kitungopo’ kitutungīle Leza.

Butomboki bwa mu Edena kebukankejepo mpango imbajinjibajinji ya Leza itala bantu ne ntanda. Buswe bubwaninine bwa Leza ne boloke bwandi byāmulengeje alete muswelo wa kwitukūla ku bupika bwa bubi ne lufu byotupyene. Mutumibwa Polo ushintulula’mba: “Mpalo ipala bubi i lufu, ino kyabuntu kipāna Leza i būmi bwa nyeke mudi Kidishitu Yesu Mfumwetu.” (Loma 6:23) Na bya dyese, Leza “wapēne wandi Mwana mubutulwe bunka [Yesu Kidishitu], amba ense ulombola lwitabijo mudi aye kakyonakanibwa, ino amone būmi bwa nyeke.” (Yoano 3:16) Pa kwilambula aye mwine na mutyima tō bu kitapwa kya kinkūlwa, Yesu wākūdile bantu bonso badi bajimine kupityila kudi Adama. *

Panopano ponka, mulao wa Leza wa paladisa ya pano pa ntanda usa kufikidila. Ubwanya kukemwena uno mulao wa mu mafuku a kumeso shi ute mutyima ku kidyumu kya Yesu kya’mba: “Twelelai pa kakibelo katyetye; mwanda dishinda ditwala ku konakanibwa i dikatampe kadi didi pululu, ne benda’mo bene i bavule; inoko kakibelo i katyetye ne dishinda ditwala ku būmi nadyo i dityinye, ne ba kwidisokola bene i batyetye.” (Mateo 7:13, 14) Na bubine, butyibi bokwata budi na lupusa pa būmi bobe bwa kumeso. Le i bika byofwaninwe kulonga?