DYALELO, būmi kebudipo na mwādi mwibusakila Leza. Ntanda yadi ifwaninwe kuyula bantu balēmekele bubikadi bwa Mupangi, balonda buludiki bwandi, kadi bamwekeja ngikadila yandi ya buswe. Badi ba kwingidila pamo na nsangaji pa kulela bisaka, kusokola bintu bipya, ne kwalamuna ntanda yonso ke paladisa.

• “Wafudija mavita konsokonso pano pa ntanda.”​—Ñimbo ya Mitōto 46:9.

• “Kitatyi kitungwe kyaile kya . . . konakanya boba bonakanya ntanda.”​—Kusokwelwa 11:18.

• “I kutupu mwikadi ukanena’mba: ‘Nabela.’”​—Isaya 33:24.

• “Batongwe bami bakasangela bya binebine mingilo ya makasa abo.”​—Isaya 65:22.

Le buno bupolofeto bukafikidila namani? Leza i mutonge Yesu wandi Mwana bu Mulopwe wa umbikalo mubwaninine ukaludika ntanda ao momwa mūlu. Bible wiutela bu Bulopwe bwa Leza. (Danyele 2:44) Bible wisambila padi Yesu amba: “Leza ukamupa lupona . . . , kadi ukabikala bu Mulopwe.”​—Luka 1:32, 33.

Yesu paādi pano pa ntanda, wālongele bingelengele bivule bine bilombola’mba pakekala Mulopwe ukakwasha bantu bekale na būmi buyampe bininge kupita botudi nabo dyalelo.

• Wābelwile misongo ya miswelo yonso, wālombola’mba ukapwa bulema bwa bantu.​—Mateo 9:35.

• Wātaleje dijiba, wālombola’mba ukakinga bantu na kutalaja bimpengele bya kipangila.​—Mako 4:36-39.

• Wādishishe bantu tununu na tununu, wālombola’mba ukavuija bisakibwa bya bantu.​—Mako 6:41-44.

• Waālamwine mema ke vinyu ku masobo a butundaile, wālombola’mba ukakwasha bantu bekale na nsangaji mu būmi.​—Yoano 2:7-11.

Le ubwanya kwikala na būmi buteakanya Leza pa mwanda wa bantu basenswe? Kudi “dishinda” dyofwaninwe kwenda’mo. Bible widitela bu “dishinda ditwala ku būmi . . . ne ba kwidisokola bene i batyetye.”—Mateo 7:14.

Le dishinda ditwala ku būmi i bika? Leza unena’mba: “Ami Yehova, ne Leza obe, Mwine ukufundija mwanda wa kamweno kobe, Mwine ukwendeja mu dishinda dyofwaninwe kwenda.” (Isaya 48:17) Kwenda mu dino dishinda o muswelo wa kwikala na būmi buyampe.

Yesu wānenene amba: “Ami ne dishinda ne bubine ne būmi.” (Yoano 14:6) Shi twitabije bubine bwāfundije  Yesu ne kwiula kimfwa kyaāshile nabya tukafwena kudi Leza ne kwikala na būmi buyampe.

Le ukasokola dishinda ditwala ku būmi namani? Nansha byokudi bipwilo bivule, ino Yesu wādyumwine amba: “Ke muntupo ense wa kunena ami amba, ‘Mfumwami, Mfumwami,’ ukatwela mu Bulopwe bwa mūlu, poso’nka yewa ulonga kiswa-mutyima kya Tata udi mūlu.” (Mateo 7:21) Kadi wānenene amba: “Mukebayukila ku bipa byabo.” (Mateo 7:16) Bible ubwanya kukukwasha uyuke mutōtelo wa bine ne kwiushiañanya na wa bubela.​—Yoano 17:17.

Le ukenda mu dishinda ditwala ku būmi namani? Bilombanga kuyuka Nsulo mine ya būmi: Le i ani? Le dijina dyandi i ani? Le udi namani? Le uloñanga bika? Le i bika byaetusakila tulonge? *

Leza usakanga bantu balonge kintu kya mvubu kupita’ko’tu kwingila, kudya, kukaya, ne kulela bisaka. Tubwanya kuyuka Mupangi wetu ne kwikala balunda nandi. Tubwanya kulombola’mba tumusenswe shi tulonga kiswa-mutyima kyandi. Yesu wānenene amba: “Buno’bu bo būmi bwa nyeke, bendelele kukuyuka abe, Leza umo kete wa bine.”​—Yoano 17:3.

Bibwanya kukulomba kushinta pa kusangaja Leza umo kete wa bine. Shako, bibwanya kumweka bu bikomo. Inoko na bubine i lwendo lusangaja, enka mwikadilanga lwendo lo-lonso, lushilulanga na kutabula ditabula dibajinji. Pa kukukwasha utane malondololo ku bipangujo bya myanda ya Leza, Batumoni ba Yehova bakasangela kwifunda nobe Bible ku bitupu pa kitatyi ne kifuko kyosaka. Ubwanya kwitulembela pa diteba dyetu dya www.pr2711.com.